ŋɩru ŋun ŋapɩlo duwəjo 8
8
asa 8
ḏiḏagɩɽina na ḏiwɩreḏelo ḏeḏi lɩkɩrisṯin
1na gi lamon lono ŋuɽun ŋijo naṯɩldagɩɽini kɩniso gworki geḏi urucəlim; na liji wei leḏi kɩniso wɩreḏelo kalo geḏi yauḏia na samɩra, namɩni duwəjo jiga cucun. 2na ləmɩnyo lun laṯɩḏonye eloŋu nalape isṯapanusŋ nalkwuri nalərɩḏo gworki. 3naṯi sawul wɩriga kɩniso ge gworki, naṯuəḏiḏi gi lɩdunu gi lɩdunu, nugwuɽoḏa ləmɩnyəŋe na la naṯulgele kɩrkon.
bilibus gwo samɩra
4na luŋa lun lɩwɩreḏelo nalwele kalo wei naṯɩluməḏɩjo liji ŋuɽuna ŋeḏi yecu. 5na bilibus gwuloḏo kamɩrɩgen yun yan samɩra nuuməḏɩjo liji kɩrisṯo gwe. 6na liji diŋɩni muma lulo le letɩdo ŋuɽuna ŋun ŋuməḏɩlo bilibus, gwune nalḏiŋɩni nalaŋu ŋuɽuna ŋun ŋɩbuḏo ŋun ŋapulo. 7gi gwune na diŋerom əri gwula gwubuḏo naldu gi liji ganu lutu lun lijilɩne; na lutu lun limɩde ganu mɩdeḏ na jɩbɩjo nalgelini muma. 8na ḏidila ganu je ḏɩbuḏo kamɩrɩgen yeno.
simian gwun gwiro ŋuɽi
9na gwiji gwete je gwan simian gwun gwiro ŋuɽi kamɩrɩgen yeno, naṯuobeje liji ga ṯuṯ leḏi samɩra naṯuarno gwiro gwiji gwubuḏo. 10naṯi liji wei deŋɩnejo lun lɩtilɩti na lun lɩbuḏo, nalarnno gwiji kweno gwiro ŋɩma ŋeḏi elo ŋun ŋɩbuḏo. 11naṯɩldeŋɩnejo gi gwune naṯulobeje ga ṯuṯ ŋuɽi ŋe ŋuŋun ŋwamon ŋwuṯu ŋun ŋaṯulgele. 12namɩni gwune nalməṯo ŋuɽuna ŋun ŋaṯɩli bilibus uməḏɩjo ŋeḏi ŋele ŋeḏi elo na ŋan jiri jeḏi yecu kɩrisṯo, luŋa nalbabṯaijɩni ləmɩnyo na la dino. 13na simian dino nuəmɩnyi nubabṯaijɩni nalɩje bilibus gwe. nuobaga ṯuṯ gwune nuaŋu ŋuɽuna ŋun ŋɩbuḏo ŋun ŋobeḏɩŋe liji ga ṯuṯ ŋun ŋapulo.
buṯrus na yuwana lo samɩra
14gwune na duwəjo dun dijo urucəlim naldiŋɩni liji leḏi samɩra lɩməməṯo ŋuɽuna ŋeḏi elo, nalwele buṯrusŋaije yuwana gwe, 15lun lɩgwulu naluməḏəṯɩjo eloŋu lagin kani alməṯo gwuɽɩwə gwun gwɩpiḏo pɽul; 16gi gwune gwuɽɩwə gwun gwɩpiḏo pɽul gwijɩre gwate gwumangwuləḏə gwiji elo gwete lagin no, luŋa libabṯaijinu jiri je jeḏi gwele gwun gwan yecu kuwei. 17nalɩngele di elo nalməṯo gwuɽɩwə gwun gwɩpiḏo pɽul. 18gwune na simian aŋu lɩmani duwəjo gele di elo na gwuɽɩwə gwun gwɩpiḏo pɽul gwuləḏə lagin, nuar lulḏəḏə əlgɩrucə, 19nuleicɩno, ḏəḏiŋine dino ŋɩma ŋeno kani ḏa nyimangele di kwiji elo ŋuməṯo gwuɽɩwə gwun gwɩpiḏo pɽul. 20na buṯrus eicɩno, əlgɩrucu yuŋa yanyayai ganu gi gwune arano ŋa gweḏila ḏiḏəḏo ḏeḏi elo əlgɩrucə. 21ŋa gwate gwəṯəne gala na ŋɩdi ŋədi ŋuɽun ŋeno no, gi gwune ḏugwor ḏuŋa ḏate ḏiŋir gi jei ganu jeḏi elo no. 22na ŋiro dino wɩrla ŋa ŋuɽuna ŋuŋa ŋeno ŋun ŋɩki ŋuməḏɩjo gwelɩnya kalo ge ḏuməḏɩno ḏe ḏugwor ḏuŋa, aŋani elo ḏuḏɩjo ganu; 23na nyi gwaŋaḏaŋa ḏro ḏuŋa ḏiɽi naŋakanano ŋuɽun ŋɩki. 24na simian wɩrlijo ŋuɽuna nueicɩno, uməḏəṯijɩl gwelɩnya lugwi ŋuɽun ŋun ŋuməḏanyalo ŋo ŋila lugwi. 25na gwune naliteije ŋuɽuna ga naluməḏɩjo ŋuɽuna ŋeḏi elo, nalaɽuwe urucəlim naṯɩluməḏɩjo liji ŋwurgwom ŋwutu ŋwedi samɩra ŋuɽuna ŋiŋir ŋeḏi yecu.
