luka 5

asa 5

ḏamiḏa ḏeḏi calɩmis jun jeḏi gwerre

mṯ. 4:18-22, mks. 1:16-20

1na gwune na liji aɽuwaḏa lugwun ləḏiŋɩni ŋuɽuna ŋeḏi elo, na ŋu gwuḏuḏɩnəḏelo kɩmerɩmer geḏi lɩbu leḏi janisaraṯ. 2nuaŋu lɩmurkab lɩttən lɩḏuḏɩnəḏelo lɩbu gi diɽil; namɩnl liji lun laṯuumi ŋwumi nalditu nalje gi ḏiweiya car jeḏi ŋwumi. 3nuəḏi kwu murkab ganu gwete gweḏi simian, nuuməḏɩjo gwədu ganu mɩce kɩməmu elo. nujiga nualɩmi liji kwu murkab ganu. 4na gwune nuṯɩmi ŋuɽuna nueico simianŋ no, dikədəṯi kalo gun gwoleno ganu, nyawini car je jalo gi ḏuma ŋwumi. 5na simian wɩrlijo ŋuɽuna nueicɩno, gwele gwəri, animawirini ganu gigili nate nananbuje gwaŋ gwədi no, namɩni gi gwune arane nyi gwawini car je. 6na gwune nalarre dino nalməṯo ŋwumi ŋwutu gworki, na car jagin ar jaḏaḏe ganu. 7naluməḏɩjo lun louwiḏaṯɩlle di de lun lijo kwu murkab gwun gwiro kaja lila aliŋelejo uwə. nalwila nalenyeje lɩmurkab lɩttən kəbe nalar lideḏe. 8na gwune na simian buṯrus aŋu dino nuculɩjo ga ŋwurko ŋwe ŋwara ganu ŋweḏi yecu nueicɩno, duḏi lugwi gwele, gi gwune nyi gwiro gwəmɩnyo gwɩki. 9gi gwune ŋu na luŋa wei lun lijille nalobaga ṯuṯ kalo geḏi ŋwumi ŋwun ŋwapɩlo; 10na dino yagub na yuwana lun liro nyaɽe nyeḏi jebəḏi, lun louwiḏaṯɩl simianŋale. na yecu eico simianŋ no, ŋaḏonyɩḏa no; uro gwunnɩno ŋa gwaṯumə liji. 11na gwune nalwila lɩmurkab le lun liro lɩttən kɩmerɩmer nalwalane ŋɩdi wei nalgwujane.

ḏiŋiriḏa nanu ḏeḏi gwiji gwun gwiṯi ŋilo

mṯ. 8:1-4, mks. 1:40-45

12na gwune gwijo kamɩrɩgen yete na gwəmɩnyo gwijo gwun gwiṯi ŋilo nanu wei. gwune nuaŋu yecuŋ nuiḏi gi jei ganu juŋun nuɽoṯəḏɩjo gworki nuarno, gwele gwi, na ḏa ŋa məmɩnyi ŋa məṯi ŋɩma ŋiiŋiri nanu. 13nukuwa ḏi ḏuŋun nuḏɩmumi nənu nueleicɩno, nyi gwəmɩnyu; iŋiriḏi nanu. na cou na ŋilo abɩre lugwun. 14nugele ŋuɽuna ŋɩbɩɽe lugwun nuarno, gwate gwanuməḏɩjo gwetɩdo no. nueicɩno ŋamɩni ele ŋaŋijo gɩsisŋ aŋɩna yuŋa, na ŋəḏəḏə eloŋu ŋɩdio ga dino ŋan ḏiŋiriḏa nanu ḏuŋa, ŋun ŋaŋijaŋalo musa ani liji aŋu. 15namɩni ŋuɽun wɩreḏenelo ŋan ŋu. na liji aɽuwaḏa ldu lutu gworki lar landiŋɩni alɩnŋele muma ŋɩɽainy ŋagin, 16namɩni ŋu naṯuwele kiḏɩwer gi ḏuməḏɩjo eloŋu.

