yuwana 10
10
asa 10
gwaɽa gwun gwiŋir
1gwerkwe, gwerkwe ganu, nyi gweiceijɩno, gwun gwate gwəḏi kouwɩr ye ḏɩgara no, numɩni abo gi ṯaṯ ḏiro kaja gwiro gwuɽam na gwɩdigin; 2namɩni gwun gwəḏi kouwɩr gwiro gwaɽa gweḏi joŋol. 3na gwun gwaṯɩdɩme ouwɩr gwaṯiḏɩjo, na joŋol digɩni gwal gwugun; nuornide jogolia wei jugun jiri nuldərɩjo. 4gwune nudi joŋolia juŋun nuldərɩjo, na joŋol gwuje gi gwune lɩŋiḏɩlo ŋwal gwuŋun. 5jate jaṯɩgwujane gwiji gwiro kaja no, nalabɩre gi gwune jate jilɩŋiḏi ŋwal ŋweḏi gwiji gwiro kaja no. 6luməḏɩjɩlo yecu ŋuɽuna ŋeno ŋun ŋɩlɩbo naṯɩlmɩni, lɩŋeḏa ŋuɽuna ŋun ŋuməḏɩjulɩlo no.
7nuaɽu nal yecu uməḏɩjo mɩna, nuleicɩno, gwerkwe, gwerkwe ganu, nyi gweiceijɩno, nyi gwiro ouwɩr ye ḏigara. 8wei lun lɩwiḏi gwerre lugwi liro luɽam na lɩdigin, namɩni nate naṯi joŋol diŋɩni ŋuɽuna ŋagin no. 9nyi gwiro ouwɩr; na ḏa gwiji gwete gwuməḏi lugwi gwəkədəḏɩni ga, gwaṯəḏi na gwədu na gwabuje ḏiṯa. 10gwuɽam gwila gi ḏapa ŋuɽama, na gi ḏiɽinyɩḏa na gi ḏɩkeḏa kuwei. nyi gwuwiḏi lilmiḏi na ḏɩmiḏa ḏagin miḏane. 11nyi gwiro gwaɽa gwiŋir. gwaɽa gwiŋir gwaiyo gwan joŋolia juŋun. 12namɩni gwun gwiro gaḏam gwate gwiro gwaɽa no na joŋol juŋun jate jiro no, nuaŋu gamɽainya nuwila, nuwalane gi joŋol nuabɩre, nal gamɽainy umi nuwɩri galo joŋol je. 13gaḏam gabɩro gi gwune duḏu gaḏam, nate naṯugico joŋolia gei no. 14nyi gwiro gwaɽa gwiŋir, nilɩŋe joŋolia jinyi, ni joŋol jinyi lɩŋe. 15gwiro gi gwune lɩŋiḏinyi baba, dino nilɩŋe babaŋ, niai gwan joŋolia galo. 16na nyi gwəṯi joŋolia jiro kaja jun jate jeḏi ḏɩgara ṯeno no, arram jilapa dino, na jaje jadiŋɩni ŋwal ŋwinyi na luiny laro letɩdo na gwaɽa gwetɩdo. 17na gwan ŋuɽun ŋeno baba gwinyiəmɩnyi gwune əmɩnyi niai nimiḏe mɩna. 18gwiji gwate gwinyiapa ḏɩmiḏa no, namɩni nyi gwəmɩnyu kaja gi niai. nyi gwəṯi ŋelɩnya gwai na nyi gwəṯi ŋelɩnya gwəmɩḏe mɩna. baba gwinyi gwiḏəḏi ŋuɽuna ŋeno.
