ŋɩru ŋun ŋapɩlo duwəjo 19
19
asa 19
calɩmis jeḏi yuwana mamadan jo awɩsus
1gwune jo abulus kurinṯus, na bulus wele ŋi diɽil dun dijo elgwogwo kɩlɩgi ganu kamɩrɩgen nuwele awɩsus nubuje calɩmis kworo. 2nuleicɩno, nyalmaməṯo gwuɽɩwə gwun gwɩpiḏo pɽul gwune əmɩnyenya? naleicɩno anate nimandiŋɩnno gwuɽɩwə gwun gwɩpiḏo pɽul gwo no. 3nuleicɩno, na dino nyalbabṯaijinu ḏibabṯaijɩno ḏe ḏəṯe? naleicɩno, ḏibabṯaijɩno ḏe ḏeḏi yuwana. 4nalmɩni bulus eicɩno, yuwana babṯaijiḏi ḏibabṯaijɩno ḏe ḏe ḏuwɩlrla ga ŋuɽun ŋun ŋɩki, nuuməḏɩjo liji aləmɩnyi gwete gwun gwila gɩdo lugwun gwun gwan yecu. 5gwune naldiŋɩni dino nalbabṯaijɩni jiri je jeḏi gwele gwun gwan yecu. 6gwune nani bulus gele di elo na gwuɽɩwə gwun gwɩpiḏo pɽul gwuləḏa lagin; nalumə ḏuməḏo ḏiro kajakaja na ŋuɽuna ŋun ŋaŋijilɩlo elo. 7na ləmɩnyo lijo lar di na gwuttən ca.
bulus gwo awɩsus
8na gwune na bulus əḏi kwu dunu gweḏi elo nuluməḏɩjo ḏibɩɽeḏa ḏe nanu luwəŋe ṯəɽɩl naluməḏəṯe ŋuɽun ŋe ŋeḏi ŋele ŋeḏi elo nulidi nanu. 9namɩni kworo gwune na dugwor dagin bɩɽe nanu naldonye gi ləmɩnyi, naluməḏəṯe ḏikiḏiḏia ḏe ḏeḏi ṯaṯ ḏeḏi yecu gi jei ganu jeḏi liji lutu, nunwalane nugwuloḏa calɩmis kaja, naṯɩluməḏəṯe liji le bubruṯ madrasa gweḏi gwete gwan ṯiranus. 10nuarre dino jɩḏilio jɩttən, kəbe wei lun lijo asia lun liro liju na ligrigi naldiŋɩni ŋuɽuna ŋeḏi gwele gwun gwan yecu. 11na elo gele ŋɩru ŋeḏi ŋɩma ŋun ŋiro kaja kworo gweḏi liji di de deḏi bulus, 12na kaŋɩnu yeḏi bulus naṯɩləpijo liji jiria lun leḏeḏo nanu naṯi ŋɩɽainy ete lagin na diŋerom du lagin. 13namɩni liji kworo lun laṯɩwewele kajakaja lun laṯarno laṯɩdi diŋeroma ŋɩma ŋagin ŋe, naṯɩlorniḏaṯe gi liji lun ləṯi diŋeroma jri je jedi ŋwele ŋwun ŋwan yecu nalarno, nyi ŋwo gwudəŋəḏaŋə yecu gwe gwun gwaṯɩgwi bulus umə. 14na nyaɽe kwoɽoṯəɽɩl arre dino nyun nyiro ləmɩnyo nyeḏi gwiju gwete gwan sikawa, gwun gwiro gɩsis gun gɩbuḏo. 15na ḏiŋerom nulwɩrlijo ŋuɽuna nuleicɩno, nyi gwilɩŋiḏi yecuŋ na bulus, namɩni nyaŋa lan əḏɩŋa? 16na gwəmɩnyo gwun gwəṯi ḏiŋeroma nulkɩɽiṯeije nanu nulḏami wei kəbe nalabɩre kwu dunu kweno ga dino ŋwumuɽino dəɽi de nanu. 17na ŋuɽun ŋeno ŋɩmalɩŋini wei gi liju na gi ligrigi dino lun laṯɩje awɩsus; nal ŋɩḏe e wei na jiri jeḏi gwele gwan yecu buṯane. 18na lutu lun lɩməmɩnyi nalwila, nalteije ga, nalaŋiḏi ŋuɽuna ŋagin. 19na lutu lun laṯape ŋiminyaŋe nalapa jɩḏam jagin wei ldu, nalɩnuni gi jei ganu lagin wei; nalḏuɽo jilɩnya jagin nalro əlgɩrucu yiro gi kaiyari alɩb ḏuɽi ṯoḏɩne. 20ŋiro dino na ŋuɽun ŋeḏi gwele buṯane gworki nalɩḏami.
ḏuməḏɩno ḏeḏi bulus ḏeḏi ŋɩru ŋuŋun
21na gwune na ŋuɽun ŋeno ete, na bulus uməḏɩni gi ḏugwor ganu ḏuŋun ŋu gwele kɩlɩgi ganu makɩḏunia na akaia ki ŋwuwele urucəlim, nuarno, na ḏa nyi maje ŋɩnəwei arram nyi gwele rumiya dino. 22na dino nulwəje lɩttən makɩḏunia lun laṯəpijo ŋɩru, ṯimuṯawusŋa araṯus gwe; na ŋu kwulo gwuŋun gwijiga ŋwamon ŋwouwɩrio asia.
