Yohana 11

Dikwu Lazarut

1A̱yanyet a̱ yin shyi Baitanya a̱ yya hywu, ba ku yei Lazarut. Ka̱bankrang ka ba̱nyet Maryamu ba̱ a̱wumba nu Martsa ba yin shyi ni. 2(Maryamu a̱ni a̱mi a̱ yin ba bu ba̱myyi ba a̱ bu krok Yesu mi a a̱tak nu na, a̱ tyyi a̱cat diccu nu na a̱n dyang. Lazarut nu a̱ yin yya hywu na ni a̱ yin yet a̱wumba nu). 3Ba̱nap ba a̱ tom pfong di Yesu a̱ hywa, “A̱ntyok ka̱ryi! A̱rywai nwan nu an byyi rya ni a̱ shyi an hywu.”

4Ka̱ram ka Yesu na̱n hok ni a̱ hywa, “Hywu na ni yet nying dikwu ba, seko ban tyyei shii Ka̱za; nkpa bu ni yet hywak a Ka̱won Ka̱za ka nin shya shii ni.”

5Yesu a̱ yin gwai Martsa bu a̱wumba nu bu Lazarut. 6Ma ka̱ram ka na̱n hok nkhang hywu Lazarut na a̱ bo yen swat ka̱ yemi a̱ bvwa a̱ngbrak a̱hwa. 7A̱ si hywa di ba̱pfong nu ba, “Yi ba zi brek nat Yahudiya.”

8Na̱won pfong nu na a̱ hywa, “Ka̱t, Malam, ka̱baram a̱ ka̱n ri-ra ba ba̱nyet Yahuda na ban cat na̱ mang di kpang ji, nwan ba bu cat brek nat ka̱ yemi e?”

9Yesu a̱ hywa, “Ka̱ta̱nom a̱ byyi awa swak bu hwa ka̱ni? Ka̱ a̱yin a̱ cong ka̱ram iya, a̱ na ya zzu tak ba, rot a̱ cyang ka̱bvwa sai ka̱sa kani. 10Ma ka̱ cong a̱ta̱tuk a̱ ni ya zzu tak, rot ka̱bvwa ka a̱ ku ryi ba̱ gbyik.” 11Yesu na̱ bu hywa a̱mi a̱ si bo hywa, “A̱rywai njit Lazarut a̱ shyi nda, ma n naat n si ku shyek.”

12Na̱won pfong nu na a̱ hywa, “A̱ntyok ka̱ryi!, ka̱ a̱ shyi nda, a̱ ni creng.”

13Yesu a̱ yin cat ba̱ tyyei Lazarut a̱ kwu, ma na̱won pfong a a̱ hwa da̱ shyi a nda ka̱ryong a. 14Yesu a̱ si ba̱ tyyei ba̱zizrak a̱ hywa, “Lazarut a̱ kwu; 15ma n gwai n ni srang ka̱rek ka a̱zi hywak nyin, yi gi wrak ndya nyin na. Ma zi cong nat da̱ nu.”

16Toma nu ban yei Ka̱hywaai ka ni a̱ hywa di kpikpit na̱won pfong a, “Yi ta̱za zi nat bu Malam i gi si kwi ba̱ nu.”

Yesu a̱mi a̱ yet cet ta̱za ba̱nyet a a̱ ka̱n kwi ni a̱ bo ba̱ jyet sucet

17Ka̱ram ka Yesu na̱ si nwa ka̱ yemi ni a̱ shya Lazarut na̱ ka̱n yya nom naai ka̱yat ryak ka. 18Nyyai Baitanya nat Urushalima a̱ tat a̱mel a̱hwa ba; 19ba̱nyet Yahuda na i gbit ba̱gingang ba byyek Maryamu bu Martsa dikwu a̱wumba mba ti.

20Martsa a̱ hok di Yesu a̱ yemi a̱ bai, a̱ drok a̱ nat myim ba̱ nu. Maryamu a̱ swrang ka̱ryi. 21Martsa a̱ si hywa di Yesu, “A̱ntyok ka̱ryi, a da nshyi kyi, se a̱wumba nzuk u na̱ kwu ba. 22Ma n bvwo ko ba̱nyying ma kyang a a naai Ka̱za ni ka ni na̱ ryi da̱ nkpa.”

