Genesis 44
44
Otjinwino tja Josef mekutu ra Benjamin
1Josef wa rakiza omukarere wondjuwo ye na tja: “Urisa omakutu wovarumendu mba novikurya otja pu mave sora okutjinda, nu twa ovimariva vyomurumendu auhe motjinyo tjekutu re. 2Nungwari otjinwino tjandje otjisilveri twa motjinyo tjekutu ra ingwi omuangu puna ovimariva vyovikokotwa vye.” Neye wa tjita otja pa raerwa i Josef. 3Omuhuka omunene tji pa tji, ovarumendu otji va isiwa okuyenda ondjira yawo nousino wawo. 4Nowo ngunda ave hiya kaseka okuza motjihuro, Josef arire tja tja komukarere wondjuwo ye: “Rirongera u tezere ovarumendu mbo. Nu tji we kevevaza itja nai: ‘Okutjavi tji mwa yarura ouvi mouwa? 5Okutjavi tji mwa vaka otjinwino otjisilveri tjomuhona wandje? Otjo otjinwino omuhona wandje me nwina, nu wina tje uka na tjo. Eṋe mwa tjiti navi.’ ”
6Nomukarere tje ve vaza wa hungira omambo tjingewo nga. 7Nowo ve mu zira nave tja: “Muhona, mo hee tjike tji mo hungire nai? Ovakarere voye kamaave ripura okutjita otjiṋa tji tja sana ngo. 8Nu tara, eṱe twa kotora ovimariva kove mbi twa muna momakutu wetu okuza kOkanaan. Nu matu vakere tjike osilveri poo ongoldo mondjuwo yomuhona woye? 9Tji pena umwe wovakarere voye ngwa vazewa na tjo, nga ṱe; nu eṱe imba ovarwe tu rire ovakarere vomuhona wetu.”
10Neye wa tja: “Osemba, ingwi ngwa vazewa na tjo ma rire omukarere wandje, nungwari imba ovarwe mave yaruka.” 11Owo arire tji va hakahana okuherura omakutu wawo pehi, nomurumendu auhe arire tja paturura ekutu re. 12Omukarere wa Josef arire tja paha nawa, a utire komunene na kasenina ku ingwi ongero; notjinwino tja vazewa mekutu ra Benjamin. 13Nowo arire tji va nyondorora ozombanda zawo, nauhe wa kutira okasino ke nave yaruka kotjihuro.
14Juda novangu ve tji ve ya mondjuwo ya Josef, eye tjandje ngunda ome ri. Narire tji va u kozongoro komurungu we. 15Nu Josef we ve pura a tja: “Otjiṋa hi tji mwa tjiti, otjikeṋa? Kamu tjivirwe kutja omurumendu otja ami owami ombuke are?”
16Juda wa zira na tja: “Eṱe ngatu tje vi kove, muhona? Ngatu hungire tjike? Nu ngatu rikohore vi oveni? Ndjambi wa raisa ondjo yetu. Eṱe na ingwi ngwa vazewa notjinwino atuhe oweṱe ovakarere voye.”
17Josef arire tja tja: “Kako! Ami hi nokutjita nao. Omundu ngwi ngwa vazewa na ihi otjinwino ongu ma rire omukarere wandje. Eṋe imba ovarwe yarukeye nohange ku iho.”
Juda me riyarikaṋene Benjamin
18Juda wa ryama popezu na Josef na tja: “Arikana, muhona, ndji yandjera okuhungira na ove nawa. O pindike na ami, muhona, ove tjinga au ṱeki pu Farao omuini. 19Muhona, ove we tu pura no tja: ‘Eṋe ingee mu na iho poo mu nomuangu weṋu?’ 20Neṱe twa zira nai komuhona wetu: ‘Eṱe tu natate ngwa kurupa, nomuangu wetu ngwa panduka moukurupe we. Nungwari erumbi re wa koka, neye ongwa hupa movanatje vaina; nu ihe otje mu suvera tjinene.’ 21Nungwari ove we tu raya no tja: ‘Mu eteye nguno, mbi mu mune.’ 22Nu eṱe twe ku zira, muhona, kutja omuzandu kamaa isa ihe; orondu tja tjiti nao, ihe ma koka. 23Ove o tja: ‘Eṋe kamu nakuyandjerwa okuya komurungu wandje tjinangara kamu eterere omuangu weṋu.’
24“Neṱe tji twa yaruka ku tate, omukarere woye, twe mu raera inga ngu wa hungira. 25Nu tate arire tja tja: ‘Yarukeye mu keturandere ovikurya ouṱiṱi.’ 26Neṱe twa zira natu tja: ‘Katu nakuyenda ngo; katu nakuyandjerwa okuya komurungu womurumendu ngo, ndovazu omuangu wetu ongero ke ri puna eṱe?’ 27Nu tate arire tja tja ku eṱe: ‘Eṋe mamu tjiwa kutja omukazendu wandje we ndji pandukira ovazandu vevari. 28Umwe wawo we ndji esa rukuru. Ami me tjangovasi wa nyondororwa i ovipuka vyokuti, orondu ami hi na pu mbe kemumuna rukwao. 29Neṋe nambano tji mwa toora ingwi rukwao pu ami na kaṱa, mamu pundisa ozonḓi zandje noruhoze meyendo.’
30“Nambano, muhona, ami tji mba yaruka ku tate nokuhina omuzandu ngwi, tjimanga eye tja munu kutja omuzandu puna ami ke po ma koka. Omutima we tjinga awe rihitisa momuzandu ngo. 31Neṱe, muhona, matu pendura oruhoze mu tate, ndu maru mu zepa motjiwondo tjoukurundu we. 32Wina, muhona, mba yandja omuinyo wandje ku tate mena romuzandu, tjinga ambe mu raera kutja ami tji mbi ha kotorere ingwi omuzandu, owami ngu me tjindi ondjo komurungu we oure womuinyo wandje. 33Nu nambano, muhona, ami me kara mba otja omukarere woye moruveze rwomuzandu; nungwari ingwi omuzandu mu esa a yaruke puna omarumbi we. 34Ami me sora vi okuyaruka ku tate tjinangara omuzandu ngo ke ri puna ami? Himee yenene okumuna oruhoze ndu maru ya kombanda ya tate.”
Currently Selected:
Genesis 44: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
