Genesis 22
22
Abraham ma rakiziwa okupunguha Isak
1 #
Heb 11:17-19
Kombunda yoviṋa mbi Ndjambi wa rora Abraham na tja: “Abraham!” Neye wa zira a tja: “Owami ngwi.”
2 #
2Eku 3:1
Ndjambi arire tja tja: “Toora Isak, omuzandu woye omukwatwa erike, ngu wa suvera, nu twende kehi ra Moria u kemupunguhire ngo otja ombunguhiro oningiririsiwa kondundu, ndji me ku urikire.”
3Nu komambo nga Abraham we rirongera omuhuka omunene, a kutire okasino ke, na toora ovakarere ve vevari nomuzandu we Isak pamwe na ye. Neye wa tyora ozonguṋe zombunguhiro oningiririsiwa, a sekama na i koṋa Ndjambi ke mu urikira. 4Nu meyuva oritjatatu, Abraham, poṋa pa raererwe okutjitira ombunguhiro we pe munina kokure. 5Nu arire tja tja nai kovakarere ve: “Kareye mba nokasino ami nomuzandu matu i ngwina okukakumba; nu tjazumba matu kotoka ku eṋe.”
6Abraham wa toora ozonguṋe zombunguhiro ne ze twike komuzandu we Isak; neye omuini wa tjinda omuriro noruvyo. Aveyevari otji va kayenda pamwe. 7Isak otja hungira ku ihe a tja: “Tate!”
Neye wa zira nai: “Owami ngwi, muatje wandje!”
Nu Isak arire tja tja: “Omuriro nozonguṋe ovyo mbi, nungwari indji ondjona yombunguhiro oningiririsiwa i ri pi?”
8Abraham wa zira a tja: “Ndjambi omuini ongu me tu pe indji onḓu, ndji mai rire ombunguhiro oningiririsiwa.” Notji va ka wondja pamwe.
9 #
Jak 2:21
Nu tji va kavaza poṋa Ndjambi pe mu raera, Abraham arire tja tungu otjipunguhiro na twako ozonguṋe. Neye wa kuta omuatje we Isak ne mu twa kotjipunguhiro kombanda yozonguṋe. 10Abraham arire tja roporora eke re na toora oruvyo kutja a zepe omuna we. 11Nungwari omuengeri wa Muhona we mu isana okuza meyuru a tja: “Abraham, Abraham!”
Neye wa itavera na tja: “Owami ngwi!”
12Nomuengeri wa tja: “O hihamisa omuzandu, nu o tjiti otjipo ku ye! Orondu ami nambano mba tjiwa kutja ove u nondira ku Ndjambi, nu ko ndji ruruparere omuna woye omukwatwa erike.”
13Nu Abraham tja tara ongondoroka wa muna ondwezu yonḓu ndja ri kongotwe ye aya pata ozonya zayo motjihwa. Abraham we i kambura, neye we i punguha moruveze rwomuzandu we. 14Nu Abraham poṋa mbo we pe ruka “Muhona u yandja”. Nga ndinondi otji pe isanewa kutja okondundu ya Muhona eye ke rimunikisira.
15Nomuengeri wa Muhona wa isana Abraham otjikando otjitjavari okuza meyuru na tja: 16#Heb 6:13, 14“Ami me riyanene omuini, Muhona ma tja nai, ove tjinga awa tjiti nai nu tjinga au he ndji ruruparere omuzandu woye omukwatwa erike, 17#Heb 11:12otji me ku sere ondaya ne takavarisa ozondekurona zoye tjinene tjimuna ozonyose keyuru, neheke komukuro wokuvare. Nozondekurona zoye maze havere ovanavita na zo. 18#Oviu 3:25Nu mozondekurona zoye omihoko avihe, mbi ri kombanda yehi mavi serwa ondaya, ove tjinga awa kara nonḓuviro komaraerero wandje.” 19Abraham wa yaruka kovakarere ve, nowo va ya pamwe kOberseba. Nu Abraham wa katura ngo.
Ozondekurona za Nahor
20Kombunda yoviṋa mbi Abraham wa eterwa ombuze yokutja Milka wa pandukira omuangu we Nahor ovanatje ovazandu: 21Everi re oUs, novangu ooBus na Kemuel, ihe ya Amram, 22na Kesed na Haso na Pildas na Jidlaf na Betuel. 23Nu Betuel ongwa ri ihe ya Rebeka. Milka wa pandukira Nahor, omuangu wa Abraham, ovazandu mba hambondatu. 24Omukazendu wa Nahor omumbanda ngwa ri nena Reuma wa panduka ooTebak na Gaham na Tahas na Maaka.
Currently Selected:
Genesis 22: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
