luka 4

asa 4

ḏɩḏeijo ḏeḏi yecu

mṯ. 4:1-11, mks. 1:12-13

1namɩni yecu aɽuwe gi ḏɩrawe ḏun ḏan urdun nuenyeḏe gwuɽɩwə gwe gwun gwɩpiḏo pɽul, nugwuloḏəṯɩni kiḏɩwer gwuɽɩwə gwe, 2nujiga ŋwamon ḏuɽi kwoɽo ŋaṯi iblis iḏeije ŋu gwate gwiṯɩn ŋɩdio ŋədi ŋwamon ŋweno no, na gwune na ŋwamon ṯɩmi na janu e gɩdo ganu. 3na iblis eicɩno, ḏa ŋa maro ŋaɽe ŋeḏi elo eico gɩḏolia keno no ŋwumɩdini gia. 4na yecu wɩrlijo ŋuɽuna nueicɩno, ŋulinu gia gədu getido gaṯɩmiḏi gwiji no, namɩni ŋuɽun wei ŋun ŋaṯɩduḏo di elo. 5na iblis gwuloḏa gi lɩrgwom elo lun lolelo nuəŋijo ŋelɩnya wei ŋeḏi gɩḏilio gei getɩdo. 6na iblis eicɩno, nyi gwaŋaḏəḏə ŋelɩnya ŋeno wei na ḏɩbona ḏagin, gi gwune ŋimilḏəḏə, na ŋilḏəḏə gwun gwigware; 7na ŋiro dino na ḏa ŋa miculɩjo ga ŋwurko ŋwe ŋaro ŋuŋa wei. 8na yecu wɩrlijo ŋuɽuna nueicɩno, ŋulinu: ŋa gworṯeḏa gwelɩnya gwun gwiro elo gwuŋa na ŋəpijo ŋɩru gwetɩdo. 9nuaɽu nugwuloḏa urucəlim nuḏuḏɩneje ga gi lɽa elo leḏi dunu gweḏi elo gwun gwubuḏo nueicɩno, ḏa ŋa maro ŋaɽe ŋeḏi elo ŋidinɩjo aŋɩna yuŋa ganu uro ŋɩne kwɩnyəm; 10gi gwune ŋulinu:

ŋu gwəḏəḏə liji luŋun leḏi kanyin ŋuɽuna laŋaḏɩme,

11na luŋa laŋape di de dagin

kani ate eaŋa gɩdol obe lara no.

12na yecu wɩrlijo ŋuɽuna nueicɩno, ŋarno, aṯaŋiḏeijo gwelɩnya gwun gwiro elo gwuŋa no. 13na gwune na iblis ṯɩmi ḏɩḏeijo wei nunwalane gaja giti.

yecu gwo nasɩra

mṯ. 4:12-17, mks. 1:14-15

14na yecu aɽuwe ŋɩma ŋe ŋeḏi gwuɽɩwə jalil: na ŋuɽun wɩreḏelo ŋan ŋu gi liji wei ŋwurgwom ŋwun ŋwujeicɩlo galo. 15naṯualɩmiḏe gi lɩdunu lagin leḏi elo na wei naṯɩlbuḏi. 16nuwila nasɩra kalo gun gibəḏəḏune, nuəḏi kwu dunu gweḏi elo gi bubruṯ gi lamon le sabiṯ; nudiɽi gwegiria. 17nalgico gɩḏam ga geḏi isaia gwun gwiro nebi, na gwune nuiḏi gɩḏam nubuje gala gun gulinu dino,

18gwuɽɩwə gweḏi gwele gwun gwiro elo gwaje lugwi,

gi gwune minyiwɩrṯi kani nyiuməḏɩjo liji lun late ləṯi ŋɩdio

no ŋuɽuna ŋiŋir ŋeḏi elo;

gwuwəjɩŋi liluməḏɩjo lun lakɩro dugwor,

na iluməḏɩjo lun likanano ga alkədəḏɩnə ga,

na lun lɩrimə gi jei aluɽe jei ganu,

na ilkədə ga lun liḏɩrṯinu nanu.

19na ilumə gɩḏilio ge geḏi gwele gwun gwiro elo gun giməṯɩnu. 20nulaŋiṯi gɩḏam nuwəɽɩjo gaḏama nujiga; na liji wei lun lijiga kwu dunu gweḏi elo naṯinidəje jei. 21nuleicɩno, gwunnɩno ŋiməṯɩmi ŋeno ŋun ŋulinu kɩḏam geḏi elo gi ḏidiŋɩna ḏalo. 22na liji wei naṯɩldɩteije ga gwan ŋu nalobaga ṯuṯ ŋuɽun ŋe ḏiŋiriḏa ŋun ŋuduḏi gi linyu luŋun. naṯɩlarno, gwədu kwe gwun gwiro ŋaɽe ŋeḏi yusib na? 23nuleicɩno, naŋadaṯi nyalɩnyiuməḏɩjo ŋuɽuna ŋeno ŋun ŋɩlɩbo, ŋa kwe gwiro lakim, miḏi gwula gwuŋa; na ŋɩdi ŋun ŋidiŋɩnanaŋe ŋun ŋarralo kabranaum naŋarrane ŋɩme dino kamɩrɩgen yuŋa. 24nueicɩno, gwerkwe ganu nyi gweiceijɩno, nebi gwatɩn gwun gwaṯɩlnəji kamɩrɩgen yuŋun no. 25na gwerkwe linino lijo lutu isaeiyil ŋwamon ŋweḏi iliya gi gwune laŋiṯine anyin ŋauaŋe jɩḏilio ṯəɽɩl na luwəŋe nyəɽɩl, na dino na jaŋu je jɩbuḏo gi jɩmɩrɩgen wei.

