Oviungura 8
8
Saulus ma tatumisa ombongo
1Saulus opari ovandu wotjira tjOvajuda tji va veta Stefanus nomawe nga tja koka, nu eye ongwa yandja ouvara kutja Stefanus a ṱe. Okuza keyuva ndo ombongo mOjerusalem ya uta okutatumisiwa noutwe. Ovakambure avehe, posi yovaapostele, va rimbarere akuhe mehi ra Judea nora Samaria. 2Novarumendu tjiva ovapore va kapaka Stefanus amave mu riri tjinene.
3 #
Oviu 22:4, 5; 26:9-11 Nungwari Saulus wa kondja okuyandeka ombongo. Eye aa ryanga mozondjuwo ama kokozora ovakambure, ovarumendu novakazendu, nokuvetwa motjovakamburwa.
Ombuze Ombwa ya Kristus mai zuvarisiwa mOsamaria
4Ovakambure mba rimbarere nambano va ya koṋa akuhe amave zuvarisa indji Ombuze Ombwa ya Kristus. 5Filipus otje ya kotjihuro ohongora mehi ra Samaria na zuvarisa Omutwirisiwa kovature vatjo. 6Ovimbumba vyovandu tji vya za nokupuratena ku Filipus nokumuna ovihimise eye mbya tjita, arire tji vya panḓere pomambo nga eye ngwaa hungire. 7Ozombepo ozohakohoke za pita movandu ovengi amaze uru nomasa, novengi mba remanene na mba kwaterwe ovipu va verukisiwa. 8Notji mwa kara enyando enene motjihuro hi.
9Motjihuro tjingetjo hi mwa turire omurumendu wena Simon, nu moure womayuva omengi eye wa himisire ovature va Samaria noundjai we. Eye ee rihivi kutja onguri rive omunene, 10navehe motjihuro, okuza kovanene nouṱiṱi, va kakatera ku ye tjandje mave tja: “Eye onguri ye ngwi ngu tu tja: ‘Omasa omanene wa Ndjambi.’ ” 11Owo va kakaterere ku ye, eye tjinga e ve himisa noundjai we oure womayuva omengi. 12Nungwari owo tjivakambura mombuze ya Filipus ohunga nOmbuze Ombwa youhona wa Ndjambi nEna ra Jesus Kristus, arire tji va kambura nu ape papitisiwa ovarumendu novakazendu. 13Simon omuini wina wa rira omukambure. Nu tja za nokupapitisiwa wa panḓera pu Filipus, nu wa uruma tjinene tja muna oviraisiro novihimise, mbi mavi tjitwa.
14Ovaapostele mba serwe mOjerusalem va zuva kutja ovature va Samaria va yakura embo ra Ndjambi, notji va hinda Petrus na Johanes ku wo. 15Nowo tji ve ya kOsamaria va kumbira ovakambure kutja ve pewe Ombepo Ondjapuke, 16Eye tjinga aya ri e hiye ya kombanda yaauhe wawo; owo va papitisiwa mena ra Muhona Jesus porwe. 17Tjazumba Petrus na Johanes ave yambeke omake ku wo, nowo ave pewa Ombepo Ondjapuke.
18Simon tja muna kutja ovakambure va pewa Ombepo Ondjapuke, indu ovaapostele tji va zu nokuyambeka omake ku wo, arire tja yandja ovimariva ku Petrus na Johanes, 19na tja: “Ndji peweye omasa nga wina, kokutja auhe ku me yambeke omake wandje a pewe Ombepo Ondjapuke.”
20Nungwari Petrus we mu zira a tja: “Ovimariva vyoye kara na vyo u kapandjare na vyo! Mo tjangovasi oviyandjewa vya Ndjambi ove mo yenene okuviranda novimariva are? 21Ove ko norupa motjiungura tjetu, omutima woye tjinga au he ri omusemba komurungu wa Ndjambi. 22Nambano ritanaura, u ise omeripura woye omanauvi nga, nu u kumbe ku Muhona kutja nani eye me ku isire ourizemburuka woye mbwa sana ngo. 23Ami me munu kutja u neruru tjinene momutima nokutja ourunde ombwa rira epando roye.”
