ŋɩru ŋun ŋapɩlo duwəjo 7
7
asa 7
ŋuɽun ŋeḏi isṯapanus
1na gwele gweḏi jɩsis eicɩno, ŋuɽun ŋeno ŋiro dino a? 2na isṯapanus arno, lɩmagəri na babaŋa, diŋɩnɩl, elo gwe ḏoɽeḏa gwaŋinu ḏi baba gwage gwan ibraim kaja ge gijuge kamɩrɩgen gi jɩbɩrio ganu je ḏɩrawe gwerre ganu gwate maje aran no, 3nueicɩno, tuḏi kamɩrɩgen yuŋa na liji luŋa, ŋila kamɩrɩgen yun yaŋaŋajo. 4nudu kamɩrɩgen yeḏi likalɩdania nuje aran. na gwune na baba gwuŋun ai na elo gwuloḏa ŋɩnəwei nugele kamɩɽɩgen yun yijanyane. 5na gwate man elo ḏəḏə ŋɩdio kalo kono no, awe, na galo gate gijo gun gele ŋwara ŋwuŋun elo no, na gwune gwijɩre gwate gwəṯi ŋaɽe no, na elo uməḏɩjo gwuḏəḏə gala kono na nyaɽe nyuŋun aldɩme nuro gagin. 6na elo umə dino nuarno, nyaɽe nyuŋun nyajaḏaṯa kamɩrɩgen yiro kaja, nal liji duji lɩwainy, naṯɩlərri ŋɩdigino jɩḏɩiilio jɩnei kwoɽo. 7namɩni elo arno, nyi gwakɩmi liji leno lun lar laladuji lɩwainy; na luŋa laje lədu naliŋiorṯeḏa kalo keno. 8na eloŋa kaii ŋuɽuna ibraim gwe ŋeḏi uɽəno. na ibraim lɩŋe isakŋ na ŋwune na ŋwamon ro duba nuɽə. na isak lɩŋe yagubŋ, na yagub lɩŋe nyaɽe di na gwuttən nyun nyiro lɩgwurninyo lun luɽun. 9na lɩgwurninyo liɽi ganu lɩbuḏu gi dugwor ɽɩɽir gi igo, naleḏɩla yusibŋ masɩr; naṯɩlmɩnje elo gwe, 10nukədə ga gi ḏɩḏia ḏuŋun wei, nuḏəḏə ḏiŋiriḏa na ḏilɩŋeḏa gi jei ganu jeḏi gwele gweḏi masɩr gwun gwan parouun, nuduji mudir gweḏi masɩr na gweḏi lɩdunu luŋun wei. 11na jaŋu je jɩbuḏo gi jɩmɩrɩgen wei jeḏi masɩr na kanan, na ḏɩḏia ḏutu, na lɩgwurninyo lage late lɩmanbuje ŋɩjio ŋe ḏiṯa no. 12na yagub diŋɩni ŋwon ŋwo masɩr, nuwəje lɩgurninyo lage gi lamon leḏi gwerre. 13na gwune nalaɽuwa ŋwara na yusib aŋinijo lɩmegin, na liji leḏi yusib nalaŋinijo parouunŋ. 14na yusib wəje ŋuɽuna ḏi baba gwuŋun gwan yagub na liji wei kəriḏ yuŋun, nulorniḏa alwila lugwun, na luŋa wei liro ḏuɽi kwoɽoṯəɽɩl na ṯoḏɩne. 15na dino na yagub gwulə masɩr, nuai na lɩgwurninyo lage dino. 16nalapa nalkwuri kamɩrɩgen yun yan sakim, kil gun giḏɩli ibraim əlgɩrucə geḏi nyaɽe nyeḏi amur gweḏi sakim.