26nuate nuwəje iliyaŋ ḏi gwete lagin no, numɩni weje kwa gwete gwun gwiro gwinino gwun gwijo sarapa kamɩrɩgen yeḏi saida. 27na liji lijo lutu lun liṯɩlo ŋilo isreiyil kaja geḏi ilaisa gwun gwiro nebi, namɩni gwatɩn gwetɩdo maniŋir nanu no, namɩni nouman gwetɩdo gwun gwiro gwiji gweḏi suriya. 28na wei lun lijo kwu dunu gweḏi elo nalenyeḏe ḏɩɽeḏa ḏe ganu gwune naldiŋɩni ŋuɽuna ŋeno. 29naldiɽi naldəje amɩrɩgen gi ḏuɽo, nalgwuloḏa lɩrgwoma gi ḏiɽil lun luṯɩlo amɩrɩgen ŋagin, kani algwuwini uro kwɩnyəm; 30namɩni ŋu nudare kɩlɩgi ganu lagin nuwele.

yecu gwuḏi ḏiŋeroma kwiji gweḏi jaḏarin

mks. 1:21-28

31nugwuli kabranaum kamɩrɩgen yeḏi jalil, nulalɩmi ŋwamon ŋwe sabiṯ. 32nalobaga ṯuṯ gi ḏalɩmia ḏuŋun gi gwune ŋuɽun ŋuŋun ŋiro ŋele ŋe. 33na kwu dunu gweḏi elo gwəmɩnyo gwijo gwəṯi ḏiŋeroma. nuəri gwula ŋwal ŋwɩbuḏo, 34nueicɩno, ŋa gwar anada yecu gweḏi nasɩra? ŋa gwuwiḏi ŋa gwijiɽinya? nyi gwilɩŋiḏaŋa ŋa gwiro gwɩpiḏo pɽul gweḏi elo. 35na yecu lo nueicɩno, ji nyɩkwom; ŋedu lugwun. gwune na ḏiŋerom aici ga kɩlɩgi ganu ki nudu lugwun gwate manḏɩrṯɩni nanu no. 36na luŋa wei nalobaga ṯuṯ, naṯɩlumə laginŋu ŋɩmaga nalarno, ŋuɽun ŋeno ŋɩrṯa? gi gwune ŋele ŋe na ŋɩma ŋe naṯuməḏɩjo ḏiŋeroma naltu. 37na ŋuɽun wɩreḏelo ŋan ŋu kalo wei geḏi amɩrɩgen gun gujeicɩlo galo.

ḏiŋiriḏa nanu ḏeḏi gwunan gweḏi simian gwun gwiro gwa na liji

mṯ. 8:14-17, mks. 1:29-39

38nudiɽi kwu dunu gweḏi eɩo nuəḏi kwu dunu gweḏi simian. na gwunən gweḏi simian gwun gwiro gwa gweḏəḏə nanu. aŋɩnu yuŋun yɩbuḏu nanu ɽɩɽir, nalɽoṯeḏa gwan ŋu. 39nunŋələḏəṯɩni ganu nulo ŋɩɽainy, nan ŋɩɽainy walane. na cou nudiɽi nuləpijo ŋɩru.

40gwune na anyin ar yabɩre nal liji gwuluḏɩjo wei lun ləṯi ŋɩɽainy ŋun ŋiro kajakaja. nuniŋele di elo wei nulgele muma. 41na ḏiŋerom dino du lagin lutu naləri gwula nalarno, ŋa gwiro ŋaɽe ŋeḏi elo. nulmɩni lo nate nulouwɩrico danumə no gi gwune malɩŋe gwiro kɩrisṯo.

42na gwune na anyin abuḏa nudu nuwele kiḏɩwer; na liji wei nalbunyi. nalwila lugwun nalməṯo kani ŋwate ŋunwalane no; 43nulmɩni eicɩno, arram nyi gwumə gi jɩmɩrɩgen jun jiro kaja dino ŋan ŋuɽun ŋiŋir ŋeḏi ŋele ŋeḏi elo, gi gwune nyi wəjɩnu ŋuɽun ŋeno. 44nəṯɩluməḏɩjo gi lɩdunu leḏi elo leḏi jalil.

Currently Selected:

luka 4: OTR1966

Highlight

Copy