ŋɩru ŋun ŋapɩlo duwəjo 12
12
asa 12
əruḏus gwuḏagɩɽinu gi liji leḏi kɩniso; buṯrus məbɩrini kɩrkon
1na kaja kono na əruḏus gwun gwiro gwele nulməṯo kworo leḏi kɩniso nuarno luniḏagɩɽini. 2nuɽinye yagubŋ, megin gweḏi yuwana kɩwiḏ ge. 3gwune nuaŋu ŋuɽuna ŋeno ŋɩmiŋiri liju dugwore nuarno gwaməṯo buṯrusŋ dino; na kaja kono giro gaja geḏi gɩmuri geḏi gia gun gaicɩwa. 4gwune numəṯo nuəḏɩje kɩrkon, nuḏəḏə ajana di na nyəɽɩl naṯɩlgegele kwoɽo kwoɽo alɩḏɩme. na əruḏus arno gwara ŋugwuloḏa gi jei ganu jeḏi liji ḏa gɩmuri gɩmara gɩmete ge ḏouwɩrico. 5na dino dɩmɩḏɩlo buṯrusŋ kɩrkon; naṯɩmɩni kɩniso uməḏəṯɩjo eloŋu lugwun gworki bubruṯ.
6na gilio kono giro ke gar gagi əruḏus di buṯrusŋ, buṯrus gwidɩrilo ajana ye yɩttən gwukanano ajana ganu berene əjirɩjir ye, namɩni yɩttən nalḏuḏɩni kouwɩr elo kɩluḏo gwe. 7numɩni je ŋɩdɩgə na gwiji gweḏi kanyin gweḏi gwele ḏuḏɩnejo ga, na bure oɽa kɩrkona ganu. numɩɽi buṯrusŋ lɩmeria nugirinio nueicɩno, diɽu cou. na ajirɩjir berene bɩɽaḏe ga gi di duŋun. 8na gwiji gweḏi kanyin eicɩno, kanu ganu gɩrna ge ki ŋakani jɩwɩḏia juŋa. nunarre dino. na gwiji gweḏi kanyin eicɩno, mɩɽinu nanu pərɩḏa gwe gwuŋa ŋwigwujana. 9nudu nugwujane, gwate gwilɩŋiḏi nuarno ŋuɽun ŋiro gwerkwe ŋun ŋapɩlo gwiji gweḏi kanyin no, numɩni arno gwaŋəḏi ŋuɽuna ŋun ŋaŋinu gi ŋwume. 10gwune naldu kalo gun gɩḏuḏɩnejɩlge ga gwerre, nalwele kouwɩr ye kɩluḏo gwe, nalgwuṯɩmi kɩbur gun giro aba gun gaṯɩge liji du nalwele kamɩrɩgen. na gɩbur iḏini kaja guŋun, naldu nalgwuḏiḏe nalgwuwele ṯaṯ ḏetɩdo, na cou nan gwiji gweḏi kanyin walane. 11gwune na buṯrus lɩŋe nuarno, nyi malɩŋe gwunnɩno muma gwele mouwəjo gwiji gwugun gweḏi kanyin mikədəḏe ga gi ḏi ḏeḏi ərudus, na wei ŋun ŋar ŋil liju ərri. 12gwune nulaḏɩŋane ŋeno nuwele kwu dunu gweḏi mariam gwun gwiro nana gweḏi yuwana gwun gwan markus, kalo gun gaɽuwaḏɩne liji ldu lutu naṯɩluməḏɩjo eloŋu. 13gwune nupi gɩburə kouwɩr na ŋera ŋete ŋan rouḏa nuwila nudiŋɩni. 14gwune nulɩŋe buṯrusŋ ŋuɽuna nate nani ḏidila ganu ouwɩrico nuiḏi gɩburə no, numɩni aɽuwe nueneḏeṯe gɩdəno gwe nuluməḏɩjo buṯrus gwo gwuḏuḏɩnu kouwɩr. 15naleicɩno, ŋa gwiro gɩɽilo. nuluməḏɩjo ŋuɽuna ŋiro ganu gwerkwe. nalmɩm arno, gwiji gwuŋun gweḏi kanyin gwiro. 16namɩni buṯrus jɩre gwɩpiḏi gɩburə. gwune naliḏi nalaŋu nalobaga ṯuṯ. 17nulmɩni uməḏɩjo ḏi ḏe alji nyɩkwom, nuluməḏɩjo galakwe gwudi gwele gwun gwiro elo kɩrkon; nuleicɩno, uməḏɩjil yagubŋ ŋuɽuna ŋeno na lɩmage. numɩni du nuwele kalo giro kaja.
18na mimmi gilio na ajana bereḏe nalarno aŋ gwiro maŋino ḏi buṯrus. 19gwune na ərudus bunyi ga bibi nate nubuja no, nuiḏeije ajana yun yaṯɩḏɩme nugele ŋuɩɽuna alɩɽinye. nugwulə yauḏia nuwele gesaria nujiga ŋɩnəwei.
ḏaiya ḏeḏi ərudus
20na əruḏus nuɽe ganu gworki gi liji leḏi sur na leḏi saida. na gwune nalduji balaṯusŋ meḏin gwun gwiro gaḏam geḏi ərudus, nalwila ḏi ərudus lulo le letɩdo nalbunyi lugwun ḏouwɩɽiḏa, gi gwune laṯɩlape ŋɩdio ŋe ḏiṯa kamɩrɩgen yuŋun. 21na gi lamon lun ligelo ərudus nukani jiria juŋun jeḏi ŋele, nujijiga kɩḏoɽ guŋun geḏi ŋele nuuməḏɩjo liji ŋuɽuna ŋutu. 22na liji əri gwula nalarno, ŋwal ŋweḏi elo ŋwiro, ŋədu ŋeḏi gwiji no. 23nuje ŋɩdɩgə na gwiji gweḏi kanyin gweḏi gwele mɩɽi gi gwune gwate gwugelo ḏɩbuḏia ḏi elo no; na lodolo e nuai.
24na ŋuɽun ŋeḏi elo wɩreḏelo nalbaḏaṯe.
25na gwune na barnabaŋa sawul gwe nalṯɩmi ŋɩru ŋagin nalaɽuwe urucəlim, nalgwuloḏena yuwanaŋ gwun gwan markus.
Currently Selected:
ŋɩru ŋun ŋapɩlo duwəjo 12: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
