Npfong 7
7
Ba̱ryat Istifanut
1A̱gba̱dang gado Ka̱za nu a̱ zzim Istifanut a̱ hywa da̱ nu, “Ba̱ryat iya a̱ yet ka̱ryong o?”
2Istifanut a̱ hywa, “Ba̱wumbeyang nzuk bu ba̱tyyi nzuk, yi yrang a̱pfo i hok ansham! Ka̱za bu ka̱sham dityok nka a̱ yin nyyai a̱ ba da̱ a̱tyyi njit Ibrahim na̱ ri shyi i ka̱byen Mesofotamiya a̱ si wa bvwa a̱n nat ka̱nkrang Haran; 3a̱ bu hywa da̱ nu, ‘Wwon ka̱ryi nwan ka bu ka̱byen nwan ka i nat ka̱byen ka n ni na̱ tyyei ni an swrang.’ 4Na̱ wwon ka̱byen Kaldiya a̱ nat swat a Haran. A̱tyyi Ibrahim u na̱ bu kwu Ka̱za a̱ tyyi na̱ drok a̱ bu swrang i ka̱byen ka yin swat ka̱pfun ni. 5Ma ka̱ram iya Ka̱za ka ka̱n ku nang ka̱bvwa ka ka yet ka̱nu ba, ko sekhat tak, seko a̱ rop ba̱ nu a̱ ni ku nang ka̱byen ka bu na̱won nu na. Ka̱ram ka Ka̱za kan dop ba̱ryat bani ba̱ nu ni Ibrahim na̱ ka̱n byyi ka̱won ba. 6Ka̱za a̱ hywa da̱ nu, ‘Na̱mbvon nwan a̱ ni swat i ka̱byen ka̱yaan a̱ sswa ka̱bvung dikwwa hat a̱rya ncyi nyaai.’ 7Ma Ka̱za a̱ bo hywa da̱ nu, ‘N ni yya ba̱nyet ba a̱ ba̱ tyyi dikwwa ti ni shirya, a̱wwon ba si wruk ka̱byen iya a̱ ba bu n yya sujada ka̱rek kani.’ 8Ka̱za a̱ tyyei Ibrahim kyang a ni yet shaida nkyang a ka rop ba̱ nu ni nkpa yet kozan ka̱won ka̱seyang ba ni ka̱ tyyi ncen. Rot a̱mi Ibrahim a̱ tyyi Ishaku ncen ka̱tuk nom a̱naimbvak, Ishaku a̱ ma̱n tyyi Yakubu ncen, Yakubu a̱ tyei na̱won swak bu na̱hwa na a̱ yet ba̱kukwo ba̱tyyi njit ba ni a̱ ba̱ tyei ncen.
9“Ba̱wumbeyang Yusufu ba a̱ hok swam nu, a̱ ku ryap na̱ si yya dikwwa i ka̱byen Masar; ma Ka̱za a̱ shyi ba̱ nu; 10kozan ka̱bvung na̱ si nwa Ka̱za ka ku tot. Ka̱ram ka Yusufu na̱ sin sseng a̱ta̱ssi Fir'auna a̱gwam Masar i, Ka̱za a̱ tyyi Fir'auna a̱ hok shok nu, Ka̱za a̱ bo wrak Yusufu a̱za̱ncyi. Fir'auna a̱ sook Yusufu na̱ yet waziri ka̱byen Masar sa̱rei a̱ bo ku tyyi ka̱ryi nu ka mbvak nu. 11Cihywat i bu kpa sa̱rei ka̱byen Kan'ana bu Masar, ba̱nyet ba̱gingang a̱ sswa ka̱bvung. Ba̱tyyi njit ba a̱ ryin kyang a ba ni ya ni. 12To, ka̱ram ka Yakubu na̱n hok di yak shyi Masar ni, na̱ tun ba̱hwai nu ba a̱ tom, nkpa yin yet ka̱tsitsrang nat mba Masar. 13Nat a̱mba̱hwa mba na, Yusufu a̱ si-si ya tyyang da̱ mba ba si ku ryi a̱ bvwong; Fir'auna a̱ si ma̱n hok nkhang ba̱tyyi Yusufu na. 14Yusufu a̱ tom ba si tyyei a̱tyyi nu nu Yakubu bu ba̱nyet ka̱ryi nu ba sa̱rei ba ba Masar; sa̱rei mba ba yin shyi nswak a̱tiyring ba̱ pfon. 15Yakubu a̱ drok a̱ nat Masar; ka̱ yemi, nu bu sa̱rei ba̱tyyi njit ba ba sin kwi. 16Ba brek bu nkom mba na a̱ bu nyyak Shakima i ryak a Ibrahim na̱ yin san di na̱won Hamor a̱ tan ni.