23Yesu a̱ hywa, “A̱wumba nwan nu a̱ ni ta̱za.”

24Martsa a̱ hywa, “N bvwo a̱ ni ta̱za ka̱tuk a̱ngbom nom ka.”

25Yesu a̱ hywa da̱ nu, “Nzuk n yet cet ta̱za ba̱nyet ba a̱ ka̱n kwi ni n bo ba̱ jyet sucet. A̱yin nu a̱ n san a̱ tyyi i rya nu ni, ko a̱ kwu a̱ shyi bu sucet. 26Ka̱ a̱yin nu a̱ ma̱ ri swat a̱cet a̱ n san a̱ tyyi i rya nu na, a̱ bo byyi dikwu ba. A shim o?”

27Na̱ hywa, “Ee, A̱ntyok Ka̱ryi, n bvwo a̱mi; n bvwo nwan yet Ka̱won Ka̱za bu Kristi nu, a̱tuba nu a̱ ni ba i ka̱sa ka ni.”

Yesu a̱ kun

28Martsa a̱ si brek a̱ si yei a̱wumba nu nu Maryamu a̱zi gak a̱ hywa da̱ nu, “Malam a̱ ba, a̱ shyi na̱ zzim.” 29Maryamu na̱ bu hok a̱mi a̱ ta̱za ba ahwa a̱ wruk a̱ nat myim bu Yesu. 30(Ka̱ram iya Yesu na̱ ka̱n nwa ka̱yat ka̱nkrang ka ba, na̱ ri shyi ka̱rek ka Martsa na̱ sin myim ba̱ nu ni). 31Ka̱ram ka ba̱nyet Yahuda na shyi ka̱ yemi ni nat ba̱ byyek a ni ban dyi Maryamu na̱ ta̱za ba ahwa a̱ wruk, ban ye a̱ naat ka̱rek dibyyi ka a̱ si kun. Ba ta̱za a̱ ku tssup.

32Ka̱ram ka Maryamu na̱ sin shya Yesu ni a̱ ta̱gbok a a̱tak nu na a̱ hywa, “A̱ntyok ka̱ryi, a da n shyi se a̱wumba nzuk u a̱ kwu ba.”

33Yesu a̱ ryi na̱ kun, sa̱rei ba̱nyet Yahuda na yin shyi ba̱ nu ni ba ma̱ kun, rya nu na ta̱kyem na̱ hok dizot mba. 34Na̱ hywa da̱ mba, “Yi ku nyat ke?”

Ba hywa, “Ba i ryi, A̱ntyok Ka̱ryi.”

35Yesu a̱ kun. 36Ba̱nyet Yahuda na i hywa, “Yi cyang taka̱i cat a̱yin ani!”

37Ma ba̱yanyet a̱ hywa, “Anye nu a̱ yrang a̱ssi a̱ntyok a̱tutwan naa? A̱nzan a̱n byyi na̱ wi nbvwo Lazarut dikwu ti?”

Yesu a̱ yrek Lazarut i ryak

38Rya Yesu na i bu ta̱kyem, na̱ drok a̱ nat ba̱ mba i dibyyi ti. Dibyyi ti yin yet ka̱ta̱hwa nkpang ba ta̱ kup di kpang zaan. 39Yesu a̱ hywa “Yi kruk kpang ji.”

Martsa a̱wumba a̱yin nu a̱ kwu ni a̱ hywa, “A̱ntyok ka̱ryi, a̱ ni tyyi a̱ka̱tuk swam, rot nom naai nnani nyyai ban ku nyat.”

