yuwana 11

asa 11

ḏiḏiɽo gi ḏaiya ḏeḏi liasar

1na gwiji je gwun gweḏeḏo nanu gwan liasar gweḏi beṯiniya gwun gwiro lɩrgwom leḏi mariam na megin gwun gwiro gwa gwan marṯa. 2na liasar gwun gweḏeḏo nanu gwiro megin gweḏi mariam kweno gwun gwuwɩrṯi gwelɩnya gwun gwiro elo ŋɩḏini ŋe, ki numuje ŋwara ŋwuŋun əɽu ye yuŋun. 3na lɩmegin leno lɩttən lun liro la nalwəje ŋuɽuna lugwun, naleicɩno, gwele gwəri, ŋu gwun gwaṯaŋəmɩnyi gwo gweḏeḏo nanu. 4gwune na yecu diŋɩni nuarno, ḏeḏeḏa nanu ṯeno ḏədu ḏe ḏaiya no, namɩni gwan ḏɩbuḏia ḏeḏi elo, kani alḏibuḏi ŋaɽe ŋeḏi elo. 5na yecu gwaṯəmɩnyi marṯaŋ na megin gwun gwiro gwa na liasar. 6gwune nudiŋɩni gwo gweḏeḏo nanu nujanaga kalo gun gijune ŋwamon ŋwɩttən; 7na ŋɩno gɩdo wɽi nueico calɩmis juŋun no, ilwele yauḏia mɩna. 8na calɩmis juŋun eicɩno, mualɩm gwəri, gwunnɩno liju lar laŋauce nyɩdol nye, namɩni ar gwaɽuwe ŋɩnəwei mɩna a? 9nal yecu wɩrlijo ŋuɽuna nuleicɩno, lamon late ləṯi sa di na gwuttən na? ḏa gwiji maṯuwele anyine gwate gwobɩlkəḏɩni no, gi gwune gwaṯaŋu bure gweḏi gɩḏilio keno. 10namɩni ḏa gwiji maṯele gilio gwobɩlkəḏɩni gi gwune bure gwate lugwun no. 11nuluməḏɩjo ŋuɽuna ŋeno, kɩnadi gɩdo nuleicɩno, liasar gwun gwiro maḏəri maḏɩre; namɩni nyi gwele gwidiɽio gwar. 12na calɩmis juŋun eicɩno, gwele gwəri, ḏa ŋu maḏɩre ŋu gwaje gwadone kaja. 13namɩni yecu gwuməḏəṯi gi ḏaiya ḏuŋun. namɩni luŋa nalarno gwuməḏəṯi gi diḏɩra ŋwar. 14nal yecu ḏəḏɩjo ŋuɽuna ga muma nuleicɩno, liasar mai. 15na nyi gwadile ganu gwan nyaŋa nyi gwate gwijo ŋɩnəwei no kani nyəmɩnyi. namɩni ilwele lugwun. 16na ŋiro dino ṯoma gwun gwan gwərɩḏɩnu, nueico calɩmis jun jaṯɩljije no, ilwele liŋə dino kani ilai kal gete. 17na yecu wila nudiŋɩnno maje ŋwamon kwoɽo kil. 18na beṯɩniya gwijo gɩṯo urucəlim gwaro mil gwuttən. 19na lutu lun liro liju lɩmila ḏi marṯaŋa mariam gwe nalimoɽe ganu kalo ge ḏaiya ḏeḏi megin gwagin. 20gwune na marṯa diŋɩni yecu gwar gwila nutu nalgwobeḏa; namɩni mariam nujɩre gwijiga dunu. 21na ŋiro dino na marṯa uməḏɩjo yecuŋ nueicɩno, gwele gwi, ḏa ŋa gwijo ŋɩne magəri gwate gwaŋai no. 22namɩni gwunnɩno dino nyi gwilɩŋiḏi wei ŋun ŋɩɽoṯeḏalo ḏi elo ŋaŋal elo ḏəḏə. 23na yecu eicɩno, magalo gwediɽi. 24na marṯa eicɩno, nyi gwilɩŋiḏi gwediɽi gi ḏidiɽo gi lamon leḏi gɩdo. 25na yecu eicɩno, nyi gwiro ḏidiɽo gi ḏaiya na ḏɩmiḏa, gwun gwinyiəmɩnyi na ḏa gwimai na gwəmɩḏe, 26na wei lun lɩmiḏo naliəmɩnyi late lanai minu no. ŋa gwəmɩnyu ŋuɽuna ŋeno a? 27nueicɩno, i gwele gwi, nyi gwiməmɩnyi niarno, ŋa gwiro kɩrisṯo, ŋaɽe ŋeḏi elo ŋun ŋɩwiḏi kɩḏilio. 28gwune nuuməḏɩjo dino, nuwele nuorniḏaṯe megin gwan mariam ga kaja, nueicɩno, mualɩm gwo ŋɩne na gwo gworniḏaŋa. 29gwune nudiŋɩni dino nudiɽo cou nuwele lugwun. 30namɩni yecu gwore gwate gwumila gi lɩrgwom lono no, namɩni gwijɩre kalo gun gobeḏeṯɩne marṯa gwe. 31na dino liju lun lijiliŋə dunu nalmoɽe ganu, gwune nalaŋu mariamŋ mədiɽo cou nudu, nalgwujane nalarno gwar gwele kil ŋwərio gwula ŋɩnəwei. 32gwune na mariam wila kalo gun gijɩne yecu, nuaŋu nuaici ga ŋwara ganu ŋwuŋun nueicɩno, gwele gwi, da ga gwijo ŋɩne magəri gwate gwaŋai no. 33gwune na yecu aŋu gwəri gwula na liju lun lɩwiḏɩle ləri gwula dino nuubega nuəri gwula gi ḏugwor ganu ḏuŋun. 34nuleicɩno, galo giro gaḏa gɩmanyankwuro? naleicɩno, gwele gwəri, wila ŋaŋaḏa. 35na yecu əri gwula. 36na liju arno, aŋəḏɩl galakwe ŋu gwəmɩnyu. 37nalmɩni ar kworo lagin no, gwiji kweno gwun gwuɽi jei ganu jeḏi gwiji gwun gwɩrimə gi jei gwate gwəṯi ŋɩma gwaŋakajo gwiji kweno gi ḏaiya na? 38na yecu aɽu nuəri gwula kwulo gwuŋun nuwila kil. na gil kono giro gɩmu na gɩdol gijo kouwɩr. 39nal yecu eicɩno, əbɩril gɩḏolia. na marṯa gwun gwiro megin gwun gwiro gwa gweḏi ŋu gwun gwaiyo, nueicɩno, gwele gwəri, ŋu gwowi wɽi; gi gwune maje ŋwamon kwoɽo. 40na yecu eicɩno, nyi gwate gweicaŋa no, ḏa ŋa gwiməmɩnyi ŋa gwaŋu ḏoɽeḏa ḏeḏi elo na? 41naləbɩri gɩḏolia kalo gun gijɩne gwun gwaiyo, na yecu baŋelo nuarno, baba, nyi gweicaŋa sukran gi gwune ŋa gwiminyideŋɩnejo. 42na nyi malɩŋe ŋa gwatɩnyɩḏeŋɩnejo, namɩni gwan liji lun lɩḏuḏɩnu ŋɩne nyi gwar dino, kani aləmɩnyi alarno ŋa gwiro gwun gwuwəjɩŋi. 43gwune nuar dino, nuəri gwula ŋwal ŋwɩbuḏo, liasar tuḏa. 44nuduḏa gwun gwaiyo na di duŋun na ŋwara ŋwuŋun ŋukanu jiria je jeḏi gil, na jei juŋun jimɩɽinu nanu giria ge. nal yecu eicɩno, kədəḏɩl ga nyouwɩrico ŋwuwele.

