ŋɩru ŋun ŋapɩlo duwəjo 13
13
asa 13
kɩniso geḏi anḏakia
1na nebɩŋa limualɩm le lijo kɩniso geḏi anḏakia. na luŋa liro barnabaŋale na simaun gwun gwan naija, na lukius gweḏi gerawan, na manan gwun boḏeḏo ḏi ərudus gwun gwiro muḏir, na sawul. 2na gwune orṯeḏɩlo gwelɩnya gwun gwiro elo naṯɩlməṯo əbuṯo, nal gwuɽɩwə gwun gwɩpiḏo pɽul eicɩno, məṯɩlo nyalkuwə barnabaŋaije sawul gwe alape ŋɩru ŋun ŋɩmilornejo. 3gwune nalməṯo əbuṯo naluməḏɩjo eloŋu nalɩngele di elo nalɩkuwa nalwele.
barnaba na sawul lo gabarus
4na dino nalɩwaje gwuɽɩwə gwe gwun gwɩpiḏo pɽul nalgwuli salukia, na ŋɩnowei nalwele murkab gwe gabarus. 5gwune nalṯɩmi saləmɩs naluməḏɩjo ŋuɽuna ŋeḏi elo gi lɩdunu leḏi elo, nal yuwana gelejo uwə ŋɩru ŋe.
6gwune nalwele kɩlɩgi ganu gi lɩrgwom lun luɽeico ḏɩrawe ga kəbe nalṯɩmi babus, nalbuje ŋuɽia ŋete ŋun ŋiro nebi gwun gwiro wɩɽɩgal; gwiro gwiju, gwan barɩyecu. 7na gwijilo lumḏa le leḏi mudir gwun gwan sajius bulus, gwun gwəṯi ŋadɩgɩɽenya muma. na lumḏa orniḏe barnabaŋaije sawul gwe lar ladiŋɩni ŋuɽuna ŋeḏi elo. 8namɩni alim gwun gwiro ŋuɽi, gi gwune jiri juŋun jan dino, nuldiɽo ḏikiḏiḏia ḏe nuarno gwakajo lumḏaŋ gi ḏɩməṯo. 9namɩni sawul gwun gwan bulus dino, gwenyeḏo gwuɽɩwə ganu gwun gwɩpiḏo pɽul nunŋalaḏe gworki, 10nueicɩno, ŋaɽe ŋeḏi iblis ŋenyeḏo ŋuɽuna ganu ŋeḏi irdeijo ganu na ŋun ŋɩki, ŋalkiḏiḏi ŋuɽun ŋe wei ŋun ŋiŋir, ŋa gwate gwar gwouwɩrico ḏiɽugɩgiḏio daṯ ganu deḏi gwele gwun gwiro elo dun dɩḏuḏɩnu ga na? 11diŋɩnu, gwunnɩno ḏi ḏeḏi gwele gwun gwiro elo ḏo lugwuŋa; ŋa gwərimi gi jei na ŋa gwate gwanaŋu anyino ŋwamon ŋwədi no. na cou nan jəbɩju na girɩm ideḏe ganu nuwewele nuarno gwanbupa liji algwulo ḏi ḏe. 12na gwune na lumḏa aŋu ŋuɽuna ŋun ŋɩmila nuəmɩnyi, nuobaga ṯuṯ gi ḏalɩmia ḏeḏi gwele gwun gwiro elo.
