Oviungura 7
7
Omazuvarisiro wa Stefanus
1Omupristeri Otjiuru wa pura Stefanus a tja: “Omambo nga nai ouatjiri?”
2 #
Gen 12:1
Stefanus wa zira a tja: “Varumendu ovakwetu nootate, puratene ku ami! Tate mukururume Abraham ngunda e hiya katura kOharan, Ndjambi wondangero aihe otje rimunikisa ku ye mehi ra Mesopotamie 3na tja ku ye: ‘Pita mehi reṋu na momuhoko woye, nu u yende kehi ndi me ku urikire.’ 4#Gen 11:31 Gen 12:4Abraham otja tjinda mehi rawo na katura mehi ra Haran. Kombunda yonḓiro ya ihe, Ndjambi arire tje mu tjindisire kehi ndi eṋe nambano mu mwa tura. 5#Gen 12:7; 13:15; 15:18; 17:8Ndjambi ka yandjere eṱa ku Abraham mehi ndi nangarire pu pe ṱa ondambo yomundu, nungwari Ndjambi wa kwizikira okuriyandja ku ye, nokutja oro mari rire ore nozondekurona ze. Noruveze Ndjambi ndwa tjita omakwizikiro nga tjandje nao Abraham ke novanatje. 6#Gen 15:13, 14Ndjambi wa tjere nai ku ye: ‘Ozondekurona zoye maze katura mehi rambangu nu aze karira ovakarere ngo naze katatumisiwa noutwe oure wozombura omasere yane. 7#Eks 3:12Nungwari ami me pangura otjiwaṋa tji matji ze isa po ovakarere, nu kombunda yanao ozo maze tjindi mehi ndo naze rikotamene ku ami poṋa mbo.’ 8#Gen 17:10-14 Gen 21:2-4 Gen 25:26 Gen 29:31—35:18Nu Ndjambi wa yandja omasukarekero ku Abraham ye rire otjiraisiro tjomerikutiropamwe. Abraham otja sukareka Isak meyuva oritjahambondatu kombunda yongwatero ye; nu Isak a sukareke omuzandu we Jakob; tjazumba Jakob a sukareke ovazandu ve omurongo na vevari, imba ootate mukururume vomuhoko wetu.
9 #
Gen 37:11
Gen 37:28
Gen 39:2, 21 “Ovazandu va Jakob va ṱeruru nomuangu wawo Josef, notji ve mu randisa kOengipte okukarira omukarere. Nungwari Ndjambi wa ri puna ye, 10#Gen 41:39-41narire tje mu yama momauzeu we aehe. Nu momurungu wombara ya Engipte Ndjambi wa yandjere otjari nounongo ku Josef, nombara ai ziki Josef okurira ongooneya wokehi yombara mehi nowonganda yayo aihe youhona. 11#Gen 42:1, 2Tjazumba otji mwa kara ondjara mehi arihe ra Engipte nora Kanaan; ondjara ndji ya eta ouzeu ounene, nootate mukururume kava ri notjiṋa okurya. 12Nu Jakob tja zuvire kutja kOengipte ku novikurya, arire tja hindi ovazandu ve, ootate mukururume, otjikando otjitenga koṋa ngo. 13#Gen 45:1 Gen 45:16Owo tji va ire ngo porutjavari, Josef arire tje rihangununa komarumbi we, nomuhoko wa Josef otji wa tjiukwa kombara ya Engipte. 14#Gen 45:9, 10, 17, 18 Gen 46:27Josef wa raa ombuze ku ihe Jakob okumuraera kutja eye nomuhoko auhe, ovandu avehe kumwe omirongo hambombari na vetano, ve ye kOengipte. 15#Gen 46:1-7 Gen 49:33Nu Jakob wa ire kOengipte, neye novazandu ve ave kaṱira ngo. 16#Gen 23:3-16; 33:19; 50:7-13; Jos 24:32Otutu twawo twa kapakwa kOsikem meyendo nda randerwe i Abraham kozondekurona za Hamor kotjimariva tjorive.
17 #
Eks 1:7, 8 “Omayuva tji ya yenene kutja Ndjambi a yenenise omakwizikiro nga tjitire ku Abraham, tjandje nao otjivaro tjotjiwaṋa tjetu mOengipte tja takavarera ko, 18nga tji mwa zikwa ombara yarwe mOengipte ndjaa i ha tjiwa Josef. 19#Eks 1:10, 11 Eks 1:22Oyo ya tjita ootate mukururume ovineya, ai ve tatumisa nokuveṋiṋikiza kutja ve imbirahi ounatje wawo ounyame kutja u ṱe. 20#Eks 2:2Nu Moses wa kwaterwe momayuva nga, neye wa ri okanatje okawa komurungu wa Ndjambi. Neye we kurisiwa monganda ya ihe oure womieze vitatu, 21#Eks 2:3-10nu tja za nokuimbirahiwa moyawo, omusuko wombara arire tje mu yakura, e mu kurisa ne mu isa po omuatje we omuini. 22Moses wa hongerwe ounongo auhe wOvaengipte, nu a rire omurumendu omunamirya momambo na moviungura vye.
