Hoixgara 9
9
1Egi Saul higu niharehiga winakewe wahijena egi d’ewahijena, Hirukanara wironag warnira, nabhoruxaj hirukana hungra wawirahina.
2Egi wawagax u‐rogiguna Damaskus eja howarekjege wohokhu‐hojhiejananka eja hisha de‐e howak’u hiegi wang hirarnaga shige hinug hiregi Jerusalem‐eja rusgij warnikirikjege.
3Egi hikiwarera rena Damaskus hiwusunsh hina, egi xapgexjinig hatasha horogeja jena hatashara wangregi howajina.
4Egi mainja hokanena, egi hora naxguna wagairena: Saul, Saul jagu‐u hawe‐hinarajeshe?
5Egi wena: Peshe nineshe Hirukanara? Egi Hirukanara wena: Jesus newinena, E hawe‐rarajena, washa wojexi rakik’u rajena wiwapoxra nanaxjag rajena.
6Egi gissassana egi khorena wena: Hirukanara jagu unagigikjaneshe? Egi Hirukanara wena: Nashine egi jhinageja howarare, egi hornigirag‐hirekjanena jagu sh’unkjera.
7Egi wang hikiware wakishu uanka inke xabni nashinankshana, hisha hit’et’e naxgunang‐nunige eshi inke hisha hajarninankshana.
8Egi Saul kikawa‐ana, egi jaja jambgaja, inke hishahajanina, egi airutirena egi Damaskus eja harniahirena.
9Egi hambra daniha inke washa hajarnina egi inke warujni inke shige rajgani.
10Egi Damaskus‐eja wironag hisha jena, Ananias higairena. Egi Hirukanara washanjahi higiuanaga wagena: Ananias, egi Ananias wena: Hirukanara horuxujre eegi hajena.
11Egi Hirukanara wagena: Nashine, egi nagu‐hoxeteisha rojara higairera eja howarare, egi Judas hojhieja hiwaxaje hisha Saul higairera Tarsus eja hereisha herera, horuxujre gikarajnakshana.
12Egi washa hajaisha hajarna, wang hisha Ananias higairegi hijokewe hajarna, egi nab harnira hirawasunsh‐shana wajakjege.
13Egi Ananias horniharna, Hirukanara wang de‐e roha horagire naxguna Jerusalem‐eja wakanjank washinirananka washa wowongra rohaxji wawagiushe airena.
14Egi waunjena eegi homashja harnikje nabhoruxaj hirukana hungeja horussana jarnaga rash hashinira gikaraj‐ankhi harnaj warusgij‐jege.
15Eshi Hirukanara wagena: Ranane, e wiroku hiaunkje gijainena, rash harnira harniunkjege hirarujeja herera jowehireja egi hungeja egi Israel ninkjangeja.
16Washa rokana hagiguiskjanena e rash harnira hawau hawekjanena.
17Egi Ananias rena egi jhieja hokewena, egi nab harnira hirawasunsh‐shana wena: Hikhinubra Saul, Hirukanara Jesus janti‐ningikhina naguregi haji, E huingigina, washjakjege egi Naxirag Wakanjangra hoixjine.
18Egi higuana hishjasu harnieja hoha hoishini hikisgenisge shibrena egi higuana wajarna, egi nashina egi nihawaxu‐hirena.
19Egi jaja warujgi, mashja‐jijena. Egi Saul wironag Damaskus‐ejananka hamb jarnahangi wakishu una.
20Egi higuana Kristus wihokhuna wahokhu‐hojhieja Kristus Maura Hinigra hereshe ena.
21Egi jarnaga naxgungi khorairena, egi wairena: Inke de‐e e herenishe Jerusalem‐eja hisha rash de‐e gikarajhirega maisinsh wahisashe airera, egi shesge wagiu eegi jina, e nabhoruxaj hirukana hungeja rusgij warnigikjege.
22Eshi Saul homashjara hiraijera harena, egi Judra wowewiharej wahina Damaskus eja jhinanka, Kristus E herera wogisog horagjena.
23Egi hamb rohanaga hageja Judra haehirena d’ehirekjege.
24Egi Saul hirapenankhi hiperes‐hirena. Egi jhinag jhirobeja hambga egi hahega hirakaranankshana d’ehirekjege.
25Egi wironagra haheregi harnirarnaga egi napaisha wagina hiroishge hokanag ini‐nawajaggeja shibrehirena.
26Egi jaja Saul Jerusalem‐eja gigi, e wironagnanka wakishu unaina, eshi harnaj nankawairena egi inke wironag hisha hereni hiranainena.
27Eshi Barnabas Saul rusarnaga egi Apostel‐eja harnihina egi wawogiragshana houna jasgehianaga Hirukanara nagueja hahi hajagi, egi hokit’airegi egi Damaskus‐eja Jesus rash harnira inke nuwangni wawihokhungi.
28Egi e Jerusalem‐eja hokewe egi hihinab wakishu unjena.
29Egi e inke nuwangni Hirukanara Jesus rash harnira wirokit’ajena egi Hellenistra wakit’akshana, eshi d’ehinainena.
30Egi wakhinubra hiperes‐hiregi Kesarea eja harniahirena egi Tarsus eja howarehirena.
31Egi hageja stora rashguni uinena Judea harnaj egi Galilea egi Samaria egi xetearahairena, egi Hirukanara nakewe maninankshana egi Naxirag Wakanjangra warukhegnankshana, egi roha harahairena.
32Egi wauna, Peter harnaj wowarena egi shige Lidda eja wakanjang jhinagra wirahina.
33Egi eja wangisha hiena Aeneas higairena, e maharuangaha mingshana egi howasha ro‐t’eg una.
34Egi Peter Aeneas wagena: Jesus Kristus rushjanina, nashine egi homig hashinira phinkune egi higuana kikawa‐ana.
35Egi jarnaga Lidda‐eja jhiakhi egi Sarona hajairegi, egi Hirukanara eja hapahi nashinena.
36Egi Joppa‐eja wironag hisha jhina Thabitha higairena, e hironagra Dorkas higairena, hinug de‐e wore phira rokana una egi washa wogara.
37Egi wauna hambananka eja hinugjega howasharna egi d’ena, e jaja rushairegi jhiokohi wangeja t’umb‐hirena.
38Egi Liddara Joppa ashgenig herege, egi wironagra naxguinegi Peter eja unjegi, wangra nupiwi hijowaregigirena, e inke hiwusharni wirahikje roguinena.
39Egi Peter nashianaga egi wakishu rena. Jaja higi jhiakohi wangeja harniahirena, egi hikanagit’era harnaj hijarnashi‐rarnaga xagnankshana egi Dorkas wakishu uniharegi e wonashi egi wonashixete wagiungi wakawahairena.
40Eshi Peter harnaj hihinab wagigina egi huporo‐himinagshana egi gikaraj‐shana egi roaka eja hapahi jijena, wena: Thabitha kikawa‐ane. Egi hinuganka jambshana egi jaja Peter hajagi minagshana.
41Egi Peter nabra giwaharna egi nashingigina egi jaja wakanjangra egi hikanagit’era wagigogi niamb wokaraikarna.
42Egi Joppara harnaj hiperes‐hirena, egi Hirukanara roha harnaxguna.
43Egi wauna, hambra roha Joppa‐eja hiwusharna Simon waru’shawaisha herera hakishu.
Currently Selected:
Hoixgara 9: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