barnaba na sawul lo anḏakia kamɩrɩgen yun yan pisiḏia: ŋuɽun ŋun ŋuməḏɩjɩlo bulus liju
13na bulusŋa liji le luŋun walane kamɩrɩgen yun yan babus nalwele ŋi ḏɩrawe kəbe nalṯɩmi barɩja kamɩrɩgen yun yan bambilia, nani yuwana walane nuaɽuwa urucəlim. 14nalwele kaja gagin barɩja nalwila anḏakia kamɩrɩgen yun yan pisiḏia. na lamon le sabiṯ naləḏi kwu dunu gweḏi elo nalɩjiga. 15na gwune na ḏəgɩrio ḏeḏi ŋuɽun ŋun ŋigelijɩlo elo musaŋ ete na ŋeḏi nebɩŋa, na lele leḏi dunu gweḏi elo uməḏɩjo nyɩkwom naleicɩno, lɩmagəri, na ḏa nyalmanəṯi ŋuɽuna ŋanyaluməḏɩjo liji, uməḏɩjɩlo. 16na bulus diɽelo nuleico ḏi ḏe no, ləmɩnyo le leḏi isreiyil na nyaŋa lun laṯɩḏonye eloŋu, diŋɩnɩl. 17elo gweḏi liji leno leḏi isreiyil məṯi lɩgwurninyo lage nubuṯiane liji gi gwune lijo gi jili kamɩrɩgen yun yan masɩr. nulgwuloḏeṯa kaja ŋɩma ŋe ŋeḏi ḏi ḏuŋun. 18nuldɩme jɩḏilio ḏuɽi kwoɽo ca kiḏɩwer. 19na gwune nulḏenyi ŋele jɩmɩrɩgena ganu kwoɽoṯəɽɩl kamɩrɩgen yun yan kanan, nulgəgɩnyəḏɩjo jɩmɩrɩgena ganu jagin nulḏəḏə liji leḏi isreiyil jɩḏilio jɩnei kwoɽo na duɽi ṯoḏɩne ca. 20na ŋɩno gɩdo nulḏəḏə jaḏi kəbe na samuwil nuro nebi. 21na gwune na jɩḏilio ceno ete nalɽoṯeḏe gwelɩnya nal elo ḏəḏə sawulŋ, ŋaɽe ŋeḏi gesi, gwun gwiro gwubenyəmɩn. nuro gwele jɩḏilio ḏuɽi kwoɽo. 22gwune na elo di numaniḏi ḏauuḏŋ nuro gwele gwagin, na elo umə ŋu gwe nuarno, nyi mabuje ḏauuḏŋ ŋaɽe ŋeḏi yesa, ŋun ŋar ŋe ḏugwor ḏinyi ŋun ŋar ŋape ŋuɽuna ŋinyi wei. 23na lɩgwurnən leḏi gwiji kweno elo gwudi gwiji gwun gwaṯɩkədəḏə liji leḏi isreiyil ga, gwun gwan yecu gwiro gi gwune uməḏɩjɩlu gwe. 24na gwerre ganu gwijɩre gwate mila no yuwana gwuməḏi ḏibabṯaijɩno ḏe ḏe ḏuwɩrla ga ŋuɽun ŋun ŋɩki gi liji wei leḏi isreiyil. 25gwune na yuwana ṯɩmi ŋɩru ŋuŋun nuleicɩno, nyalaṯarno nyi gwan əḏi? nyi gwədu no, namɩni gwo gwete gwila gɩdo lugwi nyi gwate gwɩdeleḏo gwikədə jɩwɩḏia juŋun no. 26lɩmagəri, nyaɽa nyeḏi əriḏ yeḏi ibraim, na lun lijo kɩlɩgi ganu lagalo lun laṯɩḏonye eloŋu, ŋuɽun ŋe ḏɩkədəḏɩnə ga ŋuwəjulo lagalo; 27gi gwune lun laṯɩje urucəlim na lele lagin late lilɩŋiḏi yecuŋ no, na late lilɩŋiḏi ŋuɽuna ŋeḏi nebɩŋa ŋun ŋaṯɩləgɩri bubruṯ gi lamon le sabiṯ no, nalṯɩmi ŋuɽuna ŋeno gwune akɩmilo. 28na late lanbuje ŋuɽuna ŋe ḏiɽinyɩḏa no, nalmɩni ɽoṯəḏɩjo bilaṯusŋ gwuɽinye. 29gwune nalṯɩmi wei ŋun ŋulinu ŋan ŋu, nalgwuliə kwaɽelo nalḏɩri ga kil. 30namɩni elo diɽi. gi ḏaiya. 31nuaŋiḏi ŋwamon ŋwutu lagin lun lɩduḏɩle jalil na urucəlim, na gwunnɩno liro ḏaŋiḏio ḏuŋun gi liji. 32nanaŋa andro lajuməḏɩjo ŋuɽuna ŋiŋir, galakwe na ŋuɽun ŋeno ŋun ŋuməḏɩjulo lɩgwurninyo 33na elo ṯɩmi lage lun liro nyaɽe nyagin gwune diɽinyu yecuŋ gi ḏaiya. gi gwune ŋulinu gi ḏelɩŋa ḏun ḏiro nimɩro nɩttən kɩḏam geḏi elo,
ŋa gwiro ŋaɽe ŋinyi, gwunanyine nyi maŋalɩŋe.
34na gwan ŋuɽun ŋun ŋɩmadiɽio yecuŋ gi liji lun laiyo gwate gwaɽuwe kalo ge ḏidigɩɽa no, nuar dino,
nyi gwaŋaḏəḏə ŋuɽuna ŋiŋir ŋun ŋuməḏɩjɩlo ḏauuḏŋ ŋun
ŋɩpiḏo pɽul ŋun ŋajaḏaṯa bubruṯ.
