Hoixgara 17
17
1Egi jaja Amphipolis egi Apolonia eahi‐wowairanaga Thessalonika‐eja hahirena, Judra wohokhu‐hojhisha harninera ejanankshana.
2Egi Paulus e woshga harnira herege hijokawarnaga wirahina, egi Sabath hambra daniha Mau hoit’era wawirokit’ena.
3Wagiruhas‐anaga egi wagiwahajena Kristus hawegi phinange wauna egi shige d’arnangra eja niamb‐howakirina, egi Jesus de‐e E hihornikhu hajane Kristus herena.
4Egi hota harnaxguinena, egi Paulus egi Silas eja here hijerena, egi Hellenist Mau nakewera worohaxjina, egi hinug xetera inke watageni.
5Eshi Judra jarnaga inke harnaxgunigi wakiwassajijerena, woruwieja hojhaina horaje u‐nankhi wakishu hagirena wang wowong, egi sto‐khirarnaga, jhinaganaka harnaj warupuruirena, egi Jason hojhira jawe hahirena, egi Paulus egi Silas wankshigeja warni‐hakirina’inekjege.
6Egi jaja inke wieranigi, Jason egi wakhinubra hota jhinag hirukanainja waruti hakirirena, uwainena: Wangnagra mara runa hot’unairena, shige egi hajirena.
7E Jason hojhieja hokewe wagigina, egi de‐e harnaj Kaiser u‐washi harnira hagikirairena, wairena, hung hijaneisha eja jeshe Jesus higairegi.
8Egi wankshignanka egi jhinag hirukanara najge woji wahirena, jaja washa de‐e naxguinegi.
9Egi jaja Jason egi hijanenanka wikiwagax wagigiregi, wagirushjanehirena.
10Egi wakhinub‐hirera higuana haheregi Paulus egi Silas Berea‐eja howare‐wahirena. E eja hahiregi Judra wohokhu‐hojhi harnineja hokawairena.
11De‐e hiraijera wankshig‐phinena Thessalonika e worujis hirena. Hoit’era rusra giphixjinena, egi hambga wowagaxra wessiwi‐nankshana washa de‐e jasge hisgeguni‐hirairege.
12Esge rohaxji harnaxguna, egi shige hinug gish’aghirera Hellenist waunankshana egi wangra inke watagnina.
13Eshi jaja Judra Thessalonika‐eja herera naxguinegi, Berea‐eja Mau hoit’era Paulus wihokhunjegi shige hajirena egi wankshigra warupuru‐hirena.
14Egi higuana wakhinubra Paulus tejainja howaregigirena, eshi Silas egi Timotheus higu eja unankshana.
15Egi e Paulus wakishurera Athen‐eja harniahirena. Egi worag‐sh’irawina Silas egi Timotheus higuana sagrexji hajirekje wigena, hakarairena.
16Egi Paulus Athen‐eja wapejau, naxirag harnira tegshana, jaja jhinagnanka harnaj mau‐kikuinera hoixji hajagi.
17Egi wohokhu‐hojhieja Judranankhi egi Mau nakewera wawokit’ena, egi woruwieja hambga jarnaga higa wawokit’arnakshana.
18Egi Philosophra hota Epikurera egi Stoikeja herera kitag‐hirena. Egi hota wairena: Itaje de‐e jagu ekjaneshe? Hota hijanera wairena mau hijahi horagnagkhuni hirewahigaja, Jesus egi hakiha wangshighoi wihokhunjege esge.
19Egi rus‐hirena egi Areopagus‐eja harniahirena, wairena: Wogus jeg de‐e jaguisha heregi hiaperesikjawina e waragigus rajane.
20Washa jeg naxgu hinarajawina, esge washa de‐e jaguisha heregi hiperes roaguwina.
21Egi Athen wankshigra harnaj egi hijahi here hijarnankhi inke washinjahina hisha uinarni, washa jeg horaghiranaga egi warnaxgunankshana.
22Egi Paulus nashina Areopagus‐hokisageja egi wena: Athen wang raniwira, hinipereswina higu washa jagura harnaj warnanaxgura ronikanawina.
23Jhinagra hiroha wawahura egi washa waragikaraj harajegi wajharna nabruxaj hauisha hajhara wowagaxra de‐e herena: Mau inke hiperes hiranira wagiuine. E inke hirapereswini ragikaraj harajena, E hornigitaikjanihawina.
24Mau E mara una egi washara jarnaga hoshuakhi, maxihoshuagre egi mara E Hirukanara herena, esge inke jhi nab hiuine hojhinina.
25Inke shige wankshig nab wire higiu‐hiraninana, washanisha rogunag‐anaga, eshi E harnaj wankshighoina egi hornihara egi washara harnaj wawagiunakshana.
26Egi wankshig‐hokirajra harnaj wa‐ira hishankira waunankshana maihagra harnaj hojhinagre, egi jornineja wawagiuna jajanagi hereanaga egi hajinja jhirekjanera.
27Hirukanara horninekjege ningete hiperes‐hiranaga egi hie‐hiranage, jarnaga hiniwina inkisha hari wangagiuni hajarnunige.
28E wankshighi‐ihajena egi hixgara wangagiuwina egi hojhi‐hajawine, Poet washiniwira hota hishge shesge airena. Hishge ninkjang E wangarniwina.
29Esge Maura ninkjang wangarniwigi, inke maura shurasi egi shurasga egi ini, hisgera u‐waruphi egi wankshig wowewi hiuine nakhuni hirawinine.
30Egi inke hiperesni waura de‐e, Maura inke wajarni kikuna, eshi shegunegi wankshigra higu hajinja herera najgerakarateg wa’shina.
31Esge hambisha wamangirajshana eja managre woehiphiwi‐giunkjanena, Wang she‐e gijana hiu, E wankshigra harnaj harnaxgu wogarnaina, she‐e hiuanaga d’arnagraeja niamb howakirihina.
32Egi jaja d’era hakhiha wankshigine naxguinegi, hota igixjairena, egi hijanera wairena: Washa de‐e shige nanixgukjawina.
33Egi Paulus horogeja unjegi nigeowakerena.
34Egi wangra hota hakishu uinena, egi harnaxguinena, hisha Dionisius higairera Areopagit hisha herena, egi hinugisha Damaris higairera egi hijane hakishu.
Currently Selected:
Hoixgara 17: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