17“Ka̱ram ka Ka̱za ka yin dyat a̱ sak bu Ibrahim ni ka bu ba shishrek, ka̱ram iya ba̱nyet njit ba a̱ shyi Masar ka ni ba ka̱n tyyi ka̱tswa. 18To, ka̱ram iya a̱yanyet u na̱ bvwo Yusufu ni ba a̱ sook dityok Masar ti. 19Na̱ nwa yya di ba̱nyet njit ba a̱ ba̱ jyet ka̱bvung; a̱ sin ba̱ bvwo breng na̱won mba na, na ga kwi. 20Ka̱ram iya a̱mi ba yin byin Musa, na̱ yet ka̱sham ka̱won. Ba ku breng ka̱yat a̱nyyi a̱n yya hywan tat. 21Ka̱ram ka ban wruk ba̱ nu ni ka̱won ka̱neyang Fir'auna a̱ ku sook a̱n yya ka̱won nka. 22Ba ku zzek sa̱rei a̱za̱ncyi ba̱nyet Masar a, na̱ rai a̱ bvwo yya nkyang ba̱t a̱ bo bvwo ba̱ryat.
23“Musa na̱ bu tat a̱rya nswak naai a̱ hwa nat cyang ba̱wumbeyang nu ba na̱won Isreila. 24A̱ si shya a̱tuba a̱yring mba a̱ntyok Masar na̱ yya da̱ nu; na̱ ku brang a̱ hywat a̱ntyok Masar u. 25(Na̱ hwa di ba̱nyet nu ba a̱ ni ryi a̱ bvwong ka̱sak ka Ka̱za ka nin ku tom na̱ bu ba̱ san a̱ wwon ni; ma ba ryi a̱ bvwong ba.) 26Ka̱ntson a̱ wo tat na̱ shya ba̱ntyok Isreila ba̱ mba ba̱hwa ba kwan. Na̱ nat ba̱ keyak a̱ bo cat a̱ ba̱ mon, a̱ si hywa da̱ mba, ‘Ba̱wumbeyang! Yi bvwo yi yet ba̱wumbeyang baa? A̱nzan a̱n byyi yin yya di ba̱yaan?’ 27Ma a̱tuba nu a̱ yet a̱ntyok ncet u ni a̱ yrik Musa a̱zi gak, a̱ hywa da̱ nu, ‘A̱nyan a̱ na̱ kup dityok ti a̱ bo na̱ tyyi yya shirya tazwa njit? 28A cat n hywat da̱ni di a kun hywat a̱ntyok Masar u ryu ka ni e?’ 29Musa na̱ bu hok a̱mi, a̱ tyong a̱ wruk i ka̱byen Masar ka a̱ nat a̱ si yet a̱yecen i ka̱byen Midia. Ka̱ yemi na̱ sin byin na̱won na̱hwa.