23 #
Eks 2:11-15
“Neye tja tjita ozombura omirongo vine we rizemburuka okukavarura ovangu ve, ihi otjiwaṋa tja Israel. 24Nu tja muna Omuisrael omukwao ama tatumisiwa i Omuengipte, arire tje kemuvatera na sutisa ondjito ndji mokuzepa ingwi Omuengipte. 25Moses we ripura kutja otjiwaṋa tjawo matji munu kutja Ndjambi me tji kutura meke re, nungwari otjo katji zuvire ko nawa. 26Mependukirwa eye wa muna Ovaisrael vevari amave ru, narire tja roro okuvehanganisa ama tja: ‘Purateneye, varumendu, oweṋe Ovaisrael amuyevari; mamu rwire tjike?’ 27Nungwari ingwi ngwaa tjiti ouhasemba komukwao wa undura Moses na pura a tja: ‘Owaṋi ngwe ku pa ousemba noupangure kombanda yetu. 28Mo vanga okundjizepa tjimuna tji wa zepere ingwi Omuengipte erero are?’ 29#Eks 18:3, 4Moses tja zuva omambo nga wa pita mOengipte na katura mOmidian, indi ehi eye ma kakwatera ovanatje ovazandu vevari.
30 #
Eks 3:1-10
“Ozombura omirongo vine tji za kapita, omuengeri we rimunikisa ku Moses morururumo rwomuriro mbuyau yaka motjihwa tjomakuiya mokuti onguza popezu nondundu Sinai. 31Moses wa kumisirwe i otjiṋa tjaa munu, nu tja ryama popezu notjihwa okutara nawa, arire tja zuu eraka ra Muhona ndi mari tja: 32‘Owami Ndjambi wooiho mukururume, Ndjambi wa Abraham na Ndjambi wa Isak na Ndjambi wa Jakob!’ Nu Moses wa zezerisiwa i omburuma na ha roro nangarire ingwi okutara. 33Muhona wa tjere nai ku ye: ‘Hukura ozongaku zoye, orondu poṋa pu wa kurama mba opopayapuke. 34Ami mba munu nawanawa ondatumisire yotjiwaṋa tjandje mOengipte, nu mba zuu ondjemeno yatjo, notji mba rauka okuyekuvekutura ku yo. Nambano indjo, nami me ku hindi kOengipte.’
35 #
Eks 2:14
“Moses onguri ye ngwi ngwa imbirahirwe i otjiwaṋa tja Israel indu tji tja tjere: ‘Owaṋi ngwe ku pa ousemba noupangure kombanda yetu?’ Eye onguri ye ngwi Ndjambi ngwa hindire okuyekuhonaparera otjiwaṋa nokutjikutura nombatero yomuengeri ngwi ngwe rimunikisire ku ye motjihwa tjaa tji yaka. 36#Eks 7:3 Eks 14:21 Num 14:33Eye ongwa hongorera otjiwaṋa ame tji pitisa mehi ra Engipte nama tjiti ovihimise noviraisiro mu ro na pOmuronga wOtuu na mokuti onguza oure wozombura omirongo vine. 37#Deu 18:15, 18Moses onguri ye ngwi ngwa tjere nai kotjiwaṋa tja Israel: ‘Ndjambi me mu pendurire omuprofete otja ami mokati kotjiwaṋa tjeṋu.’ 38#Eks 19:1—20:17; Deu 5:1-33Eye onguri ye ngwi ngwa ri puna otjiwaṋa tja Israel tji tja woronganene mokuti onguza, na puna ootate mukururume nomuengeri ngwi ngwa hungirire na ye kondundu Sinai, narire tja yakura omambo omanamuinyo wa Ndjambi okuyevasisa ku eṱe.
