ŋɩru ŋun ŋapɩlo duwəjo 17
17
asa 17
bulus na sila lo ṯasaluniki
1nalwele kɩlɩgi ganu ambibulus na abulinia nalwila ṯasaluniki gwun gwəṯi duno gweḏi elo gweḏi liju. 2na bulus əḏi lagin gi gwune aṯuəḏi bubruṯ naluməḏɩjo galo ŋwamon ganu ṯəɽɩl ŋwe sabiṯ gɩḏam ge geḏi elo, 3nuliḏijo nulaŋijo arram kɩrisṯo gwiḏe na gwediɽi gi ḏaiya. nueicɩno, yecu kweno gwun gwuməḏɩjajil gwe gwiro kɩrisṯo. 4na luŋa kworo naləmɩnyi nalje bulusŋale sila gwe, na lutu lun liro ligrigi lun laṯɩḏonye eloŋu, na la lutu lun lɩbuṯano. 5namɩni liju lun late ləmɩnyu no ɽe ganu nalbuḏu gi dugwor ɽɩɽir gi igo, nalməṯo ləmɩnyəŋe kworo lun lɩki lun laṯɩwewele ga gi cu, nalwəɽeice liji ldu lutu naldiɽeijo ḏɩpiḏa nanu kamɩrɩgen, nalki duno gweḏi yasun, nalarno lədio bulusŋaije sila gwe nalɩḏəḏɩjo liji kɩluḏo. 6gwune nate nalɩbuje no, nalməṯo yasunŋ na kworo lun liro lɩmage nalgwuloḏeṯa gi lele leḏi amɩrɩgen, naləri gwula, ləmɩnyo leno lun lɩmouwɩrli gɩḏilio ganu lɩmila ŋɩne dino, 7lun lɩmal yasun gwuloḏeṯa kwu dunu gwuŋun. na luŋa wei ŋuɽun ŋagin ŋate ŋɩwiḏi kworo gweḏi gesar no, nalarno əlmək gwiro kaja gwo gwun gwan yecu. 8gwune naldiŋɩni ŋuɽuna ŋeno, liji na lele leḏi amɩrɩgen naloba ga ṯuṯ nalɽe ganu. 9gwune nalapa yasunŋaije lɩmage le ŋɩdio ŋete ki nalouwɩrico nalwele.
bulus na sila lo beria
10na cou na lɩmage kuwa bulusŋaije sila gwe gilio beria. na luŋa gwune nalṯɩmi naləḏi kwu dunu gweḏi elo gweḏi liju. 11na liju leḏi beria naliŋirane gi liju leḏi ṯasaluniki gi gwune nalməṯo ŋuɽuna ŋun ŋiŋir ŋeḏi yecu ŋadɩgɩɽe ŋe, nalbunyi kɩḏam ganu geḏi elo bubruṯ ḏa ŋuɽun ŋeno ŋɩmaro gwerkwe ganu. 12na dino lutu naləmɩnyi, na dino la kworo leḏi ligrigi lun lɩbuṯano, na ləmɩnyo.
13namɩni gwune na liju leḏi ṯasaluniki nallɩŋe bulus gwuməḏɩjo liji ŋuɽuna ŋeḏi elo beria, nalaɽuwe nalɩgwujane mɩna naldiɽi liji. 14na cou na lɩmage kuwa bulusŋ kɩmerɩmer geḏi ḏɩrawe, namɩni sila na ṯimuṯawus lijɩre lijiga. 15na ləmɩnyo lun lɩwiḏɩlo bulusŋale nalgele gi ṯaṯ nalwele nalṯɩmi aṯina, nalaɽuwa ŋuɽun ŋe ŋun guwəjɩlilɩŋe bulus ḏi silaŋa ṯimuṯawus gwe, nuarno gwalgwujane cou.
