ŋɩru ŋun ŋapɩlo duwəjo 14
14
asa 14
bulus na barnaba lo igunia
1gwune jil igunia naləḏi berene kalo gete kwu dunu gweḏi elo gweḏi liju. naluməḏɩjo ŋɩma ŋe na liji gɩrɩpi əmɩnyi lun liro liju na ligrigi dino. 2namɩni liju lun late ləmɩnyu no naldiɽo liji lun liro ga dino, naləḏiḏɩje ŋuɽuna ŋadɩgɩɽe ganu ŋagin nalkiḏiḏi lɩmage le. 3ŋiro dino nalijiga gaja gwola ganu, nalumə ḏibɩɽeḏa ḏe nanu na ḏobeḏeicaḏelo ḏeḏi gwele gwun gwiro elo, gwun laŋijulo ŋuɽun ŋe ḏiŋiriḏa ḏuŋun ŋiro gwerkwe ŋuɽun ŋe ŋun ŋɩbuḏo, na ŋɩdi ŋe ŋun ŋɩmobeje liji ga ṯuṯ, ŋun ŋapɩlo di de dagin. 4namɩni liji leḏi amɩrɩgen yono naluɽəjiḏi ganu; kworo nalro liju le, na kworo nalro duwəjo de. 5namɩni gwune liji lun liro ga dino na liju dino lele le lagin nalar lalərrɩjo ŋɩdiginə nalar lalauce nyɩdol nye, 6naldiŋɩnno lar dino nalabɩra gi jɩmɩrɩgen jun jan lisra na ḏarɩba jeḏi lɩkənia, nal galo uɽeico galo. 7na ŋɩnəwei dino naṯɩlumə ŋuɽuna ŋiŋir ŋeḏi yecu.
bulus na barnaba lo lisra
8na gwiji gwete je lisra gwun gwate gwəṯi ŋɩma gwanḏuḏɩno elo no gwiro gɩbɩjo gwune lɩŋinu, na gwate gwatɩnwele no. 9nudeŋɩnejo bulusŋ. nan bulus ŋalaḏe, nulɩŋe gwəṯi ḏɩməṯo ḏeḏi gelino muma, 10nuuməḏɩjo ŋuɽuna ŋɩbuḏo, diɽu ŋwara ŋwe ŋwuŋa. nudiɽi nuḏɩrṯaḏelo nuwele. 11gwune na liji aŋu ŋuɽuna ŋun ŋapɩlo bulus nalumə ŋuɽuna ŋɩbuḏo ŋuɽun ŋeḏi likənia naleicɩno, eloŋa ligwulijije namɩni liro gi gwune liji. 12nalḏəḏə barnabaŋ jiri jan sabsa, na bulusŋ jiri jan amasa gi gwune gwiro gwaṯɩdare nuumə. 13na gɩsis geḏi dunu gweḏi sabsa gwun gwiro kaja gwe kamɩrɩgen, nuapa nyɩḏrio na ŋwawur, nuḏuḏɩni kouwɩr gi jɩbur nuarno lulḏugɩjo lijiŋale. 14na gwune na duwəjo dun dan bulusŋa barnaba gwe naldiŋɩni ŋuɽuna ŋeno, nalŋɩrṯa jiria jagin ganu naleneneḏe gi jɩlɩgi ganu jeḏi liji naləri gwula nalarno, 15ŋwolɩŋa le, gwudaro gəko nanyarre dino? anaŋa dino andro ləmɩnyo gi nyaŋa, anaṯajuməḏɩjo ŋuɽuna ŋiŋir nyalawɩrla galo ŋuɽun ŋeno ŋun ŋate ŋəṯi jei ganu no nyaɽuwaḏa ḏi elo gwun gwumiḏo gwun gelo kanyinŋ na gwɩnyəm, na ḏɩrawe na ŋɩdi wei ŋun ŋijilɩne ganu. 16na ŋu kaja gun gɩmete nuouwɩrico liji wei nalwele gi daṯ dagin. 17namɩni ŋu gwate mouwɩrico gwula gwuŋun gwajiga jaɩ ŋɩdi ŋun ŋaŋi liji aḏɩŋane no. gi gwune ŋu gwaṯajəpijo ŋuɽuna ŋiŋir nuajiḏəḏə gaua kanyin na ŋwamon ŋweḏi ḏɩwona, na ŋwajipi ḏiṯa ḏe nuenyeje dugwore dalo ḏidila ganu. 18naluməḏɩjo dino nalmɩni jɩre ŋɩbɩɽe lagin nalakajo liji lo laliḏugɩjo. 19na liju wila anḏakia na igunia, na gwune nalidi liji nanu ŋuɽun ŋe ŋagin, nalauce bulusŋ nyɩdol nye, nalgwuloḏa ga ḏibɩrgwugoḏe nalgwuloḏa kaja kamɩrɩgen, nalarno mai. 20gwune ḏuḏɩnejo calɩmis galo naluɽeico ga nudiɽi nuaɽuwe kamɩrɩgen.
na giləganu nalwele barnaba gwe ḏarɩba.
ḏaɽuwa anḏakia
21naṯɩlumə kamɩrɩgen yeno ŋuɽuna ŋiŋir ŋeḏi yecu na gwune nalɩduji calɩmis jutu nalaɽuwa lisra mɩna na igunia na anḏakia. 22nalbɩɽi calɩmis gi jei naluməḏɩjo aljaḏaṯa gi ḏɩməṯo naleicɩno, iləḏi ŋele ŋeḏi elo ḏɩḏia ḏe ḏutu. 23na gwune nalməṯo lelɩnya kɩniso wei, naluməḏɩjo eloŋu ḏɩməṯo ḏe əbuṯo nalɩgele gi ḏi ḏeḏi gwele gwun gwiro elo gwun gwəmɩnyɩlo. 24gwune nalwele kɩlɩgi ganu bisiḏia nalwila bambilia, 25na gwune nalumə ŋuɽuna ŋeḏi yecu barɩga nalgwuli aṯalia. 26na ŋɩnəwei nalwele murkab gwe anḏakia, galo gun gigelɩnu ḏiŋiriḏa ḏe ḏeḏi elo ŋɩru ŋun ŋəṯɩmɩlo.
27gwune nalṯɩmi anḏakia nalwəɽeice liji ldu wei leḏi kɩniso, naluməḏɩjo wei ŋun ŋapɩlo elo luŋaŋale, na galakwe na elo iḏi gɩburə ge ḏɩməṯo gi liji lun liro ga dino. 28nalijiga ŋɩnəwei calɩmis je gaja gwola ganu.
Currently Selected:
ŋɩru ŋun ŋapɩlo duwəjo 14: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
