Oviungura 5
5
Ananias na Safira
1Nungwari pa ri omurumendu worive wena Ananias nomukazendu we Safira. Owo va randisire ouini wawo tjiva. 2Ananias wa isa ko ovimariva tjiva, e vi horeke, omukazendu we aa tjiwa, nu imbi mbya sewa po e vi eta ne vi yandja kovaapostele. 3Nu Petrus we mu pura a tja: “Ananias, okutjavi tji wa yandjere Satan kutja a rore omutima woye, u korere Ombepo Ondjapuke ovizeze mokuisa ko ovimariva tjiva mbi wa munu tji wa zu nokurandisa ehi reṋu romakunino? 4Ngunda au hiya randisa indi ehi romakunino, oro kara ri oroye are? Nu tji ra randisiwa imbi ovimariva kavi ri mousemba woye are? We ripurire tjike momutima woye okutjita otjiṋa tji tja sana ngo? Ove ko wovisire ovandu, nungwari wa wovisa Ndjambi!” 5Ananias tja za nokuzuva omambo nga, arire tja u a koka omutundu. Navehe mba zuvire otjiṋa hi va kara nondiriro onene. 6Nu mwa hita ovarumendu omitanda, ave ṱunu orutu rwa Ananias, ave ru pitisa nave kerupaka.
7Kombunda yozoiri mangara ndatu omukazendu wa Ananias arire tja hiti, e hi nokutjiwa ihi tji tja tjitwa. 8Petrus otje mu pura a tja: “Ndji raera kutja ove nomurumendu woye mwa randisa ehi romakunino kovimariva mbi ṱeki mba?”
Eye wa zirire a tja: “Ii, okovimariva mbi ṱeki mbo.”
9Petrus wa tjere nai ku ye: “Ove nomurumendu woye mwa zuvasanene tjike okurora Ombepo ya Muhona? Tara, ovarumendu mba mba zu nokukapaka omurumendu woye, nambano va kurama pomuvero, nowo wina mave ku pitisa pendje!” 10Tjimanga omukazendu ngwi wa wira pozombaze za Petrus narire tja koka omutundu. Novarumendu mba omitanda tji va hita nave mu vaza a koka, ve mu pitisa ave kemupaka meṋe yomurumendu we. 11Nombongo aihe na imba mba zuvire oviṋa mbi va tirire tjinene.
Ovihimise noviraisiro ovingi
12Noviraisiro novihimise ovingi aavi tjitwa mokati kovandu i ovaapostele. Aruhe ovakambure avehe aave woronganene pamwe mEtuwo ra Salomo. 13Meṋe yawo kapa ri omundu warwe ngwa rorere okuwana na wo, nangarire kutja ovandu aave ve yozike tjinene. 14Nungwari kotjivaro tjawo kwe riwezira ko ovandu ovengi, mba kambura mu Muhona, ovarumendu novakazendu. 15Otja ku imbi ovaapostele mbyaa ve tjiti, ovavere aave pitisiwa pendje momivanda, ave rarekwa koviraro na povinguma kokutja Petrus tji ma kapita nangarire otjizire tje tji ṱune ku tjiva vawo. 16Wina iyaku zu ovandu ovengi kovirongo mozondendera za Jerusalem mbaa ve eta ovavere na imba mba ri nozombepo ozohakohoke; nowo va verukisiwa avehe.
Ovaapostele mave tatumisiwa
17Omupristeri Otjiuru na imba avehe mbe rikutire kuna ye, okutja imbwi ouṋepo wotjira tjOvasaduke, va ṱeruru tjinene novaapostele; nowo arire tji va tye okuvesekamena. 18Owo va kambura ovaapostele nave ve twa motjovakamburwa yovandu vakauriri. 19Nungwari ouṱuku tjingewo mbo omuengeri wa Muhona otja paturura omivero vyotjovakamburwa, a pitisa ovaapostele na tja ku wo: 20“Twendeye mu kakurame mondjuwo ya Muhona, nu mu karaere ovandu omambo aehe womuinyo omupe mbwi mu Jesus Kristus.” 21Novaapostele va kara nonḓuviro komambo nga, nu muhukomunene arire tji va i kondjuwo ya Muhona okukahonga ovandu.
