Johanes 21

Jesus me riraisa kovahongewa hambombari

1Kombunda yoviṋa mbi Jesus we riraisire rukwao kovahongewa ve pOmuronga wa Tiberias. Nu we riraisire nai: 2Avehe kumwe mba woronganene va ri Simon Petrus na Tomas, ngu ku za oDidimus, na Natanael, ngwa zire kOkana mOgalilea, novazandu va Sebedeus, novahongewa ovakwao vevari va Jesus. 3#Lk 5:5Simon Petrus arire tja tja kovakwao: “Ami me kapata ozohi.”

Owo ave tja ku ye: “Eṱe wina matu i puna ove.” Owo arire tji va i mokayaha, nungwari ouṱuku auhe mbo kave patere otjiṋa. 4Nomuhuka tji pa tji, Jesus wa kuramene pomukuro, nungwari imba ovahongewa kave tjivirwe kutja eye oJesus. 5Jesus arire tje ve pura a tja: “Varumendu, eṋe kamuya pata otjiṋa okurya are?”

Owo ave ziri ave tja: “Kako.”

6 # Lk 5:6 Eye wa tjere ku wo: “Yumbeye onete yeṋu kokunene kokayaha, nu mamu pata otjiṋa.” Owo arire tji va yumbu indji onete, nu kave sorere okuinanena mokayaha, tjinga ava patere ozohi ozengi tjinene.

7Omuhongewa ngwi ngwa suvererwe i Jesus wa tjere ku Petrus: “Eye oMuhona!” Petrus tja zuvire kutja eye oMuhona otje manga mombanda ye yokombanda, orondu eye wa ri mutundu, narire tja rurumine momeva. 8Ovahongewa ovakwao ve ere komukuro mokayaha amave nana indji onete ndje urire nozohi. Owo kave ri kokure nehi, va ri ozometa mangara esere rimwe uriri. 9Nu tji va rondere komukuro arire tji va munu omakara ngu maye yaka nu ku ku nohi, nomboroto wina. 10Jesus a tja ku wo: “Eteye ozohi tjiva nḓu mwa pata.”

11Nu Simon Petrus a rondo mokayaha na kanana onete ndje urire nozohi ozonene esere rimwe nomirongo vitano nandatu; nu nandarire kutja za ri ozengi tjinene nai indji onete kai taukire ko. 12Jesus wa tjere ku wo: “Indjeye mu rye.” Nu kapa ri omuhongewa nangarire umwe ngwa rorere okumupura: “Oove aṋi?” Orondu tjinga aave tjiwa kutja eye oMuhona. 13Okuzambo Jesus weya, a toora omboroto nohi ne ve pe.

14Nu ihi tja ri otjikando otjitjatatu Jesus tje riraisire kovahongewa ve indu tja za nokupenduka movakoke.

Jesus na Petrus

15Nu tji va zire nokurya Jesus wa tjere ku Simon Petrus: “Simon, muatje wa Johanes, ove we ndji suvera tjinene okukapita ovakweṋu mba?”

Eye a ziri a tja: “Ii, Muhona, mo tjiwa kutja mbe ku suvera.”

Jesus a tja ku ye: “Risa ozondjona zandje.” 16Nu Jesus wa tjere ku ye porutjavari: “Simon, muatje wa Johanes, ove we ndji suvera?”

Eye a ziri a tja: “Ii Muhona, mo tjiwa kutja mbe Ku suvera.”

Jesus a tja ku ye: “Risa ozonḓu zandje.” 17Jesus arire tja tja ku ye porutjatatu: “Simon, muatje wa Johanes, ove we ndji suvera?”

Petrus wa ṱoruhoze, Jesus tjinga e mu pura porutjatatu ama tja: “Ove we ndji suvera?” Nopa tjera ku ye: “Muhona, mo tjiwa oviṋa avihe; mo tjiwa wina kutja mbe ku suvera!”

Jesus a tja ku ye: “Risa ozonḓu zandje. 18Tjiri, tjiri, ami me ku raere, tji wa ri omutanda ove iyo rirongerere okuyenda ngamwa akuhe kuyo vanga, nungwari tji wa kurupa mo roporora omaoko woye, nomundu warwe me ku kutu ne ku twara ngamwa akuhe ku u hi nokuvanga okuyenda.” 19Nu mokuhungira omambo nga Jesus aa hee omuhingo Petrus mbu ma ṱu okuyozika Ndjambi. Okuzambo Jesus arire tja tja: “Ndji kongorera!”

Jesus novahongewa imba ovakwao

20 # Jhn 13:25 Petrus we rivingurura na munu omuhongewa omukwao kongotwe ye, ingwi ngwa suvererwe i Jesus, nu pomariro ngwe ripeterere ku Jesus na pura a tja: “Muhona, owaṋi ngu me ku horora movineya?” 21Nu Petrus tje mu munine wa purire Jesus a tja: “Muhona, nu ingwi omukwetu ma tjitwa vi?”

22Jesus arire tje mu ziri a tja: “Tji mba vanga kutja eye a kare nomuinyo nga tji mee ya rukwao, ove u na ko na tjike? Ove ndji kongorera ingwi okundjikongorera!”

23Notji mwa handjauka ombuze mokati kovakongorere va Jesus yokutja omuhongewa ngwi ke nokuṱa. Nungwari Jesus ka hungirire ku Petrus kutja Johanes ke nokuṱa. Eye wa tja: “Tji mba vanga kutja eye a kare nomuinyo nga tji mee ya rukwao, ove u na ko na tjike?”

24Eye onguri omuhongewa ngwi ngwa hongonona oviṋa mbi avihe, nu wina ngwe vi tjanga; neṱe matu tjiwa kutja omahongoneno we ouatjiri.

25Pe noviṋa ovingi ovikwao Jesus mbya tjitire. Andakuzu avihe vya tjangwa kotjimwetjimwe, me tjangovasi ouye auhe katjau kara noruveze okuṱiza omambo ngatjaye tjangwa.

Currently Selected:

Johanes 21: HRR-UNI

Highlight

Copy