bulus na sila lo aṯina
16na gwune ḏuḏɩnɩjɩlo bulusŋ aṯina naṯi gwuɽɩwə gwuŋun pi gi ḏugwor ganu gi gwune aŋəḏu amɩrɩgena yenyeḏo ŋɩdio ŋun ŋaṯɩl liji orṯeḏa. 17na ŋiro dino naluməḏəṯe lijuŋale lun lijilga kwu dunu gweḏi elo, na lun laṯɩḏonye eloŋu, na lun laṯɩlobeḏe gi cu bubruṯ, nulaŋijo ŋuɽuna. 18nalobeḏe liji le kworo lun liro limualɩm lun ləmɩnyu ŋuɽuna ŋeḏi abikurin na lun ləmɩnyu ŋuɽuna ŋeḏi ruwagin. na kworo nalarno, ḏri ṯeno ḏarau? na kworo arno, gwiro gi gwete gwun gwaṯijiuməḏɩjo eloŋa le liro kaja; gi gwune bulus gwaṯumə ŋuɽuna ŋan yecu na ḏidiɽo gi ḏaiya. 19nalməṯo nalgwulo naliwele kalo gun gaṯɩn liji uməḏəṯe ŋuɽuna ŋeḏi eloŋa lun liro kajakaja, naleicɩno, anano anandiŋɩni ŋuɽuna ŋun ŋiya ŋun ŋaṯaluməḏɩjo liji. 20ŋuɽun ŋun ŋaṯalumə ŋiro kaja gi nəni, na ŋiro dino anano analɩŋe ŋuɽuna kworo ŋeno. 21na liji leḏi aṯina na liji leḏi jɩmɩrɩgen jun jiro kaja wei lun laṯɩjiga ŋɩnəwei laṯɩjiga mino jai, naṯɩlumə naṯɩldiŋɩni ŋuɽuna ŋun ŋiya dino.
ŋuɽun ŋeḏi bulus kalo gun gaṯɩn liji uməḏəṯe ŋuɽuna ŋeḏi eloŋa lun liro kajakaja
22na bulus diɽi kɩlɩgi ganu kalo keno nuarno, ləmɩnyo le leḏi aṯina, nyi gwilɩŋiḏi nyalaṯɩḏonye eloŋaije lun lutu ganu. 23gwune niwele niaŋu ŋɩdio ŋun ŋaṯanyalorṯeḏa nibuje lobo lun lulinu, eloŋu gwun gwate gwilɩŋiḏɩnu no. nyi gwajuməḏɩjo ŋun ŋaṯanyalorṯeḏa ŋate ŋilɩŋiḏanyalo no ŋajilaŋijo. 24elo gwun gwugelo gɩḏilio na ŋɩdi wei ŋun ŋijo, ŋu gwiro gwele gweḏi kanyin na gwɩnyəm, na dino gwate gwaṯɩje gi lɩdunu lun luṯɩnu di de no; 25i gwate gwaṯi liji əpijo ŋɩru di de no, gi gwune gwate gwibɩɽaṯɩn ŋɩdio ŋədi no, gi gwune ŋu gwiro gwun gwiḏəḏə liji wei ḏɩmiḏa, na uwə na ŋɩdi wei. 26na kwurninyo gweṯɩdo nugele liji wei leḏi jɩmɩrɩgen wei lun liro kajakaja lun laṯɩje kɩḏilio wei nulgelijo ŋwamon ŋwagin na jɩmɩrɩgen jagin, 27kani nalbunyi eloŋu alḏɩmamɩ nanu albuje, namɩni gwate gwatɩnɩje uro kaja ḏi liŋə wei no. 28na lugwun iləmɩḏe na ilawewele na ilo, gi gwune lɩɽiman kworo lalo nalarno, nanaŋa dino andro nyaɽe nyuŋun. 29na gi gwune ilro nyaɽe nyeḏi elo ŋate ŋiŋir ilarno elo gwiro gi ḏab na baḏa no, i gɩdol gun gaṯɩgelini ŋuɽun ŋe ŋeḏi gwiji na ŋadɩgɩɽe ŋe ŋuŋun no. 30na elo ouwɩrico ŋwamon ŋwe ŋɩɽilo, namɩm gwunne magele ŋuɽuna ŋaŋi liji wei wɩrla ga ŋuɽun ŋagin ŋun ŋɩki gi jɩmɩrɩgen wei. 31na ŋu magele lamon lun laje lulakɩmi gɩḏilio ḏiḏuḏɩno ḏe ga gwəmɩnyo gwe gwun gwuməṯu gwarugwe, na ŋu gwaŋiḏi ŋuɽuna ŋeno gi jei ganu ḏidiɽo ḏe ḏuŋun gi liji lun laiyo. 32namɩm gwune naldiŋɩni ḏidiɽo ḏe gi ḏaiya kworo nalaki jumo, namɩni kworo nalarno, ŋananɩdiŋɩni lamon lete lugwuŋa. 33na dino na bulus du lagin. 34namɩni kworo nalro bulusŋale naləmɩnyi, na gwete lagin gwan duyunisius gwun gwiro ŋwete gweḏi əcərio, na gwa gwete gwan ḏamaras na kworo lijille.
Currently Selected:
ŋɩru ŋun ŋapɩlo duwəjo 17: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