45na ŋiro dino, lutu lun liro liju lun lɩweləḏi ḏi mariam nalaŋu ŋun ŋapɩlo yecu, nalgwəmɩnyi. 46namɩni kworo lagin nalwele gi lɩbarɩsi nalunəḏɩjo ŋuɽuna ŋun ŋapɩlo yecu.

jɩsis jun jɩbuḏo jikaii ŋuɽuna ŋe ḏaiya ḏeḏi yecu

mṯ. 26:1-5, mks. 14:1-2, lk. 22:1-2

47na dino jɩsis jun jɩbuḏo na lɩbarɩsi nalaɽuwaḏa ldu nalgele əcərio nalarno, ilarra? gi gwune gwiji kweno gwaṯape ŋuɽuna ŋutu ŋun ŋɩbuḏo. 48na ḏa milouwɩrico dino liji wei gwaləmɩnyi na liji leḏi rumiya lila laki gala gage na ŋelɩnya ŋage. 49na gwete lagin gwan kaiyaba gwun gwiro gwele gweḏi jɩsis kɩḏilio kono nuleicɩno, nya late lilɩŋiḏi ŋuɽuna ŋədi no, 50na nya late laniri jei galo nyalanarno, gwiŋir lagalo gwiji gwete gwai gwan liji kani a liji wei ate alai no. 51numɩni ate nunumə ŋuɽuna ŋeno ŋele ŋe ŋuŋun no, namɩni gwiro gwele gweḏi jɩsis kɩḏɩlio kono. nulaŋijo ŋuɽuna yecu gwar gwai gwan liji leḏi amɩrɩgen yeno; 52namɩni gwate gwaiyo gwan liji leḏi amɩrɩgen yeno kuwei no, namɩni dino kani nuwəɽeico nyaɽe ldu nyeḏi elo wei nyun nyuwɩreḏelo. 53na gi lamon lono naluməḏəṯe gwalɽinye. 54na ŋiro dino na yecu wele nate nunaŋini gi jei ganu jeḏi liju no, numɩni wele kalo gun gijo gɩṯo kiḏɩwer, kamɩrɩgen yun yan abraum, na lijoga ŋɩnəwei calɩmis je juŋun.

55na gɩmuri ge ḏouwɩrico geḏi liju gijo gɩṯo, nalabo lutu lun lijo kalo kono urucəlim gwerre gɩmuri ge ḏouwɩrico gate gɩmaje no, algela lula lagin muma. 56naṯɩlbunyi yecuŋ, naṯɩluməḏəṯe laginŋu gwune nalɩḏuḏɩni ga kwu dunu gweḏi elo gwun gwubuḏo, nalarno, nyaŋa larau? ŋu gwate gwila kɩmuri na? 57na jɩsis jun jɩbuḏo na lɩbarɩsi nalgele ŋuɽuna nalarno, ḏa gwilɩŋiḏi gwe gwiji gala, gwaŋaŋiḏi gala kono kani alməṯo.

Currently Selected:

yuwana 11: OTR1966

Highlight

Copy