ŋɩru ŋun ŋapɩlo duwəjo 11
11
asa 11
buṯrus gwəɽinyinu ŋɩru ŋuŋun
1na duwəjo na lɩmage lun laṯɩje yauḏia lɩmadiŋɩnno liji lun liro ga dino lɩmaməṯo ŋuɽuna ŋeḏi elo dino. 2gwune na buṯrus abo urucəlim na liji lun luɽəno nalwɩrlajiḏi ŋuɽuna, 3naleicɩno, ŋa gwarra na ŋəḏi gi liji lun late luɽəno no na nyalʼe? 4nalmɩni buṯrus aŋijo ŋuɽuna nanu nanu, 5nuleicɩno, nyi gwaṯɩje gi ḏuməḏɩjo eloŋu kamɩrɩgen yun yan yoba, niḏɩraḏelo niaŋu ŋuɽuna ŋun ŋaŋinu gi ŋwume. ŋɩdi ŋiro gi giria gun gɩbuḏo ŋɩkanu ŋwuɽa ganu kwoɽo nalgwuləḏə lugwi, 6gwune ninɩŋalaḏe gworki niaŋu ŋɩdio ŋeḏi gwɩnyəm ŋun ŋəṯi ŋwara gwukwoɽo, na ŋɩdi ŋeḏi geḏo, na ŋɩdi ŋun ŋaṯɩwewele ga nare ne na nyiɽuwə nyeḏi kanyin. 7nidiŋɩni ŋwal ninyileicɩno, diɽu buṯrus, ŋaḏuge ŋaʼe. 8nimɩni arno, ŋate ŋan dino gwele no. ŋate ŋanəḏi gi jɩŋaḏ ganu lugwi ŋədi ŋun ŋɩtumuḏu na ŋun ŋiro ŋɩrleḏ no. 9na ŋwal aɽuwaḏa ŋwara kanyin nalarno, aṯaŋara no ŋɩdi ŋun ŋiŋirɩlo elo ŋiro ŋɩrleḏ no. 10na giria gwulə ŋwamon ganu ṯəɽɩl. na wei nalaɽuwe kanyin. 11na cou ləmɩnyo lun liro ṯəɽɩl lun lɩwəjulo lugwi gesaria lɩḏuḏɩnu kwu dunu gwun gwijane. 12na gwuɽɩwə gwun gwɩpiḏo pɽul nuŋwieicɩno, wiḏile ŋanuməḏɩno no. na dino lɩmegin leno lun liro nyəɽɩl nalwele naləḏi kwu dunu gweḏi gwiji. 13na ŋu gwijaŋijo galakwe gwaŋəḏi gwiji gweḏi kanyin gwuḏuḏɩnu kwu dunu gwuŋun nueicɩno, wəjo liji yoba alorniḏa simianŋ gwun gwan buṯrus, 14na gwaŋuməḏɩjo ŋuɽuna ŋu ŋe ŋaŋakədə ga na liji wei leḏi dunu gwuŋa. 15gwune niar gwumə nanmɩni gwuɽɩwə gwun gwɩpiḏo pɽul idəḏə gi liŋə uro gwerre. 16niaḏɩŋane ŋuɽuna ŋeḏi gwele gwun gwiro elo galakwe ŋarno, yuwana gwerkwe gwaṯɩbabṯaijiḏi ŋau ŋe, namɩni nyalababṯaijɩni gwuɽɩwə gwe gwun gwɩpiḏo pɽul. 17na ḏa lɩmal elo ḏəḏə ḏiḏəḏo ga dino gi gwune ḏəḏijɩne gi gwune əmɩnyine gwelɩnya gwun gwan yecu kɩrisṯo, nyi gwan əḏi gəko nyidonye eloŋu? 18gwune naldiŋɩni ŋuɽuna ŋeno nalje nyɩkwom; nalbuḏi eloŋu, nalarno, na dino elo lɩmulḏəḏə lun liro ga dino ḏuwɩrla ga ŋuɽun ŋun ŋɩki gi ḏɩmiḏa.
kɩniso geḏi liji lun liro ga dino anḏakia
19na luŋa lun lɩmouwɩreḏelo ŋuɽun ŋe ŋeḏi isṯapanus ŋun ŋaṯɩnŋ liji ḏagɩɽini, nalwele kəbe nalṯɩmi binikia na gabarusa na anḏakia naṯɩluməḏɩjo liju ŋuɽuna kuwei. 20na kworo lagin liro ləmɩnyo leḏi gabarusa na gerawan gwune nalwila anḏakia naluməḏɩjo ligrigi dino ŋan gwele gwun gwan yecu. 21na ḏi ḏeḏi gwele gwun gwiro elo ḏijile, na liji gɩrɩpi əmɩnyi nalwɩrlaḏa kwele. 22na ŋuɽun ŋeno wila gi nəni neḏi kɩniso gun gijo urucəlim, nalwəje barnabaŋ gwawele anḏakia. 23gwune nuwila nuaŋu ḏiŋiriḏa ḏeḏi elo, nudile ganu nalbɩɽi nanu wei ŋuɽun ŋe kani alməṯo gwelɩnya dugwor de muma; 24gi gwune gwiro gwiji gwiŋir gwenyeḏo gwuɽɩwə gwun gwɩpiḏo pɽul na ḏɩməṯo, na liji lutu nalbaḏaṯe kwele gwun gwiro elo. 25na barnaba wele ṯasusia gwabunya sawulŋ, 26na gwune nubuja nugwuwila anḏakia. nalɩje kɩniso gɩḏilio getɩdo nalalɩmi liji lutu, na liji ḏəḏə calɩmis jiri jan lɩkɩrisṯin gwerre anḏakia.
ḏuwəjo ḏeḏi barnaba na sawul urucəlim
27na ŋwamon ŋwono na nebɩŋa lun lijo urucəlim nalgwuli anḏakia. 28na gwete lagin diɽelo gwan agibas, nuumə gwuɽɩwə gwe gwun gwɩpiḏo pɽul nuarno jaŋu jaje jɩbuḏo kɩḏilio wei. na ŋuɽun ŋeno ŋɩmila ŋwamon ŋweḏi kuluḏiyusa gesar. 29na calɩmis ḏete ḏete naləmɩnyejɩḏi ŋuɽuna lanwəḏɩjo lɩmegin ŋɩdio lun laṯɩje yauḏia, gi gwune ləṯi ŋɩma ŋalɩnduji. 30nalarre dino nalwəje gi lele leḏi kɩniso gi di deḏi barnabaŋa sawul gwe.
Currently Selected:
ŋɩru ŋun ŋapɩlo duwəjo 11: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