ḏikiḏiḏia awɩsus
23na kaja keno na ḏɩbereḏa diɽo gworki ḏan ṯaṯ ḏeḏi yecu. 24gi gwune na gwiji gwun gwan ḏimiṯrius gwun gwaṯiṯi jaba jun jiro baḏa naṯuri lɩduno lɩtilɩṯi jaba je leḏi arṯimas, naṯɩlape ḏɩbona ḏutu ḏun ḏapɩlo ḏe ŋɩru; 25nulorniḏa lun lapo ŋɩru na lun lapo ŋɩru ŋiro gi gworo kweno, nuleicɩno, ŋwolɩŋa, nyalɩŋiḏi iləṯi ḏɩbona ḏage ŋɩru ŋeno. 26na nyalaŋəḏi na nyaldiŋɩnu ŋɩne awɩsus gwədu cucun no, namɩni ŋijo gɩṯo gi jɩmɩrɩgen wei jeḏi asia, bulus kweno gwuməḏɩjo liji kəbe na lutu lagin nalwɩrla ga, nuarno eloŋa lun lɩkədɩnu di de eloŋa lədu no. 27aṯi ŋɩru ŋage duḏa ŋɩti cucun kuwei no, naṯɩmɩni dino liji donye duno gwun gwubuḏo gweḏi arṯimas gwun gwiro elo gwubuḏo gworki gwun gwiro gwa, nalwɩri ga ḏiniḏo ḏe ḏuŋun, gwun gwaṯi liji wei leḏi asia na leḏi gɩḏilio orṯeḏa. 28gwune nalidiŋɩni ŋe nalɽejiḏi ganu cicer naləri gwula nalarno, arṯimas gwɩni gworki gweḏi liji leḏi awɩsus. 29na amɩrɩgen yeno enyeḏe ŋɩrəkwənəŋe gworki, na liji məṯo gausŋ na ariṯakusŋ leḏi makɩḏunia lun laṯɩwewele bulusŋale naleneḏeṯe kal gete kalo gun gaṯɩn liji aɽuwaḏe ldu kərio. 30gwune na bulus ar gwəḏi kɩlɩgi ganu gi liji, na calɩmis donye. 31na lele leḏi ərio kworo leḏi asia dino lun liro lɩmeḏin leḏi bulus, nalwəje ŋuɽuna nalarno gwo gwəḏio kalo keno. 32na liji kworo əri gwula ŋuɽun ŋe ŋetɩdo na kworo ŋuɽun ŋe ŋiro kaja, na liji luɽuḏiḏi ganu, na lutəno late lilɩŋiḏi nalarno gwudaro gəko nalaɽuwaḏa ldu no. 33nalgwuloḏa iskandaraŋ gi liji ganu, na liju upəḏeice kɩɽelo. nalmɩni iskandara eico ḏi ḏe no laji nyɩkwom ŋunuməḏo ŋuɽuna ŋuŋun. 34gwune nallɩŋe gwiro gwiju luŋa wei naləri gwula ŋwal ŋwe ŋwetɩdo sa jɩttən ca nalarno, arṯimas gwɩni gworki gweḏi liji leḏi awɩsus. 35na gwune na gaṯɩm geḏi amɩrɩgen nuḏuḏɩni liji nuarno, ləmɩnyo le leḏi awɩsus, əḏi gwiro gwiji gwun gwate gwilɩŋiḏi nuarno, liji leḏi awɩsus laṯɩdɩme duno gwun gwubuḏo gweḏi arṯimas, na gwaŋ gwun gwubɩliḏo kanyin no? 36na ŋiro dino gwiji gwate gwun gwəṯi ŋɩma gwade ŋuɽuna ŋeno no, ŋiŋir nyalaji nyɩkwom aṯanyarra dino kwuḏon ŋate ŋilɩŋiḏanyalo no. 37gi gwune limajigwuluḏɩjo liji leno ŋɩne lun late laṯape ŋɩdio ŋwuɽama ŋeḏi lɩdunu leḏi elo na late laṯɩnḏene eloŋu gwalo no. 38na dino na ḏa ḏimiṯrius na liji lun laṯiṯi jaba gi ŋu ləṯi ŋuɽuna ŋe ḏikiḏiḏia gwiji gwe, əcərio yo na jaḏi jo, ouwɩricɩlo alicɩgiḏi laginŋu. 39namɩni ḏa nyalmabunyi ŋuɽuna ŋədi ŋiro kaja nyalmɩni apa kəcərio. 40gwəti, yayijakɩmi ŋuɽun ŋun ŋarrɩlo gwunanyine, na anate nəṯɩn ŋuɽuna ŋe ḏuməḏo no. 41na gwune nuumə dino nuŋwiri nyəŋəje lono.
Currently Selected:
ŋɩru ŋun ŋapɩlo duwəjo 19: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
