Hoixgara 7
7
1Egi nabhoruxaj hirukana hungra wena: Washa de‐e shesgeshe?
2Egi Stephan wena: Wangra hikhinubwira egi hianjniwira, harnaxguwine. Mau glorianagra hianj‐hihiwira Abraham janti‐gikhina, Mesopotamia eja uniharegi kheni Xaran eja jhini,
3Egi wagena: Ma‐hashininegi hihinabre, egi washawararegi, egi ma‐nige himanigitaikjanera eja hokaware.
4Egi Xaldera mainja hihinabshana egi Xaran eja jhina, egi epa, jaja hianjra d’egi ma‐degi hoixanana, horajhiharajane eegi.
5Egi inke washa hoishjane hok’unina, inka, inke sihakerekjera reshge, shesgarnunige harnikjaneshe mangirajshana, egi su warnira hageja wankshiginegi, kheni ninkjang washa harninijanunige.
6Egi Maura deshesge ena: Su warnira horaje‐hirena mainjahi, egi wankshignanka warnihi wauinena egi washoshishig wagiuinena ma hogihijop.
7Egi wankshig‐howajehira eja warnihinankhi hawewahakjanena Maura ena. Egi hageja hihinab‐hirarnaga egi ma‐degi waigirairekjanena.
8Egi rohira horeishankira khi hok’una majera. Egi Abraham Isaak hagarninena egi hamb‐hiraruanga‐hainja majairena, egi Isaak Jakob hagarninena, egi Jakob Patriarx nup‐hashanara wagarninena.
9Egi Patriarxra Josephga kiwassainena egi Egipteja wiruwinena, eshi Maura hakishu‐unihena,
10Egi haweja harnaj wawakaraishena, egi najojaine egi wowanaiksab, hok’una Pharaoh jowehieja, Egipt hungra, egi Pharaoh Joseph hirukana una Egipteja egi jhi earnira harnaj.
11Egi eja dokewehira jina Egipt‐mara harnaj egi Kanaan egi hawera rokanainena. Egi hianj‐hiwahiwira inke waruj hikieranina.
12Egi jaja Jakob naxgungi Egipt‐eja waisgab‐nankhi jegjira hianj‐hiwahiwira rewagigina,
13Egi hinupahana hahiregi Joseph wakhinubra hipereshirekhina, egi Joseph washawahira Pharaoh hiperes‐hina.
14Egi Joseph rewagigina, egi hianjra Jakob hirajikjege egi washawahira harnaj, wankshigra kerepana‐shagowi‐anaga‐saja‐hashanana.
15Egi Jakob Egipt‐eja hina egi d’ena e‐hereanaga egi hianj‐hiwahiwira.
16Egi Sixem‐eja warniahirena egi warnaxi‐hoshueja wot’umbhirena, e Abraham Emmor hinigwahira shura wawigiruwina Sixem‐hianj‐hirera herena.
17Egi jaja womangirajra hambra hiwusunsh haregi e Maura Abraham wihogigira, wankshig Egipt‐eja‐nanka worohaxji harena,
18Unank’u hung hijanesha nashina, e Joseph inke hiperesnina.
19E wouphi hiu wakirana washiwahiwira, egi hianj‐hiwahiwira washoshishig wagiuna, ninkjang xununigra warninera nige wot’unewahina d’ewahinainge.
20Moses wankshig‐hoinga eja, Maura jowehieja mashja ninkjang phisha herena, egi hianjra hojhieja wi daniha hakaraninena.
21Egi jaja nige hot’unairegi, Pharaoh hinugra rusarnaga egi xetehina e hinig‐hikjege.
22Egi Mosesga Egipt‐wankshig washoiperes harninera harnaj hiperessana, egi rokanana hoit’era egi woshgara.
23Egi jaja ma‐kerepana‐jopahangi, wakhinubra Israel ninkjangra wawoma‐karakhini rekjehire najgera jijena.
24Egi hisha washa wowonk hirawe‐hinank’u hajarna, karashigshana egi gikarakjena hawehinanka, egi Egiptwankshigjega d’ehina.
25Wakhinubra hiperes‐hirana hirege wauna, Maura jasgehinara Mosesga hiuanaga wawakaraishenara, eshi inke naxguiranina.
26Egi haini joweja wirahina kikitagnank’u egi waroxina rashguni wahinai, wena: Wangra, rakhikhinubwigaja jagu‐u washa wowonk rakik’uwishe?
27Eshi hisha hikiwusunshra washa wowonk giunjega nige howahas‐shana wena: Peshe wirukana niushe, egi hae‐hinakjawi‐niushe?
28Nishge d’einakjaneshe xjanane Egipt‐wankshig hisha d’erara shesge.
29Egi Mosesga gias‐shana deshesge e‐gi, egi hijahi hereisha herena Madian mainja, eja wangra nup hagarninena.
30Egi jaja ma‐kerepana‐jopahara haixagi mojaina Sinai xeja Jehowa waxopiniwarajire harnira pej janti‐gikhina xatabeja.
31Egi jaja Mosesga hajagi khorena hajaga, egi hiwusunsh howarena horuxuj, Jehowa hora hirajina, wena:
32Hianjwaraga Mau harninera newinena Abraham Mau harnira egi Isaak Mau harnira egi Jakob Mau harnira, egi Mosesga gissassana egi inke horuxuj ruxurugnina.