17gwune na gaja je gɩṯo gun gɩṯɩmige ŋuɽun ŋun ŋuməḏɩjɩlo elo ibraimŋ gwerre, na liji uti gworki masɩr, 18kəbe na gwele diɽo gwiro kaja gwun gwate gwilɩŋiḏi yusibŋ no. 19na ŋu nugele ŋuɽuna gi liji lage ŋe ḏirdəḏeico, nuərrɩjo lɩgwurninyo lage ŋɩdigino, naṯɩlwini nyaɽe nyagin kaja nyun nyitinyiti nyo nyəmɩḏe. 20na kaja kono musa gwilɩŋinu, na ŋu gwiŋir gworki gi jei ganu jeḏi elo, naldɩme luwəŋe ṯəɽɩl kwu dunu gweḏi baba gwuŋun. 21na gwune nalape nalgele kaja, na ŋera ŋeḏi parouun ape nuduji gi ŋaɽe ŋuŋun. 22na musa naṯualɩmini ŋuɽuna wei ŋeḏi lɩmasɩr, na gwubɩɽe nanu ŋuɽun ŋe na ŋɩru ŋe. 23na gwune nuro jɩḏilio ḏuɽi kwoɽo na jei enyejo lɩmegin lun liro liji leḏi isreiyil. 24gwune nuaŋu gwumasɩr gwɩpiḏi megin, nugelejo uwə gwun gwiḏɩmiḏɩnu, numɩɽi gwumasɩr nuɽinye. 25na ŋu gwarno lɩmegin ladiŋɩni galakwe gi ḏi ḏuŋun lal elo kədə ga, namɩni luŋa late lilɩŋiḏi ŋuɽuna no. 26na gileganu nuaɽu nuaŋini lagin gwune nalpiḏe nuarno luldɩliḏi gi jei nuleicɩno, ŋwolɩŋa, nyalro ŋɩmaga, gwudaro gəko na nyar lapiḏe liro ŋɩmaga? 27na ŋu gwun gwɩpiḏɩlo megin gwe nuṯɩŋa nueicɩno, əḏi gwiro gwidujiaŋa gwele gwəri na gaḏi gəri? 28ŋa gwar gwijinye gi kelenyine ɽinyɩḏo gwumasɩr a? 29na ŋuɽun ŋeno na musa abɩre, nujiga maḏyan nuro gili, na ŋɩnəwei nulɩŋe nyaɽe nyittən.
30gwune na jɩḏilio ṯɩmi jun jiro ḏuɽi kwoɽo, na gwiji gweḏi kanyin nuaŋinijo kiḏɩwer gi lɩrgwom lun lan sina ḏiŋɩla ḏe ḏeḏi igo kwaɽe. 31na musa aŋu nuobega ṯuṯ gi daŋaḏa, na gwune nudaka nuar gwunaŋu na ŋwal ŋweḏi gwele gwun gwiro elo gwulə lugwun. 32naleicɩno, nyi gwiro elo gweḏi lɩgwurnəlo, na elo gweḏi ibraim, na elo gweḏi isak, na elo gweḏi yagub. na musa ubəga gwate məṯi ŋɩma gwunŋalaḏe no. 33na gwele eico gwun gwiro elo no, wələḏi jɩwɩḏia juŋa ga ŋwara, kalo gun gɩḏuḏɩnənə elo giro gwɩnyəm gwun gwɩpiḏo pɽul. 34nyi gwaŋəḏi muma ḏɩḏia ḏeḏi liji linyi lun lijo masɩr, nidiŋɩni gwula gwagin nigwulə lilkədə ga. gwunnɩno wila, ŋwawəje masɩr.
35musa kweno gwun gwudonyilo nalarno, əḏi gwidujiaŋa gwele na gaḏi, ŋu gwiro gwun wəjo elo nuro gwele na gwiji gwe ḏɩkədəḏə liji ga ḏi ḏe ḏeḏi gwiji gweḏi kanyin gwun gwaŋinɩjulo kwaɽe. 36nal gwiji kwono gwulo nalwele gwune nugele ŋɩdio ŋun ŋɩmobeje liji ga ṯuṯ na ŋuɽun ŋun ŋɩbuḏo kamɩrɩgen yeḏi masɩr, na gi ḏɩrawe ḏun ḏan ḏure, na kiḏɩwer jɩḏilio duɽi kwoɽo. 37musa kweno gwiro gwun gwuməḏɩjo liji leḏi isreiyil, elo gwajidiɽiju nebiŋ gi lɩmagalo lalo gi gwune diɽinyi. 38ŋu kweno gwiro gwun gwijo kɩniso kiḏɩwer, luŋa gwiji gwe gweḏi kanyin gwun gwuməḏɩlo gwe gi lɩrgwom lun lan sina, luŋa lɩgwurninyo le lage, na ŋu məṯi ŋuɽuna ŋɩmiḏo ŋijilḏəḏa. 39namɩni lgɩwurninyo lage late maldeŋɩneje no; nalḏeṯɩŋa lagin nalar gi dugwor ganu no laɽuwe masɩr. 40naleico arunŋ no, gelijijɩne eloŋaije ŋwijildərəḏɩjo kɩɽelo. na musa kweno gwun mijigwuloḏɩje masɩr, anate nimalɩŋe ŋuɽuna ŋun ŋɩmila lugwun no. 41na ŋwamon ŋwono nalkade galajala galḏugɩjo, naldile ganu ŋɩdi ŋun ŋɩkadɩlo di de dagin. 42na elo wɩrla ganu lagin nuouwɩrico naṯɩlorṯeḏa ŋɩdio ŋeḏi kanyin ŋun ŋaṯoɽa ga ŋiro gi gwune ŋulinu kɩḏam geḏi nebɩŋa,
nyaŋa leḏi isreiyil, nyalḏəḏi ŋɩdio ga dino na ḏiḏuga
kiḏɩwer jɩḏilio ḏuɽi kwoɽo a?
