Genesis 23
23
Sara ma koka nu Abraham ma randa ehi romapakero
1Sara wa hupa oure wozombura esere rimwe nomirongo vivari na hambombari. 2Eye wa kokera Hebron, mehi ra Kanaan, nu Abraham we mu tjitira omutambo ne mu riri.
3Kombunda otja sekama poruveze pu pa ri orurova romukazendu we, na kahungira kOvahetite a tja: 4#Heb 11:9, 13; Oviu 7:16“Ami owami owozonganda nomuraranganda mokati keṋu. Ndji peweye ehi romapakero ri rire ouini wandje, mbi pake mo omukazendu wandje.”
5Nu Ovahetite va zira ku Abraham ave tja: 6“Arikana, puratena ku eṱe, muhona, ove oove omuhivirikwa wa Ndjambi mokati ketu. Paka omukazendu woye meyendo rimwe ewa tjinene, ndi tu na ro. Kape na umwe ngu ma rurupara ehi romapakero kove.”
7Abraham arire tja sekama ne ripete komurungu wOvaheti, 8na tja ku wo: “Eṋe tji mamu vanga kutja mbi pake omukazendu wandje muno, ndji ningirireye ku Efron, omuzandu wa Sohar 9kutja e ndji pe ondimba ya Makpela, ndji ri oye. Oyo i ri komukuro wehi re. Ningireye kutja e i randise ku ami kopereisa ndja yenene kutja i rire eyendo, ndi mari karerere ouini wandje mokati keṋu.”
10Avehe va haamene pomuvero wotjihuro amave hungire notjiṋa hi, nu Efron wa ri mokati kawo na ziri ku Abraham komurungu waavehe, mba haamene mbo, na tja: 11“Muhona wandje, puratena ku ami; ehi ndo arihe mu mu na indji ondimba me ri yandja kove komurungu wovandu vandje. Kapake mo omukazendu woye!”
12Nungwari Abraham we ripeta komurungu wovandu vehi ndo, 13na tja ku Efron komurungu wovandu mba avehe: “Tji movanga, arikana, ndji puratena. Ami me vanga okuranda ehi ndi arihe. Yakura otjisuta tjandje, nami me kapaka mo omukazendu wandje.”
14Nu Efron wa zira nai ku Abraham: 15“Muhona wandje, putatena ku ami. Ehi ndi, ri nonḓengu yovisilveri omasere yane posi ya kweṱe naove omasere yane oviṋa uriri. Kapake mo omukazendu woye.” 16Abraham wa itavera na sasaneke ovimariva, imbi ovisilveri omasere yane mbya ningirwa i Efron komurungu wOvaheti otja komasasanekero nge sasanekwa i ovarandise.
17Indi ehi ra Efron mu mwa ri indji ondimba ya Makpela komukuma wokomuhuka wa Mamre otji ra rira ora Abraham. Oro ra ri ehi na indji ondimba, nomiti avihe mbya ri mehi ndo, nga komukuro waro. 18Oro ra varwa otja ouini wa Abraham i Ovahetite avehe, mba woronganena pomahitiro wotjihuro.
19Abraham arire tja paka omukazendu we Sara mondimba mehi ra Kanaan. 20Komuhingo mbwi indi ehi arihe mu mwa ri ondimba ra yandjewa i Ovahetite ku Abraham ri rire ehi rouini we romapakero.
Currently Selected:
Genesis 23: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
