Hoixgara 10
10
1Kesarea‐eja wangisha jena, Kornelius higairera, e manape hungra herena, manape hornihe she‐e Italien higairena.
2Wang phisha herena egi Maura nakewena egi jhiharnira harnaj wakarakishu, e wankshigra washa wogara roha wogarna, egi hoishib Maura gikarajshana.
3E washanja wogisogjisha hajarna, hambregi ejaxji howagix hishanki‐jushguninegi hereguni, Maura waxopiniwarajire harnira hirajina egi wagena: Kornelius.
4Egi horuxujshana nakewena egi wena: Jagu‐u Hirukanara? Egi wagena: Gikaraj hashinira egi woga hashinira wangregi hina Maura jowehieja hinigiperes‐nankshana.
5Egi higuana Joppa‐eja wang howaregigire egi hisha Simon rash hinup harnira Peter higairera gigore.
6E hisha Simon higairera waru’shawaisha eja unjena, hojhira te‐hijejeja herena. E jagu sh’unkjera hornigiraikjanena.
7Egi jaja waxopiniwarajirejega e Kornelius hokit’era keregi Kornelius jhieja ware warnigi nup gigorna egi manape phira jajanaga hoishib hija‐wagiranankhi.
8Egi jaja washa de‐e harnaj wogirag rashjangi e Joppa‐eja howare‐wagigina.
9Egi haininegi hikiwarera harairena egi jhinagra hiwusunsh hahiregaja, Peter jhi‐hihageja hina gikaraj, ejaxji howagix hirakewe‐hanegi hereguni.
10Egi mashja dokewehina egi waruj roguna, egi waruj hirushja giginank’u warnaira nige‐howarejijena,
11Egi maxira ruhas hajarna egi woshuisha harukanag hugi hirajina, waiperi xetehi nige hopasse hijopihike rusgijra ere egi manegi jinag‐hirena.
12Eja wanoijge hu‐jop‐himani manegi here hoshujina egi wanoijge hojaina horajera egi washa kikurutira egi ahuirassa wangregi herera.
13Egi eja hit’eisha hirajina, nashine Peter, d’ewahige egi warujre (higairena).
14Eshi Peter wena: Inke shesgarnina Hirukanara, inkaga washa hoinigera shige washa warakanara hisha haj‐nina.
15Egi shige hinupahana hit’et’era hirajina, Maura jagu phi‐ura, inke ne washa hoinige wigarnine.
16Washa de‐e daniha una egi woshura shige maxieja harnianjia‐karairena.
17Egi washa ja de‐e jaguisha hawau haja‐gigireguni hirege egi Peter wowewi harejnank’u, Kornelius huwagigira Simon hojhira hiwaxnankhi egi jhirobeja nashinankshana.
18Egi gigoirena egi Simon hiwaxhirena e rash hinup harnira Peter higairera eja najeguni airena.
19Egi Peter washanjara wewinank’u, Naxiragra wagena: Horuxujre wangra dani hornini hajena.
20Esge nashinge egi harnukanagke egi wakishu rare inke washanisha khibahinine, Ne reningigina.
21Egi Peter harnukanag‐anaga wangnanka wirahina e Kornelius eja howaji hirajirera, egi wena: Horuxujwire newinena hisha horani harajegi, jaguisha hawau rajiwishe?
22Egi wairena: Kornelius manape hung hisha herera, wang phisha egi Maura nakeweisha herera egi wankshig howajehi Judra harnaj raphinena, Maura eja howaji horus waxopiniwarajireisha hiu ushirena, harnigu hahuirarnaga eojhieja horakewekjege egi hoit’e nanixgunkjege.
23Egi Peter hokewe wa’shina egi hija na‐wagigina, egi hainigi Peter wakishu rena egi wakhinubra hisge Joppa‐eja herera hakishu harairena.
24Egi haini hinupahainja Kesarea eja hokawairena. Egi Kornelius wapenakshana egi washawahira egi hiwusunsh hijakorowahira sto‐wakaragina.