43gwerkwe nya lape gibar geḏi moluk,
na ludum leḏi elo gwalo gwan miraban,
ŋɩdi ŋun ŋɩkədənyalo naṯanyalorṯeḏa.
namɩni nyi gwugwuluḏaje uro babil.
44na lɩgwurninyo lage ləṯi gibar ge ḏəŋinio ḏi elo kiḏɩwer, gi gwune ŋuɽun ŋun ŋigelɩlo elo gwun gwuməḏɩju musaŋ nulkade gi gwune aŋijulo. 45na dino lɩgwurninyo lage gwune naləḏi yasuaŋale nalapa gibar kamɩrɩgen yeḏi liji lun liro kaja, lun lɩmal elo iri gi jei ganu jeḏi lɩgwurninyo lage. naldɩme gibar keno kəbe ŋwamon ŋweḏi ḏauuḏ. 46nubuje ḏiŋiriḏa gi jei ganu jeḏi elo, nubunyi gwakade duno gweḏi elo gweḏi yagub. 47namɩni suliman rijo duno. 48namɩni gwun gwolenelo wei gwate gwaṯɩje gi lɩdunu lun luṯinu di de no, gi gwune arne nebi,
49kanyin gwiro gɩḏoɽ geḏi ŋele ŋinyi
namɩni gwɩnyəm gwiro gɩḏoɽ geḏi ŋwara ŋwinyi.
na gwele gwun gwiro elo arno, nya lar liyuṯijo duno gwɩrṯa?
na galo gaḏa gar ginobe uwə ŋwe?
50di ḏinyi dədu digelo ŋɩdio ŋe wei na?
51nyaŋa lun laṯidonyeḏe kaja, na lun late luɽəno gi dugwor ganu dalo na nəni nalo no, nyaŋa bubruṯ nyalaṯakaḏaico gwuɽɩwə gwun gwɩpiḏo pɽul kaja. gi gwune dujɩne babaŋa lalo, nyaŋa dino na nyanarre. 52nebi gwiro gwura ḏi nebɩŋa gwun gwate man lɩgwurninyo lalo dagɩɽini no? luŋa lɩmalɩɽinye lun luməḏɩjɩlo gwerre nalarno gwila gwun gwiŋir. na gwunne nyalro luga na nyalmaɽinyɩḏe. 53nyaŋa liro lun lɩmaməṯo ŋuɽuna ŋun ŋigelijɩlo elo musaŋ ŋun ŋiḏəḏijɩlo liji leḏi kanyin. nate nanyaldɩme no.
ḏaiya ḏeḏi isṯapanus
54gwune naldiŋɩni ŋuɽuna ŋeno nalɩḏuge gi dugwor ganu dagin naldəje jɩŋaḏ nanu. 55namɩni isṯapanus enyeḏe gwuɽɩwə ganu gwun gwɩpiḏo pɽul, nuŋalaḏe kanyin nuaŋu ḏoɽeḏa ḏeḏi elo, na yecu ḏuḏɩni gi ḏi ḏun ḏiro ḏiŋir ḏeḏi elo. 56nuarno, nyi maŋu kanyinŋ miḏini na ŋaɽe ŋeḏi liji ŋɩḏuḏɩnu gi ḏi ḏun ḏiro ḏiŋir ḏeḏi elo. 57naləri gwula gworki nalkɩɽɩbəne nəni nagin naleneḏeṯe nanu ŋuɽun ŋe ŋetɩdo, 58nalideiji amɩrɩgen ḏuɽo ḏe nalauce nyɩdol nye. na liji lun laŋiḏi nalgelejo jiria jagin ga ŋwara ŋweḏi gamal gun gan sawul. 59nalauce isṯapanusŋ nyɩdol nye gwune orniḏu eloŋu nueicɩno, gwele gwun gwan yecu, məṯi gwuɽɩwə gwi. 60nujiga ŋwurko ŋwe nuəri gwula gwubuḏo nueicɩno, gwele gwi, ŋalḏuɽəḏɩjo ŋuɽuna ŋagin ŋun ŋɩki no. gwune nuar dino nuai. na sawul gwəmɩnyu gwalɽinye.
Currently Selected:
ŋɩru ŋun ŋapɩlo duwəjo 7: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
