Hoixgara 11
11
1Egi Apostelra egi wakhinubhirera, e Judea‐eja unankhi naxguinena, hirarujeja herera hishge Mau hoit’era rus‐hiregi.
2Egi jaja Peter Jerusalem‐eja higi jarnaga eja majera uanki kitaghirena.
3Wairena: Ne wang inke majairanieja rahina egi waruj warakishu sh’una.
4Eshi Peter hirowajgus wogisog wogiragshana wena:
5Joppa jhinag‐eja ha’unjera hagikarajshana, egi warnaina nige‐howarehajijena egi washanja hajharna, woshuisha harnukanag hurna, waiperi xetehi nige hereguni hirewahi wangregi howaji shibregigirena, hopasse hijopihike harukos‐hire, egi hiraijina.
6Egi jaja wawotuxujra wajhara hiaperessana wanoijge hujop himani manegi here egi wanoijge hojaina horajera egi washa kikurutira egi ahuirassa wangregi herera wajharna.
7Egi hit’et’era naxguna waigena: Nashine Peter egi d’ewahige egi warujre.
8Eshi wahena: Inke shesgarnina Hirukanara inke washa hoinige shige washa warakanara hisha haga i‐harnineja howaji hurnina.
9Eshi Hit’et’era wangregi shige howajina: Jagu Maura phiura, inke ne washa hoinige wigarnine.
10Egi deshesge daniha hina, egi wangeja shige harnaj warni‐hajiakarairena.
11Egi horuxujre, higuana wangra dani jhi wauanjera eja hajiraginina Kesarea eja huwagigiregi hiraijirena.
12Egi Naxiragra wakishu rei’shina, inke khiba harnikje hingena. Shige wakhinub de‐e hakewehajane hinkishu hahirena, egi wangjega hojhieja wakawawina.
13Egi hungiragwina, jasgehianaga waxopiniwarajireisha hajagi eojhieja, e nashianaga egi wagaireshe, Joppa eja wang howaregigire egi Simon gigore, e rash hinup harnira Peter higairena.
14E hoit’era wornigiraikjanena eja howahi ne ninearnaga egi horajhira harnaj nina‐aimbkjanihawina higaireshe ena.
15Egi hiat’et’e hajitegaja Naxirag Wakanjangra wirajina jeg hojikerehieja wanga‐uwina shesgairena.
16Egi Hirukanara hoit’e harnira pewina jagu era: Johnga hisgexji ni‐wagiuna wawaxuna, eshi ne Naxirag Wakanjangra washawa‐xunkjanihawina.
17Maura wanga‐wagiuwira wogara hikisge wagigigi, e Hirukanara Jesus Kristus harnaxguinegi, jagu harnigaja, Maura hakira duxuruikje?
18Jaja washa de‐e naxguinegi inke xab‐hiranina, egi Maura rajankhirena, wairena: Egi hisgexji hirarujeregi herera hishge washa woishana najgekarateg egi wankshighoi Maura wogagaja.
19Egi hoere hiranihera Stephan hawehirera she‐e hawau, Phoenike ejipa hikiwarera hahirena, egi Kiprus egi Antiox, hoit’era wihokhu hirena, Judrashana.
20Egi hota Kiprus eja here hirena egi Kirene eja, e jaja Antiox‐eja hajiregi, hishge Hellenitra wawokit’airena, Hirukanara Jesus wawi‐hokhuinena.
21Egi Hirukanara nab harnira wakishu unjena egi worohaxji harnaxguna, egi Hirukanara eja hapahi‐nashinena.
22Egi worag de‐e wohokhu‐hojhira naxguinegi Jerusalem‐eja nankhi egi Barnabas regigirena Antiox‐eja hipa hikjege.
23E jaja hijahigi egi Maura najwoja harnira hajarna, giphina egi jasgehirekjera harnaj wawogiragshana, najge mashja hiuinarnaga Hirukanara harusherej‐hirekjege.
24E wang phisha herena egi Naxirag Wakanjangra hoixji egi harnaxgura. Egi wankshigra rohaxji Hirukanara eja hornashina.
25Egi Barnabas Tarsus eowarena Saulga horni.
26Egi jaja hiegi Antiox‐eja harnikirina. Egi wauinena maisha eja stoirena hostora wakishu, egi wankshigra roha washa gigus‐hirena. Egi wironagra Kristianra wawigairena jegeja Antiox‐eja.
27Egi hambananka eja Jerusalem‐eja prophetra howajirena Antiox‐eja hajirena.
28Egi hisha nashina Agabus higairera egi Naxiragra hiuanaga wogiragshana, managre harnaj dokewehikjaneisha ena, e herena Klaudius Kaiser hamb‐harnieja.
29Egi wironagra jarnagaka jasgeshana hiruxurughirera uinena, wakhinubhirera Judea‐eja jhinanka wagijire rehirekje hirairege,
30Egi shesge hirena, egi xeteja howarewahirena Barnabas egi Saul harni‐rewagigirena.
Currently Selected:
Hoixgara 11: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
