Oviungura 6
6
Ovavatere hambombari wombongo
1Nu momayuva ngo, otjivaro tjovahongewa ovakambure tji tja takavarera ko, Ovagrike otji va unaunina Ovaheberi. Ovagrike aave tja ovahepundu vawo kaave pewa okamariva kuya ke haṋewa movahepundu eyuva arihe. 2Ovaapostele imba omurongo na vevari va woronganisa ovakambure avehe nave tja nai ku wo: “Kakokuwa eṱe okuyarura omazuvarisiro wembo ra Ndjambi ombunda kokutja tu ungure otjiungura tjomahavarisiro wovikurya kovandu. 3Nambano, vakwetu, toororeye ovarumendu hambombari mokati keṋu mbe iwe kutja ve ura nOmbepo Ondjapuke nounongo, kokutja eṱe tu vezike okuungura otjiungura otjinahepero hi. 4Nungwari otjiungura tjetu matji rire ihi tjokupanḓera pongumbiro na pomazuvarisiro waindi embo.” 5Ovakambure avehe otji va itavera komambo wovaapostele nga, narire tji va toorora Stefanus, omurumendu wongamburiro onḓeu nu ngwe urire nOmbepo Ondjapuke, na Filipus na Prokorus na Nikanor na Timon na Parmenas na Nikolaus, ngwa zire kOantiokie nu ngwe ritanaurire kongamburiro yOvajuda. 6Ovakambure va eta ovarumendu mba komurungu wovaapostele, novaapostele arire tji ve ve kumbire nave yambeke omake ku wo.
7Omazuvarisiro wembo ra Ndjambi ya kaenda komurungu, nembo ra handjauka movandu, notjivaro tjovakambure mOjerusalem tja takavarera ko tjinene, notjimbumba otjingi tjovapristeri atji yakura ombuze yongamburiro.
Stefanus ma kamburwa
8Nu Stefanus, omurumendu ngwa sererwe ondaya tjinene i Ndjambi, nu ngwa ri nomasa wOmbepo, wa tjitire ovihimise noviraisiro ovinene motjiwaṋa. 9Eye wa sekamenwa i ovarumendu tjiva vosinagoge ndjiyayi isanewa kutja oyOvakarere Ovakuturwa, nu mu mwa ri Ovajuda mba zire kOkirene na Aleksandrie. Owo nOvajuda ovakwao mba zire kehi ra Silisie nora Asie va uta okupatasana na Stefanus. 10Nungwari owo kaave sora okupirukira ounongo eye mbwa perwe i Ombepo, nu mbuya hungire na wo. 11Notji va popa ovandu tjiva kutja ve tje nai: “Eṱe twa zuu Stefanus ama yamburura Moses na Ndjambi!” 12Komuhingo mbwi owo otji va zunganisa otjiwaṋa novanene nozonongo zomambo. Ovandu mba arire tji va hangatene Stefanus, ave mu kambura nave mu twara komurungu wOtjira, 13puna ovandu tjiva mbu va etere kutja ve hongonone ovizeze ohunga naye. Novahongonone wovizeze mba va tjere nai: “Omurumendu ngwi aruhe u yamburura ondjuwo ya Muhona ondjapuke nOmatwako wa Moses. 14Eṱe twe mu zuu ama tja Jesus wa Nasaret ma haṋa ondjuwo ya Muhona nu ma rundurura omazikanisiro ngu twa pewa i Moses!” 15Navehe mba haamene mOtjira va siririka omeho wawo mu Stefanus, narire tji va munu kutja omurungu we mau munika otja omurungu womuengeri.
Currently Selected:
Oviungura 6: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
