Genesis 38
38
Juda na Tamar
1Nu moruveze ndo Juda wa isa omarumbi novangu ve na katura puna Hira, omurumendu ngwa zire kotjihuro tjena Adulam. 2Ingo Juda oka kamuna omusuko womurumendu Omukanaan wena Sua. Eye arire tje mu kupu. Nu tja rara pu ye, 3wa rira otjingundi, a panduka omuzandu, ne mu ruku Er. 4Neye wa rira otjingundi rukwao, a panduka omuzandu, ne mu ruku Onan. 5Norukwao wa panduka omuzandu, ne mu ruku Sela; nu Juda wa ri mOkesib, omuzandu ngwi tja pandukwa.
6Juda arire tja pahere omuzandu we everi Er omukazendu; nena re ra ri Tamar. 7Nungwari Muhona ka ri nohange nourunde wa Er, everi ra Juda. Muhona ope mu zepera. 8Nu Juda arire tja tja ku Onan: “Karare pomuhepundu werumbi roye, yenenisa otjingura tjoye otja omuangu womurumendu we kutja erumbi roye a kare nozondekurona.” 9Nungwari Onan wa tjiwa kutja ovanatje kamaave rire ove, opuya zu okutjita kutja otjikando atjihe tja karara pomuhepundu werumbi re, a nyonene orukwato pehi kutja ape ha kara ozondekurona zerumbi re. 10Nu ihi tja tjita, Muhona we tji nyengwa, neye arire tje mu zepa rukwao. 11Juda arire tja tja komukwe we omusuko Tamar: “Yaruka konganda yaiho otja omuhepundu nga omuzandu wandje Sela tje kuru.” Eye wa tjita nai, tjinga a tira kutja omuzandu we Sela ngaa ṱu rukwao tjimuna omarumbi we. Tamar arire tja yaruka konganda ya ihe.
12Kombunda yoruveze rworive omukazendu wa Juda, ingwi omusuko wa Sua, wa koka. Nu Juda tja mana oruveze rwomutambo, eye nepanga re Hira wa Adulam va ya kOtimna, kovahore vozonḓu ze. 13Novandu arire tji va raere ku Tamar nave tja: “Tara, iho omukwe woye ma kapita kOtimna okukahora ozonḓu ze.” 14Neye arire tja hukura ozombanda ze zouhepundu ne rikutjire newiwiri, na kahaama pomuvero wa Enaim, otjihuro tji tja ri mondjira yokuyenda kOtimna. Eye wa tjiwa kutja Sela nai we kura; nungwari eye ngunda keya yandjewa ku ye morukupo.
15Nu Juda tja muna Tamar, arire tje ripura kutja ngahino omukazendu omukorondu, eye tjinga e rikutjire omurungu we. 16Neye arire tja kondo ku ye meṋe yondjira na tja: “Arikana, indjo mbi rare pove.” Orondu tjinga e ha tjivirwe kutja ingwi eye omusuko omukwe we.
Nomukazendu wa tja ku ye: “Mo ndji pe tjike tji wa rara pu ami?”
17Nu Juda a tja: “Ami me kekuhindira ongombona morupanda rwandje.”
Nomukazendu arire tja tja: “Osemba, nu ngunda amo ndji pe otjiṋa tjomoruveze, nga tji we kendjihindira indji ongombona.”
18Neye a pura nai: “Hi ku pe tjike tjomoruveze?”
Neye wa zira a tja: “Ndji pa okaṋa kena roye ku keri mosengo yoye, nokati okahoneno ku u na ko meke.” Neye we mu pa, ave rara pamwe, na rire otjingundi. 19Nu Tamar wa sekama na i, neye wa isa ko ewiwiri na zara ozombanda ze zouhepundu rukwao.
20Juda arire tja hindi ongombona puna epanga re, ingwi Omuadulam, kutja a kakotore ihi otjiyandjewa tji tja yandjwa moruveze komukazendu. Nungwari eye ke kemumunine. 21Neye wa pura kovandu votjirongo ho na tja: “Ingwi omukorondu ngwa ri pomuvero wa Enaim, u ri pi?”
Nowo ve mu zira ave tja: “Kape naa pa ri omukorondu mba.”
22Neye wa yaruka ku Juda na tja: “Ami hi kemumwine. Nu wina ovandu votjirongo ho mave tja: ‘Kape naa pa ri omukorondu mbo.’ ”
23Juda arire tja tja: “Eye nga ṱokukara na vyo, tjapo ovandu mave tu yoro. Tara, ami mba hindi ongombona ndji, nangarire tji u he kemumwine.”
24Kombunda yomieze vitatu Juda wa tjivisiwa nai: “Tamar, omukwe woye, wa katuka, neye otjingundi.”
Juda arire tja rakiza na tja: “Mu pitiseye nu mu kemunyose.”
25Nu Tamar tja pitisiwa pendje wa hinda embo komukwe we Juda na tja: “Ami mba yakanisiwa i omurumendu omuini woviṋa mbi. Tara nawa kutja okaṋa komosengo nena nongoze yako, nokati nga okahoneno ovyauṋe.”
26Juda arire tje vi zemburuka na tja: “Eye u ri osemba, ami owami ngu mba tataiza. Ami andakuzu mbe mu yandja komuzandu wandje Sela.” Nu Juda ka rarere pu ye rukwao.
27Nu Tamar tja ri pokupanduka, pa munika kutja u nepaha. 28Nu ngunda ama panduka, kemwe kaimbwi ounatje arire tji ka pitisa eke. Nomukazendu omupandukise arire tje ri kambura nakutuko orusepa oruserandu na tja: “Ingwi ongwa tenge po okupandukwa.” 29Nungwari oko ka yarura mo eke rako. Nu inga okangu kako arire tji ka tenge po okupandukwa. Nomukazendu omupandukise arire tja tja: “Nai ove we ripambururire ondjira yoye nomasa!” Noko opu ka rukirwa Peres, okutja “Mupambo”. 30Nu kombunda yanao okarumbi kako arire tji ka pandukwa norusepa oruserandu keke, noko ka rukwa Serak okutja “Kamuserandu”.
Currently Selected:
Genesis 38: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