25Egi Peter hokawaregaja Kornelius hikipajina, egi sihieja ming‐jimpshana egi gikarajshana.
26Eshi Peter nashingigina wena: Nashine, nishge wankshig hisha wa‐uanjena.
27Egi hokit’ajau hokewena egi roha hiena sto‐nankhi.
28Egi wawagena: Hiraperes‐wigaja jasgera washa de‐e woehieja roxiagra inke Judra wangra hisha hakishu uinarni nara shige inke wankshig howajehi hijahieja jininara. Eshi Maura waigiwaharna inke wankshigra hisha hoinige shige warakana hiagarnikje ena.
29Esge hiranijina inke khibaharni, hingigoirera. Egi hinigipaxshana jaguisha hawau hinagigo hiragi.
30Egi Kornelius wena: Hambra jopahana hantaginajnakshana howagix eegi hipa, egi howagix hishanki‐jushguni‐hainja hagikarajshana jhi wajhiregi egi horuxujre wangisha joweharegi nashinjena waini rukanakanap‐un.
31Egi wena: Kornelius, gikaraj hashinira naxguinena egi woga hashinira Maura jowehiejananke warnigiwewi hirena.
32Esge Joppa‐eja howare‐wagigire egi Simon gigore rash hinup harnira Peter higairera, e Simon higairera waru’shawaisha herera hojhieja najena, teja hijejeja, e jaja jigi hornikit’ekjanena.
33Esge higuana hagu warnigigina egi phinagaja rajira. Egi shegunegi harnaj Maura jowehireja ha‐uanakaja Maura washa jagu unishigi harnaj naxgunkjawi.
34Egi Peter ishabshana egi wena: Hisgexjingaja hajharna Maura wankshigra inkisha hiraijera hinira.
35Eshi wankshig hokirajra harnaj hisha nankewegi egi wore phi ungi, e giphiranana.
36Hoit’e E Maura Israel ninkjangra wirahihina Jesus Kristus rashguni wahikjane wihokhuinena e harnaj Hirukanara herena.
37Hiraperes‐wigaja washaisha horaghirera Judeara harnaj egi Galilea eja jeg unena, niwawaxu hageja e Johnga horagshana.
38Jasge hounahira Maura Jesus Nasareth‐eja herera Naxirag Wakanjangra hawaxuna egi homashjara, E rarnaga washophi una egi harnaj rushjawahina jarnaga waxopinishishig hawe‐hiuankhi, Maura hakishu unjege esge.
39Egi ne wihohira winewina washara jarnaga ura Judra ma harnineja egi Jerusalem‐eja. E d’ehirena egi nainja hoijgekanaghirena.
40De‐e Maura hamb hitanihainja kikawa‐ahina, egi hajairehina.
41Inke wankshigra harnaj hajairani, eshi wihohinanka Maura jorni waijara newinewina e hakishu wahajwina egi hakishu dajgawina d’arnagra eja kikawa‐a howakirianaga hageja.
42Egi wankshignagre wahokhu hi’shiwina egi horag, E Maura ungigina waehisha herekjege niambra egi d’arnanka eja.
43E prophetra harnaj horaghirena rash harnira hiu higu peshe harnaxgungi washa woishana warninera wagit’unairekjanena.
44Peter hoit’e de‐e a‐jau Naxirag Wakanjangra harnaj wirajina jarnaga hoit’era naxgungi.
45Egi harnaxgura majairera khorairena Peter jarnaga hakishu higa, hirarujeja herera hishge Naxirag Wakanjangra wawaxuinege esge.
46Hoit’e hokiraj hit’e warnaxguinena egi Maura mashja rajangnankshana. Egi Peter horniharna,
47Jasge hisha nira hiraja hinashe, wankshig de‐e inke ni‐wawaxu hiranina, e Naxirag Wakanjangra harni‐wagigiregaja jawangasgawira hiwikisgawina?
48Egi ni‐wawaxu wa’shina Hirukanara rash harnira hiu. Egi hambra jarnahangi hija hiwusha nangi‐ixji hirena.
Currently Selected:
Hoixgara 10: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
