Genesis 37
37
Josef nomarumbi we
1Nu Jakob wa tura mehi ra Kanaan mu mwa turire ihe otja owozonganda. 2Indi oro ehungi romuhoko wa Jakob.
Josef tja ri nozombura omurongo na hambombari, aa risa ozonyanda zaihe puna omarumbi we, ovazandu va Bilha na Silpa, ovakazendu vaihe; eye wa ri omuṱiṱi mokati komarumbi we. Eye aa kaṋangera ko ihe ngamwa okaṋa okavi kuya ke tjitwa i omarumbi we.
3Nu Israel wa suverere Josef tjinene povazandu ve avehe, eye tjinga e mu panduka moukurundu we. Neye we mu ya tatera ombanda ombwa yapeke onde nu ndja ri nomaoko omare. 4Nomarumbi we tji va muna kutja ihe wa suvera Josef okukapita wo, arire tji ve mu humisa, nga tji yave ha vanga okuhungira kuna ye momuano omuwa.
5Otjikando tjimwe Josef wa rota oruroto, ne ru serekarere komarumbi we. Nowo otji ve mu humisira ko. 6Eye wa tja ku wo: “Purateneye oruroto ndu mba rota. 7Tareye, atuhe twa ri mehi romakunino amatu kutu omikuta vyovikootwa. Nomukuta imbwi owandje wa kurama oseka, nu imbi ovyeṋu vya kurama okukondoroka imbwi owandje navi ripete ku wo.”
8Nomarumbi we ve mu pura nave tja: “Ove mo tjangovasi mo rire ombara pu eṱe, nu mo honaparere eṱe are?” Nowo arire tji ve mu humisire ko tjinene mena roruroto rwe na imbi mbya hungire.
9Nu Josef wa rota rukwao, na raere komarumbi we a tja: “Tareye, ami mba roto nai rukwao: Eyuva nomueze nozonyose omurongo na imwe vye ripete ku ami.”
10Neye tja raera oruroto rwe ku ihe na komarumbi we, ihe we mu tena a tja: “Oruroto rwatjike ndu wa roto? Ove mo ripura kutja ami na nyoko nomarumbi woye nomuangu woye matu ya okuripeta kove?” 11#Oviu 7:9Omarumbi wa Josef va ṱeruru na ye, nungwari ihe wa kara pokuripura notjiṋa hi atjihe.
Josef ma randisiwa kOvaengipte
12Nomarumbi we va karisa ozonyanda zaihe kOsikem. 13Nu Israel arire tja tja ku Josef: “Omarumbi woye ve risa ozonyanda kOsikem; indjo, mbi ku hinde ku wo.”
Nu Josef arire tja ziri na tja: “Owami ngwi!”
14Nu ihe arire tja tja ku ye: “Twende u katare omarumbi woye kutja ve ri nawa nozonyanda, nu u kotoke okundjiraera.” Neye we mu hinda okuza korutjandja rwa Hebron.
Nu Josef wa kavaza kOsikem. 15Neye ngunda ama yaraara mokuti otja munikwa i omurumendu worive ngwe mu pura na tja: “Mo paha tjike?”
16Nu Josef we mu zira nai: “Me paha omarumbi wandje. Arikana, ndji raera ku ve risira ozonyanda.”
17Nomurumendu arire tja tja: “Owo va tjinda; ami mbe ve zuva amave tja mave i kOdotan.” Nu Josef wa tezera omarumbi we, ne kevevaza kOdotan.
18Nowo ve mu mwina kokure. Nu ngunda e hiya vaza popezu na wo va zuvasana mongumumu kutja ve mu zepe. 19Nowo verihungirire oveni ave tja: “Tareye, omurote eye ngo weya! 20Indjeye tu mu zepe, nu tu yumbe orurova rwe mu imwe yozondjombo, nu tu tje: ‘Eye wa ṱu i otjipuka tjokuti.’ Tjazumba tu tarere kutja oturoto twe matu yanda pi.”
21Ruben tja zuva ihi wa vanga okuyama Josef ku wo na tja: “Atu mu zepa, kako! 22Amu tirahi ombinḓu, nungwari mu yumbeye mondjombo ndji, ndji ri mokuti onguza. Nu amu mu tjiti otjiṋa.” Ruben wa hungirira kutja e mu yame ne mu yarure ku ihe. 23Nu Josef tja vaza pomarumbi we, owo ve mu hukura indji ombanda onde yomaoko, 24nave mu yumbu mondjombo ndja pwira.
25Nu ngunda amave ri, tjimanga va muna otjimbumba tjOvaismael amave zu kOgilead. Nozongamero zawo aza kutirwa ovyomoro omuwa nomaze omerihuwa nomapya, mbyaa ve twara kOengipte. 26Juda arire tja tja komarumbi novangu ve: “Matu mwine po tjike okuzepa omuangu wetu nokumuhoreka? 27Ngatu mu randise kOvaismael mba, nu atu mu hihamisa; eye omuangu wetu, nonyama nombinḓu yetu.” Nomarumbi novangu ve va zuva ku ye. 28#Oviu 7:9Nu tji pe ya Ovamidian ovarandise otji ve mu nana mondjombo, nave mu randisa kovisilveri omirongo vivari kOvaismael, nowo va twara Josef kOengipte.
29Nu Ruben tja kotoka kondjombo nu tja muna kutja Josef ke mo mondjombo, arire tja taura ozombanda ze okuraisa oruhoze rwe. 30Eye arire tja yaruka kovangu ve na tja: “Omuzandu ke mo mondjombo! Nu hi yende pi?”
31Nowo va toora ombanda ya Josef, nave zepa ongombo nave tjaveke ombanda ndji mombinḓu yayo. 32Owo va tuma indji ombanda onde ku ihe nave tja: “Eṱe twe ripumu mombanda ndji. Kotji tara kutja oyomuatje woye.”
33Neye we i zemburuka a tja: “Ii, oyo oyomuzandu wandje! Eye wa nyondororwa i otjipuka tjokuti.” 34Jakob wa taura ozombanda ze na kutu otjipiriko okukondorokisa omavango we. Neye wa rira omuzandu we oruveze orure. 35Ovazandu novasuko ve avehe ve ya okumuyarura omutima pehi. Nungwari wa panḓa okuyarurwa omutima pehi na tja: “Ami me riri omuzandu wandje, nga tji me pundu motjovakoke.” Ihe otja rira omuzandu we Josef. 36Nu imba Ovamidian va karandisa Josef ku Potifar mOengipte, umwe movahongore va Farao, ngwa ri otjiuru tjovatjevere vondjuwo youhona.
Currently Selected:
Genesis 37: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