19na liju kenyɩḏiḏi ganu gwan ŋuɽun ŋeno mɩna. 20nalar lutu kworo lagin no, ŋu gwəṯi diŋeroma na gwiro gɩɽilo, gwudaro gəko naṯanyadiŋɩni ŋuɽuna ŋuŋun? 21na liro kaja arno, ŋuɽun ŋeno ŋate ŋiro ŋuɽun ŋeḏi gwiji gwun gwəṯi ḏiŋeroma no. ḏiŋerom ḏəṯi ŋɩma ḏuɽi jei ganu jeḏi gwiji gwun gwɩrimə gi jei a?
yecu gwo kɩmuri geḏi takɩris urucəlim
22na ŋɩmuri gijo geḏi takɩris deḏi dunu gweḏi elo gwun gwubuḏo urucəlim. na ḏoɽom ḏiro; 23na yecu wewele kwu dunu gweḏi elo gwun gwubuḏo karda ganu geḏi suliman. 24na liju aɽuwaḏa ldu lugwun naluɽeico galo, naleicɩno, jaḏo gwiro ŋa gwijuməḏɩjo ŋuɽuna. ŋeno? ḏa ŋa maro kɩrisṯo uməḏɩjije muma. 25nal yecu wɩrlijo ŋuɽuna nuleicɩno, nyi gwuməḏɩjaje nyamɩni ate nanyəmɩnyi no. na ŋɩru ŋun ŋapɩlo jiri je jeḏi baba gwinyi na ŋɩru ŋeno ŋaṯɩnyiaŋiḏi; 26namɩni nya late ləmɩnyu no gi gwune ate duḏanya joŋol jinyi no, gi gwune uməḏɩjijɩne. 27joŋol jinyi jaṯɩḏiŋɩni ŋwal ŋwinyi, nilɩŋe nilgwujane, 28nilmiḏi gi gɩḏilio na jate jai minu no, na gwiji gwate gwete juŋwilwala gəbu gi ḏi ḏinyi no. 29baba gwinyi gwun gwiḏəḏɩlo gwunəno wei, na gwiji gwate gwiro kaja gwəṯi ŋɩma julwala babaŋ gwinyi gi ḏi ganu gəbu no. 30nanaŋa baba gwe gwinyi andro letɩdo.
ḏikiḏiḏia ḏeḏi liji
31na liju aɽu naluṯa nyɩdolia gwalauce. 32nal yecu wɩrlijo ŋuɽuna nuleicɩno, nyi majaŋijo ŋɩru ŋutu ŋun ŋiŋir ḏi baba gwinyi. ŋɩru ŋiro ŋaḏa ŋeno iro ŋilɩŋauce nyɩdol nye? 33na liju wɩrlijo ŋuɽuna naleicɩno, anate laŋauce kalo geḏi ŋɩru ŋun ŋiŋir no, namɩni laŋauce gi gwune ga gwaṯɩḏenɩḏi na ŋa gwiro gwiji namɩni duji gwula gwuŋa elo. 34nal yecu wɩrlijo ŋuɽuna nuleicɩno, ŋate ŋulinu kɩḏam geḏi ŋuɽun ŋalo ŋun ŋigelijɩlo elo musaŋ, nyi gwarno, nyaŋa liro eloŋa na? 35na ḏa ŋu lɩmuleico eloŋa, luŋa lun lɩmani ŋuɽun ŋeḏi elo wila, na gɩḏam geḏi elo gate gake no, 36na gwun gwɩpiḏi baba pɽul nuwəjo kɩḏilio, nanyeicɩno, ŋa gwaṯɩḏenɩḏi, gi gwune nyi gwarno, nyi gwiro ŋaɽe ŋeḏi elo a? 37ḏa nyi gwate mape ŋɩru ŋeḏi baba gwinyi no, nya lo ligwəmɩnyi; 38namɩni ḏa ŋimilape na ḏa nya late lɩmɩnyiəmɩnyi no, nyamɩni əmɩnyi ŋɩru, kani nyalɩŋe nanyəmɩnyi nyarno baba gwo lugwi na nyi gwo lugwun. 39nalaɽu nalarno gwalməṯo; numɩni ubɩḏɩni gi di ganu dagin.
40nuwele numuri mɩna gi ḏuɽo ganu gi ḏɩrawe ḏun ḏan urdun kalo gun gaṯɩn yuwana babṯaijiḏi gwerre nujiga ŋɩnəwei. 41nalwila lugwun lutu, naleicɩno, yuwana gwate manape ŋuɽuna ŋun ŋɩbuḏo no, namɩni wei ŋun ŋuməḏɩjilɩlo yuwana ŋan gwiji kweno ŋiro gwerkwe. 42naləmɩnyi lutu ŋɩnəwei.
Currently Selected:
yuwana 10: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