40Yesu a̱ hywa, “N ka̱ na̱ tyyei ka an tyyi rya a ni ryi shii Ka̱za na, ka̱ni?” 41Ba kruk kpang ji, Yesu a̱ yrek a̱ssi nu na tazwa a̱ hywa, “A̱tyyi, n dyep ba̱gingang ka̱sak ka a ni n hok ni. 42N bvwo kozan ka̱ram a n pfong, ma n hywa a̱mi rot ba̱nyet ba a̱ shyi kyi ni a̱ ga shim nwan a̱mi n tom.” 43Na̱ bu tyak a̱ yrek diwan nu ti tazwa a̱ hywa, “Lazarut, wruk!” 44A̱ntyen a̱ywu a̱ kwu ni a̱ wruk i ryak a bu mbvak a ba̱ a̱tak a ba gat da̱ a̱tro nyyak ba̱nyet u. Sa̱rei ba̱ a̱ssi nu na ba rop. Yesu a̱ hywa da̱ mba, “Yi ku byyik na̱ nat.”

Ba nwa bang Yesu

(Matta 26:1-5; Markut 14:1-2; Luka 22:1-2)

45Ba̱nyet Yahuda na ba̱gingang ba ba byyek ba̱nyet Maryamu ni i bu ryi kyang a Yesu na̱ yya ni ba̱yanyet a̱ ku san di ndya mba na. 46Ma ba̱yanyet a̱ brek a̱ nat di ba̱nyet Farisa na a̱ si ba̱ tyyei kyang a Yesu na̱ yya ni. 47Ba̱nyet Farisa na bu ba̱cecet ba̱gado Ka̱za ba i yei ka̱tung a̱ hywa, “Zi ni yi-yya na ni bu ntaka̱i nkyang ka̱hat nani a̱yin a̱ni na̱ yi-yya na ni ni? 48Ki zi ku wwon na̱ ya ka̱son, ba̱nyet ba sa̱rei a̱ ni ku tssup, a̱wwon ba̱nyet Rom a̱ ta̱kyem a̱ bu za hwwei bat Ka̱za na bu ba̱nyet njit ba.”

49A̱yanyet a̱ yin shyi ba̱ mba ban yei Kayafat, nu a̱ yin yet a̱gba̱dang gado Ka̱za nu i dirya iya, a̱ hywa, “Nyin yi bvwo kyang ba, ko ba̱cincong! 50Yi si wu bvwo di ku myim a̱tuba a̱yring a̱ kwu kpikpit ba̱nyet a sa̱rei i gi kaat o?” 51Nu ma a̱ hywa ba̱ryat bani di bvwo nu ba, seko nu a̱ yin yet a̱gba̱dang gado Ka̱za a̱nying dirya a̱ywu, Ka̱za a̱ ku tyyi ba̱ryat iya ka̱nu. A̱ yin tyyei ka̱sak ka Yesu na̱ nin kwu a̱ ga san ba̱nyet Yahuda na ni. 52Kuma ba ba̱ mba ba, ma a̱ ga tung sa̱rei na̱won Ka̱za na a̱ wop i a̱ tyyi ka̱rek ka̱yring.

53Nyyai ka̱tuk iya ba̱cecet ba̱nyet Yahuda ba a̱ nwa cat ryen na ba nin hywat Yesu ni. 54Rot a̱mi Yesu a̱ bo cong a̱za̱kpai i ka̱byen Yahudiya ka ba, a̱ drok a̱ nat ka̱bvwa ka̱yaan shishrek bu ka̱yit a̱ si swat i ka̱nkrang ka̱yaan ban yei Ifraimu, bu ba̱pfong nu ba.

55Ka̱ram a̱swa Swrap wwon ka a̱ bu krang a̱ ba, ba̱nyet ba̱gingang a̱ wwut nyyai i na̱bvwa ba̱gingang a̱ ba Urushalima a̱ ga bu yya tada ya tssu ji, a̱n tot a̱swa nu. 56Ba shyi i cat Yesu, a̱ tung ka̱yat bat Ka̱za ka a̱ ya zzim, “Yi wu ryi ni? Yi hwa di a̱ ni ba a̱swa nu o?” 57Ba̱nyet Farisa na bu ba̱cecet ba̱gado Ka̱za ba ba ka̱n tyyei da̱ a̱yin nu a̱ ryi Yesu ni na̱ ba̱ tyyei ba ga ku pyyem.

Currently Selected:

Yohana 11: kaj

Highlight

Copy