24Simon arire tja zira nai ku Petrus na Johanes: “Arikaneye ndji kumbireye ku Muhona, kokutja imbi mbi mwa hungire avi he ya kombanda yandje.”
25Petrus na Johanes tji va za nokuhongonona nokuzuvarisa ombuze ya Muhona, arire tji va yaruka kOjerusalem, tjandje mave yende amave zuvarisa Ombuze Ombwa movirongo ovingi vya Samaria.
Filipus nOmuetiopi
26Omuengeri wa Muhona wa hungirire nai ku Filipus: “Rirongera u yende mutenya kondjira ndji za mOjerusalem okuyenda kOgasa.” Ondjira ndji nambano kai tji twarewa rukwao. 27Filipus otje rirongera na i. Nu omuhona ombondo wa Etiopie, ngwa ri omunene momatjeverero wovihuze vyombara oserekaze ya Etiopie, we ere kOjerusalem okuyekurikotamena ku Ndjambi. 28Eye wa ri mondjira okuyaruka, nu ngunda a haama metemba re tjandje ma rese membo romuprofete Jesaja. 29Ombepo Ondjapuke arire tji ya tja nai ku Filipus: “Twende ketemba ndo u kayende meṋe yaro.” 30Filipus wa tupuka ketemba na kazuva ingwi omurumendu tji ma rese membo romuprofete Jesaja. Eye we mu pura a tja: “Omambo ngu mo rese mo ye zuu kutja maye hee tjike?”
31Omuetiopi wa zira a tja: “Me sora vi okuzuva ambi hi nomundu ngu me ndji handjaurire?” Neye wa isana Filipus kutja a ronde metemba nu a kare pehi puna ye. 32#Jes 53:7, 8Nu indwi orukondwa rwomatjangwa eye nduya rese orondwi:
“Otja onḓu ndji twarewa tji mai kaṱa,
notja ondjona ndji ha vandara tji mai horwa,
eye ke na pa nyamukura.
33Eye wa susuparisiwa nu ka pangurirwe osemba.
Owaṋi ngu ma yenene okuserekarera ozondekurona ze,
mena rokutja ehupiro re kombanda yehi ra yanda.”
34Omuhona ombondo ngwi wa pura Filipus a tja: “Arikana, ndji raera kutja omuprofete otjiṋa hi ma hungirire uṋe? Me rihungirire omuini poo ma hungirire omundu warwe?” 35Filipus wa uta okuhungira, neye wa utira porukondwa rwomatjangwa ndwi nu e mu raere Ombuze Ombwa ya Jesus. 36Nu ngunda amave kayenda mondjira, arire tji ve ya pomeva, nomuhona ombondo a tja nai: “Tara, omeva owo nga, otjikeṋa tji matji ndji tjaere okupapitisiwa?”
37Filipus we mu zira a tja: “Tji mo kambura nomutima woye auhe, ove mo yenene okupapitisiwa.”
Neye wa zira nai: “Ii, me vanga! Me kambura kutja Jesus Kristus onguri Omuna wa Ndjambi.” 38Omuetiopi wa rakiza kutja etemba rikuramisiwe, naveyevari, Filipus nOmuetiopi, arire tji va pundu momeva, nu Filipus e mu papitisa. 39Nu tji va pita momeva, Ombepo ya Muhona arire tji ya toora Filipus ai mu isa po. Omuhona ombondo kemumwine rukwao, neye wa kayenda ondjira ye e nenyando tjinene. 40Kombunda Filipus wa kamunikira mOasotus. Eye wa tapakaṋa ovirongo avihe nga tje keya mOsesarea ama yende ama zuvarisa indji Ombuze Ombwa akuhe.
Currently Selected:
Oviungura 8: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