33Egi Jehowa wagena: Waguje hashinira kurushorojre, ma harnanashirajega ma wakanjang nige herena.
34Wajhajena, wajharna Egipt‐eja wankshig warnira hawarnagra, egi harnagra warnaxgu hajina egi tarnaga wawakaraishekjanena. Egi hure Egipt‐mainja howareningigikjanena.
35Moses de‐e, e wajis‐hirena, wairena: Peshe wirukana egi hae‐hinakjawi‐niushe? E Maura regigina wirukana egi wawakaraisheisha, waxopiniwarajire nab hiu e xatabeja jantingikhina.
36E harni wihinabshana, washa wowakanjank egi washa woijanti Egipt‐mainja wagiuna egi te‐shujeja egi mojainainja ma‐kerepana‐jopaha.
37Moses de‐e erena, e Israel ninkjangra wawagena: Prophet hisha Jehowa Mau hashinira warakhinubeja nashi ningikerekjanihawina hiakisgeisha e harnaxguwiaje.
38De‐e erena, mojaina hostoeja waxopiniwarajire hakishu una, E hokit’airena Sinai xeja, egi hianj‐hiwahiwira wakishu, E Mau hoit’e niambra hokuinera egi rus‐anaga wangokunkjawige.
39E hianj‐hiwahiwira inke giuiranina, eshi wajis‐hirena, egi najge warninera shige hakja Egipt‐eja howakarairena.
40Aaron wagairena: Mau hinkikunkjawina wangajogini hirekjawina, Moses de‐e e Egipt‐mainja harni wangihinabwira jasgehigaja waungi inke hinperes‐winige.
41Egi hamb‐eja je‐ningsisha uinena egi nabgiruxaj hirena maukikuinera egi wogishawarnankshana wore nab warninera uinega hawau.
42Egi Maura hijahi hopahikikerena, egi wagirushjanehina wangregi worohankhi gikarajra. Prophet wawagax harnieja wagaxangra shesge: Israel hojhi raniwira wanoijge d’ehire nab‐hinagishuruxajwishe egi hunak’uwi ma‐kerepana‐jopaha mojainanegi?
43Egi Molox jhi‐harnira shuruswina, egi Remphan mau hashiniwira wiragoshge harnira woijantira she‐e e wagikaraj wash’uwina, egi Babilon hawinjeja harninihahikjanihawina ena.
44Egi hianj‐hiwahiwira waipere‐hijhi‐wohokhu‐hojhira harniranihena mojainainja shesge hinshige, E Moses hogiragshana hokiwagaxra jasge hashjare exji herehiaje higena.
45Waipere‐hijhi de‐e hianj‐hiwahiwira harni‐wagigiregi Joshua hakishu harni‐hajirena jaja hirarujeja herera ma harninera harninegi, e Maura wawahassana hianj‐hiwahiwira hishja jowehireja, Dawidga wankshighoinegi hipa uinena.
46Dawid Maura jowehieja najojaine hiena, egi gikarajshana Jakob Mau harnira hojhira hienainge.
47Eshi Salomon jhixeteisha giuna.
48Eshi Eshana Xetera inke wohokhu‐hojhixete nab hiuine hojhininana, prophetra shesge ena.
49Wangregiagre waminag harnira herena, egi mara sihakere harnira herena, jhi jaguisha hinagish’unkjanihawishe, Jehowa ena, egi hajainja ma‐hoxgasigi harnira herekjaneshe?
50Jasge inke nab harnira hiauanaga washa de‐e harnaj waunishe?
51Jashe gsaj‐harajane, egi najgera egi shige nuxhopoxra inke majharni‐harajane, hoishib Naxirag Wakanjangra shawajis harajena, hianjwarawiga shesge hirera nishge sh’uanajawina.
52Prophet hajinjajega hianjwarawiga inke hawehiranishe egi d’ewahirena? Jarnaga Phi de‐e jikjanegi horaghirera, E shegunegi himanagra egi d’ehira neninewina.
53Ne woehira harniningigirawina waxopiniwarajire woshga harninera hereguni hirewahi, egi inke sh’uni harajena.
54Jaja washa de‐e naxguinegi, najge warninera wamakunug hireguni hirewahina egi hi‐harusge‐sgexji hirena.
55Egi Stephanga Naxirag Wakanjangra hoixjinjena wangregi horuxuj‐jena egi Maura gloria harnira hajarna egi Jesus Maura nab‐hoishorohieja nashinje hajarna.
56Egi wena: Horuxujwire, maxira ruhas hajharna egi Wankshig‐hinigra Maura nab‐hoishorohieja nashinjena.
57Egi mashjaxji uwainena egi nux‐hopox warninera wakawasunsh hirena egi hagakiraha harnaj harnihimbhirena.
58Egi jhinag jangeja hot’unairena egi ini hirojinena, egi wihohinanka waini warninera wang‐hojinjisha si‐hieja wakshuirena, rashra Saul higairena.
59Egi Stephanga ini hirojinena Maura gikarajnank’u, wena: Hirukanara Jesus naxirag harnira rusre.
60Egi huporo‐himinagshana egi mashja hit’et’ena, Hirukanara washa woishana de‐e inke washurnianje, egi jaja deshesge e‐gi, nana.
Currently Selected:
Hoixgara 7: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