30“Ba bu yya a̱rya nswak naai, a̱pfong Ka̱za a̱ nyyai a̱ ba da̱ nu ka̱yat diryem ndong ti ya ka̱hwwong ka̱yat ka̱yit, a̱mbeyang dihwan Sanai. 31Musa a̱ ryi a̱ yya ka̱hat a̱ shek a̱ nat shishrek a̱ ga ryi ansham; a̱ hok diwan A̱gwam Tazwa ti hywa da̱ nu, 32‘Nzuk a̱mi Ka̱za ba̱tyyi nwan Ibrahim bu Ishaku bu Yakubu.’ Ka̱wun a̱ pyyem Musa na̱ muk a̱ssi nu na. 33A̱gwam Tazwa a̱ hywa da̱ nu, ‘Tun a̱kpatak nwan na; ka̱rek ka an sseng ni a̱ yet a̱zizrak ka̱rek. 34N dyi ka̱sak ka ba̱nyet Masar ban yya di ba̱nyet nzuk ba ni. N dyi na̱kpot a ba ba̱ yya mi ni. N hok ka̱nak mba ka n kyrek n ba ba̱ san. Ba, n ni na̱ tom Masar.’ ”
35Istifanut a̱ ya ka̱son a̱ hywa, “Musa nu na̱won Isreila ba ka̱n dak ni, nu a̱mi ba zzim a̱ hywa, ‘A̱nyan a̱ na̱ kup dityok njit ti a̱ bo na̱ tyyi za yya shirya ji?’ Nu a̱mi Ka̱za ka brek a̱ ba̱ tom i na̱ si ba̱ san a̱ bo ba̱ breng. Ka̱za a̱ yin dyat ba̱ nu an bvak a̱pfong Ka̱za diryem ndong ti ya ka̱hwwong. 36Nu a̱mi a̱ wruk bu ba̱nyet ba nyyai Masar, a̱ yya nkyang ka̱hat bu nkyang ka̱wun ka̱yat Masar ka ba̱ a̱mbeyang A̱shong Kei a̱ bvon sook kei a ba̱ mba a̱rya nswak naai. 37Musa a̱mi a̱ yin hywa di ba̱nyet Isreila ba, ‘Ka̱za a̱ ni ya tom da̱ a̱ntyok tyyei ba̱ryat nka a̱yaan da̱ni di ka nin tom ni. A̱ntyok a̱ywu a̱ ni wruk bu ka̱yat nyin.’ 38Musa a̱ yin shyi bu na̱won Isreila na a̱ yin tung ka̱yat ka̱yit ka ni. A̱ yin shyi bu ba̱tyyi njit ba a̱ bo shyi bu a̱pfong Ka̱za nu a̱ yin dyat ba̱ nu tazwa dihwan Sanai ka ni. Na̱ san ba̱ryat Ka̱za ba a̱ byyi sucet i a̱ za ryi.
39“Ma ba̱kukwo ba̱tyyi njit ba a̱ rak ku hok a, a̱ ku jik a̱ sak zan a̱ kun ba brek ba̱ mba a̱ bo nat i Masar. 40Rot a̱mi ba hywa di Haruna, ‘Za yya na̱za na̱yaan na za kwwat ka̱son; ma a ryi Musa a̱ywu a̱ wruk ba̱ njit nyyai Masar ka ni, zi bvwo kyang a ku tyyi ni ba.’ 41Ka̱ram iya a̱mi ban yya ma̱nwwuk ka̱won nyak, a̱ ka̱ hyum ba̱hyum a̱ song kyang a ba yya ni a̱swa da̱ni di Ka̱za ni. 42Rot a̱mi Ka̱za a̱ jik a̱ ba̱ wwon a̱ ba̱ yrik a̱ ta ba nat a̱ si tssup na̱ta̱ngwat tazwa da̱ni ba yin jem i kpa ba̱nyet tyyei ba̱ryat Ka̱za na ni, a̱ hywa,
‘Nyin na̱won Isreila,
nzuk a̱mi yi yin hwak nkyang ba̱hyum a ba
ka̱ram ka yin shyi ka̱yit a̱rya nswak naai ni.
43Tenti ka̱za Molok a̱mi yi yin ccok
bu ma̱nwwuk ka̱ta̱ngwat ka̱za nyin Refan;
nyin di bvak nyin yin yya nkyang ani i bu na̱ kok ntong.
Rot a̱mi n ni ya nyying yi si seyak Babila.’
