Genesis 45
45
Josef me rihangununa komarumbi we
1 #
Oviu 7:13
Josef kaa sora okuriṱiza orure komurungu wa imba, mba ri mbo; neye otja rakiza na tja: “Avehe ngave ze po pu ami!” Nu kapa ri omundu warwe, Josef tje rihangununa komarumbi we. 2Eye wa rira tjinene nga Ovaengipte tji va zuva, nombuze ndji ya kazuvaka kondjuwo youhona ya Farao. 3Josef wa tja komarumbi we: “Owami Josef. Tate ingee u nomuinyo?” Nungwari omarumbi we ve mu tira tjinene nga tji ve ha sorere okumuzira. 4Josef wa tja ku wo: “Arikaneye, ryameye popezu.” Nowo va ryama popezu, neye arire tja tja: “Owami Josef, omuangu weṋu, ngu mwa randisa kOengipte. 5Nungwari amu ṱoruhoze namu rihahiza oveni mena rokutja eṋe mwe ndji randisa nguno, nungwari Ndjambi we ndji hinda nguno komurungu weṋu okuyama ominyo omingi. 6Indji oyo ombura oitjavari yourumbu mehi, nu maku ya ozombura zarwe ndano mu mu hi nakukunwa nokukondwa. 7Ndjambi we ndji hinda komurungu weṋu kutja, tjiri, omuhoko weṋu u kare nozondekurona kombanda yehi. Ami mba hindirwa okumuyama nokumuhupisa mu rire otjimbumba otjinene. 8Tjiri, kaweṋe mbu mwe ndji hinda nguno, nungwari oNdjambi. Eye we ndji zika okurira omuyandjandunge wa Farao, notja omuhona wondjuwo ye aihe nomunane omunene wehi ra Engipte arihe.
9 #
Oviu 7:14
“Nambano hakahaneye mu yaruke ku tate nu mu kemuraere kutja omuzandu woye Josef ma tja nai: ‘Ndjambi we ndji tjita omuhona mehi ra Engipte arihe; indjo ku ami nokuhinakuwomba. 10Ove mo ya okutura mehi ra Gosen pu mo kara popezu na ami, ove novanatje voye, novanatje vovanatje voye, nozonyanda nozongombe zoye na avihe mbi u na vyo. 11Nu imbo opu me ku parurire, orondu ngunda pe nozombura ndano zourumbu, nami hi nokuvanga kutja ove nonganda yoye na avihe mbi u na vyo mu kare nouhepe!’
12“Nambano eṋe amuhe nomuangu wandje Benjamin mamu munu kutja, tjiri, owami ngu me hungire puna eṋe. 13Kaserekarereye tate ouvara auhe mbu mbi na wo mOengipte nga koviṋa avihe mbi mwa munu. Nu hakahaneye okukaeta tate nguno.”
14Neye arire tje rimanga mosengo ya Benjamin na utu okurira; Benjamin wina aa riri ngunda e rimanga mosengo ya Josef. 15Tjazumba wa hupita imba omarumbi we avehe na riri ngunda ame rimanga mozosengo zawo. Okuzambo omarumbi we opu va utira okuhungira na ye.
16Nombuze ndji tji ya zuvaka mondjuwo ya Farao kutja omarumbi wa Josef ve ya, Farao novakarere ve arire tji va yoroka. 17Farao arire tja tja ku Josef: “Raera komarumbi woye ve kutire ovikutirwa vyawo nu ve yaruke kOkanaan. 18Owo ngave kapahe ihe nomaṱunḓu wawo, nu ve ye ku ami. Ami meve pe ehi ewa mOengipte, nowo mave ri ovihape oviwa vyehi. 19Ove nambano ve raera nai: Twaerereye omatemba okuza mOengipte okukaturika mo ovakazendu veṋu nounatje ouṱiṱi, nu katooreye iho nu mu ye nguno. 20Amu rikende okuisa ouini weṋu; orondu ehi, ndi ri ewa tjinene mOengipte, ondi mari rire oreṋu.”
21Novazandu va Israel va tjita nao. Josef we ve pa omatemba otja Farao pa rakiza, ne ve pe ovikurya mbi mave ri mondjira. 22Nu tjazumba eye wa yandja ku auhe ozombanda ozombe, nungwari ku Benjamin wa yandja ovisilveri omasere yetatu nozombanda ozombe ndano. 23Nu ku ihe wa hinda ousino omurongo mbwa kutirwa oviṋa vya Engipte, imbi oviwaviwa, nousino ouzenḓu omurongo mbwa kutirwa ovikokotwa, nozomboroto novikurya vyarwe vya ihe mbi maenda ma ri mondjira. 24Neye arire tja hindi omarumbi we ve yende; nu tji va ri pokuyenda, arire tja tja ku wo: “Amu patasana mondjira.”
25Nowo va za mOengipte nave ya kOkanaan ku ihe Jakob. 26Nowo arire tji ve mu serekarere avihe nave tja: “Josef ingee u nomuinyo! Eye onguri omunane omunene mehi ra Engipte arihe.” Nungwari Jakob wa kumwa, nu kaa sora okukambura mu wo.
27Nu tji ve mu serekarerera omambo aehe wa Josef nge ve raera, na munu omatemba, nga hindwa i Josef okumutwara kOengipte, arire tja yoroka mombepo, 28na tja: “Nambano opuwo; omuzandu wandje Josef ingee u nomuinyo! Ami me i mbi kemumune ngunda ambi hiya koka.”
Currently Selected:
Genesis 45: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.