35na gwar dino gi ḏelɩŋa ḏiro kaja no,
ŋa gwate gwouwɩrico gwuŋa gwun gwɩpiḏo
pɽul gwadigɩɽe no.
36na ḏauuḏ gwune nuəpijo liji luŋun ŋɩru gi gwune arne elo, nuai naləḏɩje kil geḏi lɩgwurnən nudigɩɽe, 37namɩni gwun ma elo diɽi. gi ḏaiya gwate madigɩɽe no. 38na dino lɩŋiḏɩl lɩmagəri le, gwiji kweno gwiro gwun gwaṯajigwi liji uməḏɩjo ŋuɽuna ŋeḏi ḏuḏa ganu ŋuɽun ŋun ŋɩki, 39na lugwun wei lun ləmɩnyu limədu late ləṯi ḏare no ŋuɽun ŋono wei ŋun ŋate ŋəṯi ŋɩma ŋanyaŋədu ŋuɽun ŋe ŋun ŋigelijɩlo elo musaŋ no. 40na ŋiro dino, jil muma əri kəbe ŋun ŋulinu gi jiḏam jeḏi nebɩŋa ŋo ŋila lagalo:
41eʼe nyaŋa lun laṯaki jumo, obeḏɩl ŋa ṯuṯ nanyai
gi gwune nyi gwaṯape ŋɩru ŋwamon ŋwalo
ŋwun ŋwate ŋwaṯanyaləmɩnyi minu no ḏa ŋɩmaŋini gwiji
gwete gwumə muma.
42na gwune na bulusŋa barnaba gwe nalduḏə kwu dunu gweḏi elo, na liji ɽoṯeḏe lagin laluməḏɩjo ŋuɽuna ŋeno gi lamon le sabiṯ lun lila. 43gwune na liji duḏə kwu dunu gweḏi elo nalwɩreḏelo, na liju lutu na liji lutu lun lɩməṯi ŋuɽuna ŋeḏi liju nalgwuje bulusŋ na barnaba, lun luməḏɩjɩlo nalarno almaṯaḏe gi ḏiŋiriḏa ḏeḏi elo.
duwəjo dimamaniḏi gi liji lun liro ga dino
44na gi lamon le sabiṯ lun ligwujo gworo gɩṯo liji wei leḏi amɩrɩgen nalaɽuwaḏa ldu ladiŋɩni ŋuɽuna ŋeḏi elo. 45na gwune na liju aŋu liji gɩrɩpi, nalɽi ganu gworki, nalumə ḏɩḏenɩḏia ḏe nalakajo nalarno late ladiŋɩni ŋuɽuna ŋeḏi bulus no. 46namɩni bulusŋa barnaba gwe naluməḏɩjo ḏibɩɽeḏa ḏe nanu naleicɩno, arram ŋuɽun ŋeḏi elo ŋuməḏɩnu lagalo gwerre. na gi gwune ŋɩdonyanyalo nanyakɩmi lula lalo nya late lɩdeleḏo gi ḏɩmiḏa gi gɩḏilio no, anamamaniḏi liji lun liro ga dino. 47gi gwune niji gwele ḏəḏə ŋuɽuna ŋeno, nuarno,
nyi gwaŋaḏuji bure gi liji lun liro ga dino,
ŋa gwape ŋuɽuna ŋe ḏɩkədəḏɩnə ga kɩḏilio wei.
48gwune na liji diŋɩni ŋuɽuna ŋeno lun liro ga dino, naldile ganu gworki nalbuḏi ŋuɽuna ŋeḏi elo, na wei lun lɩməṯɩlo elo ḏɩmiḏa ḏe ḏeḏi gi gɩḏilio naləmɩnyi; 49na ŋuɽun ŋeḏi gwele gwun gwiro elo wɩreḏelo wei gi jɩmɩrɩgen. 50na liju diɽo la lun laṯɩḏonye eloŋu na lun lɩbuḏo, na ləmɩnyo lun lɩbuṯano leḏi amɩrɩgen nalarno leḏagɩɽina ḏi bulusŋa barnaba gwe naliri gi diɽil kalo gagin. 51nalmɩni pənyə ḏɩbuɽɩbuɽə ga ŋwara ŋwagin ḏɩteijo ḏe ḏagin, nalwila igunia. 52na calɩmis jenyeḏo ḏidila ganu na gwuɽɩwə gwun gwɩpiḏo pɽul.
Currently Selected:
ŋɩru ŋun ŋapɩlo duwəjo 13: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
