ŋɩru ŋun ŋapɩlo duwəjo 18
18
asa 18
bulus gwo kurinṯus
1na ŋɩno gɩdo na bulus walane aṯina nuwila kurinṯus. 2na ŋɩnəwei nubuje gwiju gwete gwan akila gwilɩŋinu bunṯi, gwun gwuwiḏi iṯalia gwunnɩno, na gwa gwuŋun gwan birisɩkila gwijilgwe, gi gwune kuluḏiyusa gele ŋuɽuna nuarno liju wei lədu rumiya. na bulus wila lagin, 3nalijiga gi gwune aṯɩlape ŋɩru kalo gete laṯɩkade jupia jun jiro jiria. 4na bubruṯ ŋwamon ŋwe sabiṯ naṯɩluməḏəṯe ŋuɽuna kwu dunu gweḏi elo, nuiḏi liju nanu na ligrigi. 5na gwune na silaŋa ṯimuṯawus gwe wila makɩḏunia, na ḏugwor ḏamane bulusŋ ganu naṯuteije ga gi liju nuarno yecu gwiro kɩrisṯo. 6namɩni gwune naldonye naliḏene, nugiḏuḏiŋi jiria juŋun, nuleicɩno, ŋuwən ŋalo ŋaje ŋwuɽelo ŋwalo. nyi miŋir nanu ŋuwən ŋalo. gwunnɩno nyi gwo mele gi liji lun liro ga dino. 7nuwele ŋɩnəwei nuəḏi kwu dunu gweḏi gwəmɩnyo gwete gwan ṯitius yuṯus gwun gwaṯorṯeḏa eloŋu, na dunu gwuŋun gwijo gworo gi lɩmere kwu dunu gweḏi elo. 8na karibus gwun gwiro gwele gweḏi dunu gweḏi elo, gwəmɩnyu gwelɩnya gwun gwan yecu luŋa wei gɩdəno ganu. na liji lutu leḏi kurinṯus diŋɩni naləmɩnyi nalbabṯaijɩni. 9na gwele gwun gwiro elo eico bulusŋ gilio ŋuɽun ŋun ŋaŋinu gi ŋwume no, ŋaḏonyɩḏa no, aṯaŋumə na ŋa gwo gwaje nyɩkwom; 10gi gwune alaje na gwiji gwate gwun gwaŋanobe nanu di de no, na nyi gwəṯi liji lutu kamɩrɩgen yeno. 11nujiga ŋɩnəwei gɩḏilio getɩdo na luwə nyəɽɩl naṯulalɩmi ŋuɽuna ŋeḏi elo kɩlɩgi ganu lagin.
galiwan na bulus
12na gwune na galiwan gwiro lumḏa leḏi akaia, na liju diɽi lulo le letɩdo ḏikiḏiḏia ḏe ḏi bulus nalgwuloḏa kəcərio. 13nalarno, iyo kweno mouwɩrlio liji dugwore ga naṯɩlorṯeḏa eloŋu ŋuɽun ŋe ŋun ŋɩkiḏiḏɩlo gworo gwe gwun gwugelɩjo elo musaŋ. 14gwune na bulus ar gwumə, na galiwan eico liju no, nyaŋa lun liro liju, na ḏa ŋuɽun ŋeno ŋɩmar ŋiro ŋari ŋaki gworo gwun gwuḏuḏɩnu ga i ŋuɽuna ŋɩki, ŋiŋir lugwi nyi gwadiŋɩni ŋuɽuna ŋalo, 15namɩni ḏa ŋuɽun ŋɩmaro ŋeḏi ŋuɽun ŋete ŋete ŋalo na jiri, na ŋuɽun ŋalo, aŋəḏɩlo nyaŋa. nyi gwate gwiro gaḏi geḏi ŋuɽun ŋun ŋiro dino no. 16nuliri kəcərio. 17na luŋa wei nalməṯo suṯanis, gwun gwiro gwele gweḏi dunu gweḏi elo, nalpi gi jei ganu jeḏi kəcərio. namɩni galiwan jiga mino.
bulus maɽuwa suriya
18na ŋɩno gɩdo na bulus jiga ŋwamon ŋwutu ki nuwalane gi lɩmage nalwele murkab gwe suriya birisɩkila gwe na akila. gwerre ganu gwate mele no, bulus nuwəḏɩni əɽu yuŋun kanikria gi gwune gwəṯi ḏerɩmiə. 19nuwila awɩsus nanwalane ŋɩne; namɩni ŋu kwulo gwuŋun nuəḏi kwu dunu gweḏi elo, nuluməḏɩjo nuəŋijo liju ŋuɽuna. 20gwune nalbunyi gwajiga gɩtten numɩni donye; 21nulmɩɽənyə nuleicɩno, nyi gwaje gwaɽuwa lagalo ḏa elo məmɩnyi, nuwalane kwu murkab awɩsus. 22gwune nuṯɩmi gesaria nuabo gwasalɩmia kɩniso nugwulo anḏakia. 23gwune juga ŋwamon ŋwouwɩrio nuwalane kalo kono nuwele gi jɩmɩrɩgen jeḏi galaṯia na paragia ŋwubɩɽia calɩmis wei nanu.
abulus gwo awɩsus
24na gwiju gwete gwan abulus gwilɩŋinu akandria nuwila awɩsus, gwelɩminu na gwəṯi ŋɩma gwaṯumə muma, gwilɩŋiḏi gɩḏam geḏi elo nuəṯi ŋɩma nuəŋijo liji ŋuɽuna. 25na gwiji kweno gwelɩminu gi ṯaṯ ḏeḏi gwele gwun gwiro elo na ŋu gwubuḏu gwuɽɩwə gwe, naṯuumə nualɩmi gwerkwe ŋuɽuna ŋeḏi yecu, namɩni gwilɩŋiḏi ḏibabṯaijɩno ḏeḏi yuwana kuwei. 26nudiɽi nuluməḏɩjo ḏibɩɽeḏa ḏe nanu kwu dunu gweḏi elo. na gwune na birisɩkila diŋɩni na akila nalgwulo nalaŋijo ṯaṯ ḏeḏi elo muma. 27na gwune nuar gwele akaia, na lɩmage gelejo uwə nalbɩɽi nanu nalulijo calɩmis juwei gɩḏam naluməḏɩjo nalarno gwalməṯo aləmɩnyi. na gwune nuwila nulgelejo uwə gworki lun lɩməṯi ŋuɽuna ḏiŋiriḏa ḏe; 28nuḏami ŋuɽuna ŋeḏi liju gi jei ganu jeḏi liji, nulaŋijo gɩḏam ge geḏi elo yecu gwiro kɩrisṯo.
Currently Selected:
ŋɩru ŋun ŋapɩlo duwəjo 18: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