ḏɩmiḏa ḏeḏi gwiji gwun gwumɩde ganu mɩdeḏ

mṯ. 9:1-8, mks. 2:1-12

17na lamon lete gwijo gwalɩmiḏo na lɩbarɩsi na liji lun laṯalɩmiḏe ŋuɽuna ŋun ŋigelijɩlo elo musaŋ lijiga lun lɩwiḏi ŋwurgwom wei ŋweḏi jalil na yauḏia na urucəlim; na ŋɩma ŋeḏi gwele gwun gwiro elo je naṯulgele muma. 18na ləmɩnyo wila nalapa gwiji aɽagar ye gwun gwumɩde ganu mɩdeḏ, nalar gwaləḏɩje nalŋele gi jei ganu jeḏi yecu. 19na gwune nalbunyi gala bibi gun galgəḏi gi gwune liji lijo lutu, nalgwabo kwu dunu elo nalŋɩrṯe duno gwun gwiro lɽa nalgwuleje əlbɩriḏ ye kɩlɩgi ganu nalŋele ga ḏi yecu. 20na gwune nuaŋu ḏɩməṯo nueicɩno, gwiji kwe, ŋuɽun ŋuŋa ŋɩmaŋəniḏuḏɩjo ganu ŋun ŋɩki. 21na jalgaṯɩmŋa lɩbarɩsi le naluməḏɩni nalarno əḏi gwiro kwe gwun gwuməḏi ḏɩḏenɩḏia ḏe? əḏi gwiro gwəṯi ŋɩma gwaḏuḏe ganu ŋuɽun ŋun ŋɩki, elo gwədu gwetɩdo na? 22na yecu lɩŋe ḏuməḏɩno ḏagin nuluməḏɩjo nuleicɩno, ŋuɽun ŋɩrṯa ŋiro ŋuməḏɩnanyaŋe gi dugwor ganu dalo? 23aŋ gwiro gwouwɩrəno ganu, ḏa nyi marno ŋuɽun ŋuŋa ŋɩmaganiḏuḏɩjo ganu ŋun ŋɩki i gi nyieicɩno, diɽu ŋele? 24namɩni kani nyalɩŋe nyarno ŋaɽe ŋeḏi liji ŋəṯi ŋelɩnya ŋɩne kɩḏilio ŋaḏuḏe ganu ŋuɽun ŋun ŋɩki, nueico gwiji gwun gwumɩde ganu mɩdeḏ no, ŋa, nyi gwaŋeicɩno, diɽu ŋape aɽagara yuŋa ŋele dunu lugwuŋa. 25na cou nudiɽi gi jei ganu jagin nuape yun yiḏɩrune, nuwele kwu dunu gwuŋun, nubuḏi eloŋu. 26na luŋa wei nalobaga ṯuṯ nalbuḏi eloŋu, nal ŋɩḏe e nalarno, gwunanyine anmaŋu ŋuɽuna ŋun ŋobejijega ṯuṯ

ḏamiḏa ḏeḏi lawi

mṯ. 9:9-13, mks. 2:13-17

27na ŋɩno gɩdo nuduḏo nuaŋu gwete gwun gwaṯɩmeje ṯulba gwan lawi gwijiga kalo gun gaḏiməḏeico ṯulba, nueicɩno, gwujani. 28nuwalane ŋɩdi wei nudiɽi nugwujane. 29na lawi gico gɩmuri gibuḏo kwu dunu gwuŋun, na liji lijilliŋə lutu, lun laṯɩmeje ṯulba na lun liro ga dino. 30na jalgaṯɩm jagin na lɩbarɩsi nalərininene gi calɩmis ganu dino naleicɩno, gwudaro gəko aṯanyaʼe nanyayu lijiŋale lun laṯɩmeje ṯulba na lun lɩki? 31nalmɩni yecu wɩrlijo ŋuɽuna nuleicɩno, liji lun liŋir nanu late laṯɩbunyi lakima no, namɩni liro lun leḏeḏo nanu. 32nyi gwate gwuwiḏi lilorniḏe lun liŋir no, namɩni liro lun lɩki kani alwɩrla ga ŋuɽun ŋun ŋɩki.

ḏiɽoṯeḏa ḏeḏi ḏɩməṯo əbuṯo

mṯ. 9:14-17, mks. 2:18-22

33naleicɩno, calɩmis jeḏi yuwana jaṯɩməṯo əbuṯo ŋwamon ŋwutu na juməḏɩjo eloŋu, na jeḏi lɩbarɩsi dino, namɩni juŋa naṯɩlʼe naṯɩlyu. 34nulmɩni eicɩno, nyaŋa ləṯi ŋɩma nyalouwɩrico lɩmeḏin lɩməṯo əbuṯo aḏamɩni lol gwijiŋale gweḏi ḏaga a? 35namɩni ŋwamon ŋwaje ŋwila ḏa lɩməbɩri gwiji gwe ḏaga lagin, na dino kaja kono ləməṯo əbuṯo.

36nuluməḏɩjo ŋuɽuna ŋun ŋɩlɩbo dino nuleicɩno, gwiji gwate gwetɩdo gwun gwouɽu giria gun giya gugukɩɽe gworo gwun gwuɽun no, gaŋɩrṯaḏe ganu na dino giria gun giya ŋate galro kal gete giria ge gun ŋuɽun no. 37na gwiji gwate gwetɩdo gwun gwadoije ŋɩmidiə ŋun ŋiya gi jurəḏ jun juɽun no, gi gwune ŋɩmidiə ŋun ŋiya gwagiri jurəḏo na ŋwuduḏe ga na jurəḏ jake. 38namɩni ŋɩmidiə ŋun ŋiya ŋwaldoije gi jurəḏ jun jiya, na ŋaje muma. 39na gwiji gwate gwun ḏa ŋimulyu ŋun ŋuɽun ŋuaɽu ŋuarno ŋulyu ŋun ŋiya no, gi gwune gwarno ŋun ŋuɽun ŋiŋirano.

Currently Selected:

luka 5: OTR1966

Highlight

Copy