44“Ba̱kukwo ba̱tyyi njit ba a̱ yin shyi bu tenti na Ka̱za ka yin shyi ba̱ mba ka̱yat ka̱yit ka ni. Ka̱za a̱ yin tyyei Musa ka̱sak ka na̱ nin kpo yya ni a̱ bo ku ryi ka̱mak ka. 45Ba̱kukwo ba̱nyet njit ba a̱ ba riryim mba ni a̱ ma̱ bu san tenti na di ba̱tyyi mba ba, a̱ breng a̱ nat ka̱ram ka ban cong bu Jeshua ni, a̱ ssang na̱byen na di nwap a Ka̱za ka yin nyying assi mba ni. Tenti na i swat ka̱ yemi bu tat ka̱ram Dawuda. 46Ka̱za a̱ hok ansham nu. Na̱ naai Ka̱za a̱ ku wwon na̱ nok Ka̱za Yakubu ka ka̱ryi ka̱tung. 47Ma Solomon, ka̱won Dawuda, nu a̱mi a̱ bu ka̱ nok ka̱ryi ka.
48“Ma, Ka̱za A̱gba̱dang A̱gwam njit u a̱ swat i na̱sa na ba̱nyet ba nok i ba, da̱ a̱ntyok tyyei ba̱ryat Ka̱za nu na̱ yin hywa ni,
49‘Ka̱za a̱ hywa, Tazwa nji yet a̱kprok dityok nzuk,
ka̱sa ka a̱ yet ka̱rek saai a̱nyan a̱byen nzuk.
A̱nzan taka̱i ka̱ryi a nin n nok i?
Ke a̱ yet ka̱rek pfwi nzuk ka?
50Nzuk a̱mi n yya nkyang ani sa̱rei baa?’
51“Yi tyyi kpa̱u swrang! Ndya nyin na bu bvwo Ka̱za ba! Yi hweyak a̱pfo nyin na i rak hok ba̱ryat Ka̱za! Yi shyak bu ba̱tyyi nyin ba ba! Nyin meyang yi rak Tswa Ka̱za! 52A̱nzan a̱ntyok tyyei ba̱ryat Ka̱za ba̱tyyi nyin ba ba wi yya da̱ nu? Sa̱rei ba̱nyet ba a̱ yin tyyei ba̱ryat Ka̱za ba ni nyyai gba̱gbang bu bai a̱zizrak a̱kwwa Ka̱za na. A̱kwwa Ka̱za nu na̱ ba, yi bu ku pyyem wrak ba hywat. 53Nyin a̱mi yin san Truwang Ka̱za ji ba̱pfong Ka̱za ba ba yin wrak ni, ma yi za̱ tssup ba!”
Ba mang Istifanut a̱ hywat
54Ka̱ram ka ba̱nyet Ka̱tung ba ban hok ba̱ryat Istifanut ba ni, ba hok diryen a̱ nwa rywei a̱nyyi rot diryen ti ba hok i. 55Tswa Ka̱za i nwa Istifanut na̱ yrek a̱ssi a̱ cyang Tazwa a̱ ryi ka̱bvwa dityok Ka̱za bu Yesu na̱ sseng mbvuk yak Ka̱za. 56Na̱ hywa, “Yi cyang, n dyi Tazwa zi yrang bu Ka̱won A̱neywu ka sseng mbvuk yak Ka̱za.”
57Ba krok nkun ba̱ ntazwa a̱ muk a̱pfo mba na di mbvak a̱ ta̱za a̱ si ku kup. 58A̱ ku kwak a̱ nat ba̱ nu a̱ma ka̱nkrang, a̱ si ku mang di kpang, ba̱nyet ba a̱ yet shaida ji ni a̱ wwon ba̱tro mba ba an bvak ka̱seyang ka̱yaan ba yin yei Shawulu. 59Ba ku mang na̱ yei diyrek A̱gwam Yesu, “A̱gwam Yesu, san tswa nzuk ji!” 60Na̱ ta̱gbok a̱ yrek diwan nu ti ba̱ ntazwa a̱ hywa, “A̱gwam Yesu, ryok wwon a̱ka̱tukyya ani na swrang a̱za̱ mba ba.” Na̱ bu hywa a̱mi a̱ kwu.
Currently Selected:
Npfong 7: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