Omupristeri Otjiuru na imba mbe rikutire kuna ye va woronganisa ovanane avehe votjiwaṋa tja Israel okutjita ombongarero onene yOtjira tjOvajuda; nowo va hinda ovakarere kotjovakamburwa okukaeta ovaapostele. 22Nungwari ovakarere tji ve ya ngo, kave vazere mo ovaapostele motjovakamburwa; notji va yaruka kOtjira okukahepura nai: 23“Eṱe twa kavaza otjovakamburwa aya patwa nawa nounongo, novatjevere ava kurama pomivero, nungwari tji twa yezurura imbi omivero katu vazere mo omundu nangarire umwe moukoto!” 24Nomunane wovatjevere vondjuwo ya Muhona novapristeri oviuru tji va zuu omambo nga arire tji va himwa nave yaraarisiwa ingwi okutja pa tjitwa tjike kovaapostele. 25Tjimanga mwa hita omundu na tja nai ku wo: “Purateneye! Ovarumendu mba mbu mwa twire motjovakamburwa nai ve ri mondjuwo ya Muhona, mave hongo ovandu!” 26Nomunane wovatjevere arire tja i ngo puna ovakarere ve nave kaeta ovaapostele. Owo kave tjitire outwe kovaapostele, tjinga aave tira kutja otjiwaṋa matji ve zepa nomawe.
27Notji va eta ovaapostele nave ve kuramisa komurungu wOtjira, nOmupristeri Otjiuru arire tje ve pura a tja: 28#Mt 27:25“Eṱe twe mu rakiza oukukutu kutja amu ha hongo mena romundu ngwi Jesus. Tareye, eṋe mwe urisa Jerusalem nomahongero weṋu nga, nu nokombanda yanao mamu vanga kutja eṱe tu varwe otja mbu tu ri ovemuzepe!”
29Petrus novaapostele ovakwao va zirire ave tja: “Omundu wa sokukara nonḓuviro ku Ndjambi komeho yokukara nonḓuviro kovandu. 30Ndjambi wootate mukururume wa pendura Jesus movakoke, indu tji mwa za nokumuzepa namu mu papere nozomboha kotjikoroise. 31Ndjambi we mu pendurira okukara kokunene kwe otja ngu ri Omunane nOmukuture, nokuyandjera otjiwaṋa tja Israel kutja tji yenene okuritanaura nokuisirwa ourunde watjo. 32Eṱe oweṱe mbu tu ri ovahongonone voviṋa mbi eṱe nOmbepo Ondjapuke, ndji ri otjiyandjewa tja Ndjambi ku imba mbe nonḓuviro ku ye.”
33Ouṋepo wOtjira tji wa zuva omambo nga otji wa ṱomazenge tjinene nai nga tji va vanga okuzepa ovaapostele. 34Nungwari pa sekama Omufarisei umwe motjira wena Gamaliel, ngwa ri omuhonge wOmatwako, nu ngwa yozikirwe i otjiwaṋa atjihe. Eye wa rakiza kutja ovaapostele ve pitisiwe pendje kaṱiṱi, 35narire tja tja nai kovakwao vOtjira: “Vaisrael ovakwetu, ṱakamiseye nawa kutja mamu tjiti tjike kovarumendu mba. 36Mamu zemburuka nawa kutja momayuva omasupi nga kapita pa sekamene Teudas nguye ritja eye omunanḓengu tjinene, notja kongorerwa i otjivaro tjovarumendu mangara omasere yane. Nungwari eye wa ṱa komake wovandu, navehe mbe riyamekere ku ye ave pizuka. 37Kombunda ye ape sekama Judas, Omugalilea, momayuva womavarero wovandu. Eye wa popera ovandu ovengi okumukongorera, nungwari eye wina wa ṱa komake wovandu, nu imba mbe riyamekere ku ye arire tji va pizuka. 38Nu nambano motjiṋa hi wina ami otji me mu raere kutja mu ze ko kovarumendu mbo, nu mu ve ese ve yende. Ihi tji va tya nokutjita tje ri otjiungura tjovandu matji yandekwa. 39Nungwari tje ri otjiungura tja Ndjambi, eṋe kamaamu sora okutjitjaera. Kombunda yanao mape munika aayo eṋe oveni ombu mamu rwisa Ndjambi.”
Otjira arire tji tja zuvire Gamaliel. 40Owo va isana ovaapostele ve hite, ave ve tono nave ve rakiza kutja ave ha roro rukwao okuhungira mena ra Jesus; tjazumba arire tji ve ve kutura. 41Ovaapostele tji va za mo mOtjira va kayenda amave nyanda, orondu Ndjambi tjinga e ve vara kutja owo va pwa pokutatumisirwa mena ra Jesus. 42Neyuva arihe peke mondjuwo ya Muhona na mozondjuwo zovandu owo kaave isa okuhonga ovandu nokuzuvarisa Ombuze Ombwa yokutja Jesus onguri Omutwirisiwa.
Currently Selected:
Oviungura 5: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