39“Nungwari ootate mukururume va panḓa okukara nonḓuviro ku ye; owo ve mu imbirahi nave zeri okuyaruka kOengipte. 40#Eks 32:1Notji va tja nai ku Aron: ‘Tu tjitira oomukuru vovisenginina mbu mave tu hongorere. Eṱe katu nokutjiwa kutja Moses ngwe tu tjindisa mOengipte wa katjitwa vi.’ 41#Eks 32:2-6Nowo arire tji ve riungurire otjiserekarera tjotjisenginina tjosaneno yondana, ave tji punguhire ozombunguhiro nave zepa omukandi okuyozika ihi tji va ungura nomake wawo. 42#Amos 5:25-27Ndjambi otje ve pa etambo nu e ve yandja kutja ve rikotamene kozonyose zeyuru, otja tji pa tjangwa membo rovaprofete:
‘Tjiwaṋa tja Israel! Ozombura nḓa omirongo vine nḓu mwa kara mokuti onguza,
mwe ndji punguhira ozombunguhiro zovinamuinyo nozoningiririsiwa are?
43Eṋe mwa toora ondanda yomukuru wotjisenginina Molok
notjisekerarera tja Refan, ingwi omukuru weṋu wonyose;
oviserekarera eṋe mbi mwa ungura okurikotamena ku vyo.
Ami otji me mu hindi kouhuura munda mbwina ya Babilon.’
44 #
Eks 25:9, 40 “Ootate mukururume va ri nOndanda yOmahakaeneno ya Ndjambi puna womokuti onguza. Oyo ya ungurirwe otja Moses punga a raererwe i Ndjambi kosaneno yotjisanekero Moses tja munine. 45#Jos 3:14-17Kombunda ootate mukururume, mba perwe Ondanda ndji i ooihe, ve i toora indu tji va hongorererwe i Josua okukakambura ehi roviwaṋa Ndjambi mbya rambere mehi owo tji ve ere. Noyo ya kara mo nga komayuva wa David. 46#2Sam 7:1-16; 1Eku 17:1-14David wa munine ondjingonekero komurungu wa Ndjambi, neye arire tja ningire Ndjambi kutja e mu yandjere okutungira Ndjambi wa Jakob omaturiro. 47#1Ozo 6:1-38; 2Eku 3:1-17Nu a ri Salomo ongwe mu tungira indji ondjuwo.
48“Nungwari Ndjambi wOkombandambanda ka tura mozondjuwo nḓe tungwa i omake wovandu otja omuprofete punga ama hee:
49 #
Jes 66:1, 2 ‘Muhona matja nai:
Eyuru oro otjihavero tjandje tjouhona,
nehi oro okahavero kozombaze zandje.
Hapo ongendjuwo ndji mamu yenene okundjitungira,
nu opoṋa peṋe ami pu me suva?
50Kawami are ngu mba uta avihe mbi?’
51 #
Jes 63:10
“Eṋe, tjiri, oweṋe ovirangaranga! Omitima vyeṋu vi ri tjimuna ovyovandu mbe ha kambura mu Ndjambi, noweṋe ozomboro kembo ra Ndjambi. Aruhe mu pirukira Ombepo Ondjapuke. Otja ooiho mukururume punga aave tjiti eṋe wina opunga amu tjita! 52Omuprofete uṋe ooiho mukururume ngu ve ha tatumisire? Owo va zepere ovahindwa va Ndjambi, imba ovahindwa mba zuvarisire omeero wOmusemba rukuru. Nambano eṋe mwe mu rondora namu mu zepa. 53Oweṋe mba mbu mwa yakura omatwako wa Ndjambi, inga nga yandjerwe i ovaengeri, nu, tjiri, eṋe kamu karere ko nonḓuviro komatwako nga!”
Stefanus ma ṱu nomawe
54Nouṋepo wOtjira tjOvajuda tji wa zuva omambo nga wa Stefanus, arire tji wa ṱomazenge tjinene nau mu rumatere omiṋa. 55Nungwari ingwi Stefanus, ngwe urire nOmbepo Ondjapuke, wa tara keyuru a munu ongeṋangeṋeno ya Ndjambi na Jesus a kurama kokunene kwa Ndjambi. 56Neye arire tja tja: “Tara, ami me munu eyuru ara paturuka nOmuna wOmundu a kurama kokunene kwa Ndjambi!”
57Ovandu vOtjira tjOvajuda va tjita ondokohero onene ava setike omatwi wawo nomake. Nowo arire tji va hakahana okuya ku ye, 58ave mu undurire pendje yotjihuro nave mu vete nomawe. Novahongonone va isa ozombanda zawo pomuzandona wena Saulus. 59Owo va kara pokuveta Stefanus nomawe eye ngunda ama ravaere nai ku Muhona: “Muhona Jesus, yakura ombepo yandje!” 60Nu eye wa wora ozongoro na ravaere neraka enene a tja: “Muhona, arikana o ve verere ko ourunde mbwi!” Neye tja za nokuhungira omambo nga arire tja koka.
Currently Selected:
Oviungura 7: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