bilibus na ḏomeɽe ḏun ḏiro abasi
26na gwiji gweḏi kanyin gweḏi gwele gwun gwiro elo uməḏɩjo bilibusŋ nueicɩno, diɽu ŋele gi ṯaṯ ḏun ḏaṯɩwele gelio gwe dun ḏaṯɩgwulə urucəlim nuṯɩmi gasa. ṯeno ḏaṯele gi jaɽe ganu. 27nudiɽi nuwele. na gwiji gwete gweḏi abasi, gwun gwiro ḏomeɽe gwun gwəṯi ŋelɩnya ŋɩbuḏo ŋeḏi ŋele ŋeḏi gwele gweḏi abasi gwun gwiro gwa gwan kandaka, nuwele urucəlim gi ḏorṯeḏa eloŋu. na ŋu gwiro wəkil gwe ḏɩbona wei ḏeḏi gwele, 28na gwune nuaɽuwa ṯɩrɩbil ḏe ḏuŋun nuəgɩri gɩḏam geḏi nebi gwun gwan isaia. 29na gwuɽɩwə gwun gwɩpiḏo pɽul eico bilibusŋ no, wiḏi gɩṯo ŋabo gi ṯɩrɩbil ṯono. 30na bilibus eneḏeṯe lugwun nudiŋɩni gwəgɩri ŋuɽuna ŋeḏi nebi gwun gwan isaia nueicɩno, ŋilɩŋiḏəlo ŋe ŋəgɩri ela? 31nueicɩno, ŋillɩŋe galakwe ḏa gwiji mete gwiaŋijo no? nubunyi bilibusŋ ŋwabo ŋwujiga gɩṯo lugwun. 32galo gun gijo kɩḏam gun gəgɩruŋu ŋeḏi elo gar dino;
ŋu gwuluḏɩlo gi goŋol geḏi ḏuga;
na gi gwune goŋol gun goga gaṯɩje nyɩkwom gi jei ganu
jeḏi gwiji gwun gwaṯiti jola juŋun,
numəṯo linyu luŋun.
33gi gwune nuro gi jei ganu jeḏi liji gwɩti naṯɩldonye,
gwalakɩmi ŋuɽun ŋe ŋun ŋɩḏuḏɩnu ga.
eḏi gwiro gwanumə ga gwan liji luŋun?
na ḏɩmiḏa ḏuŋun ḏiməbɩrini kɩḏilio.
34na ḏomeɽe uməḏɩjo bilibusŋ nueicɩno, nyi gwar gwaɽoṯeḏe lugwuŋa, əḏi gwiro gwuməḏɩjo gwe nebi dino? ŋan gwulo gwuŋun i gwiji gwiro kaja a? 35na bilibus umə wɽi uro ŋuɽun ŋeno ŋun ŋəgɩrilo ḏomeɽe kɩḏam geḏi elo, nuəŋijo ŋuɽuna ŋiŋir ŋeḏi yecu. 36gwune naliwele gi ṯaṯ nalbuje ŋau, na ḏomeɽe arno, eʼe ŋau. gwudaro gwakəjɩnyi nyi gwababṯaijɩni? 37na bilibus eicɩno, ḏa ŋa məmɩnyi ḏugwor ḏe ḏuŋa wei, naŋandro. nuwɩrlijo ŋuɽuna nueicɩno, nyi gwəmɩnyu niarno yecu kɩrisṯo gwiro ŋaɽe ŋeḏi elo. 38nugele ŋuɽuna laḏuḏɩni ṯɩrɩbilə nalgwuli ŋau ganu berene bilibusŋa ḏomeɽe ḏe, nubabṯaije. 39gwune nalabuḏa ŋau ganu, na gwuɽɩwə gweḏi gwele gwun gwiro elo əbɩri bilibusŋ nyɩkwom, gwate man ḏomeɽe aŋu minu no, na ḏomeɽe wele gi ṯaṯ duŋun gwidilo ganu. 40na bilibus buḏini asḏuḏ naṯɩwele kɩlɩgi ganu gi jɩmɩrɩgen wei nuluməḏɩjo ŋuɽuna ŋiŋir ŋeḏi yecu kəbe nuṯɩmi gesaria.
Currently Selected:
ŋɩru ŋun ŋapɩlo duwəjo 8: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
