Hogusra 24
24
1Egi Abraham shagjina egi hambra rohana, egi Jehowa Abraham washophi howehina washana harnaj.
2Egi Abraham ware xete harnira eojhieja jegi wagena, jarnaga washara harnigi harnaj hirukana jegi, ningitarna nab hashinira regokanag harninegi hat’umbre,
3Egi wihohi ningigikjanena Jehowa Mau wangregi herera egi Mau managre harnira hiu, Kana‐anitra horogregi hajhinagra hinug‐wahira hinig‐hara inkisha khanag‐giginianje.
4Eshi ma‐harnieja howarare egi washa‐wahaija, egi hinig‐hara Isaak hisha khanag‐gigiaje.
5Egi warajega wagena: Ningete hinugra inke ma‐egi hiroinaghu nainiege, jasge hinigraga shige ma‐horawarajieja harniahi‐kjeshe?
6Egi Abraham wagena: Hirakara‐unge inke hinighara hakja eja hingarni hinianje.
7Jehowa Mau wangregi herera, E jajiga hojhieja hinrus‐shana egi washa‐wahara ma‐harnineja egi E waigena, egi wiho hingigina wena: Su hashinira ma‐de‐e wak’unkjanena, E waxopiniwarajire harnira joweraija howaregigikjanena egi eja horus hinig‐hara hisha khanag‐gigiaje.
8Egi hinugjega inke hironinag na’inigi hageja wihohi ningigi de‐e ningirushjare‐hikjanena, eshi hinig‐hara inke hakja harnihi‐nianje.
9Egi warajega nab‐harnira hirukana harnira Abraham regokanag harnieja hat’umbshana egi washa she‐e hawau wihohina.
10Egi warajega wanoijge‐huxashogra kerepanaisha russana hirukana harnira wanoijge‐huxashog warnira, egi rena, hirukana harnira washa jexi warnira roha harninena, egi nashianaga egi Mesopotamiara eja howarena Naxor jhinag harnieja.
11Egi wanoijge‐huxashog warnira ming‐wagigina jhinag jangeja ni‐wagueja hoxjarnanegi, hinugra ni‐agura higireregi.
12Egi wena: Jehowa Mau hirukana harnira Abraham harnira, ningitarna hamb de‐e hophiowewine, egi hirukana harnira Abraham phingigire.
13Horuxujre ni‐wagu hijejregi nashi‐hajena, egi jhinagregi wankshig‐hinug wahirera ni‐hagu hajirekjena.
14Egi shesge higigiaje, hinugnigra hisha wagekjanena ni‐hirusra kurushibre ningitarna tajgankjena egi wekjena rajgane egi wanoijge huxashog washinira hishge rajga wagigikjena, shesge higigiaje ware hashinira Isaak she‐e ragijana, egi eja howahi hiaperes‐hikjena Ne hirukana harnira phira gigira.
15Egi herena, kheni hit’et’era rashjani, horuxujre Rebekah huhena, Bethuel hagarninera, Milkah hinigra Naxor hijawira, Abraham khinubra, ni‐rusra hinejeja hakereanaga.
16Egi hinugnigra mashja phina hajara, hinugwajeg hisha, egi inke wangra hisha hiperesnina. Egi ni‐wagueja hina egi ni‐rusra hoixji hokshuanaga egi hegitina.
17Egi warajega nuwankshana hinugra hakihi egi wena: Ningitarna ni‐hirus hashinieja nira watagnig rajgaingigire.
18Egi hinugjega wena: Rajgane hirukana harnixji. Egi xapgehigi‐anaga egi ni‐hirusra kurushibshana hagirukos‐anaga egi rajgangigina.
19Egi jaja hinugjega rajgangigira rushjangi wena: Wanoijge huxashog washinira hishge ni‐wagitusjanena, rajgara rushjaine hipa.
20Egi xapge ni‐hirusra kogeja homana‐hina egi niwagueja shige hornuwangshana ni‐rus egi wanoijge huxashog warnira harnaj ni‐wagirus‐shana.
21Egi wangjega khore inke xabnijena, hiperes‐nai Jehowa jasge nigigikjanegi hoikiware harnira higisge‐arnaga nigeshge inke shesgarnikjanegi.
22Egi herena wanoijge huxashogra rajgara rushjainegi, wangjega shurasi peja howehi gis hisha russana Shekelra hikirua kissag, egi aipara nupiwi shurasira Shekelra hikirua kerepanaisha.
23Egi wena: Peshe hinugra nineshe? Hungiragre ningitarna. Jasge hianjraga hojhieja hokarageakshe‐hoipushakjawira?
24Egi hinugjega wena: Bethuel hinugra newinena Milkah hinigra Naxor e hagarninera.
25Hinugjega hiraijera wagena: Waisgab‐hu egi warujra hina harniwina egi hoiwushara hokarage.
26Egi wangjega wakhuna egi Jehowa gikarajshana.
27Egi wena: Jehowa Maura hirukana harnira Abraham nirajankhirekjanena, E hinke hirukana harnira najojara egi wogisogra hagirushjanina, naguregi haumagra Jehowa hirukana harnira wakhinubra hojhireja hinihina.
28Egi hinugjega nuwangshana egi washan de‐e hiunira hojhieja herera wawogiragshana.
29Egi Rebekah hisha khinubshana Laban higairena. Egi Laban wangjega eja hornuwangshana ni‐wagueja.
30Egi herena, jaja peja howehi gisra hajagi egi aipara hinug‐jabra warnijegi, egi jaja hinugjabra Rebekah hoit’era naxgungi, wena, wangjera deshesge hingena, wangjega hirahina egi horuxujre wanoijge‐huxashog hikijainja nashinjena ni‐wagu hijejeja.
31Egi wena: Hokaware, Jehowa najhojaine ranina, jagu‐u jangregi nanashira jeshe? Jhira hirushja harna egi wanoijge‐huxashogra hokarage wagigina.
32Egi wangjega jhieja hokewena. Egi wanoijge‐huxashog warnira wagirushibshana egi waisgab‐hu egi waruj wanoijge‐huxashogra wogairena, egi ni si‐hirusha hokuinena, egi shige wang wakishu uangra si‐hirusha.
33Egi jowehieja waruj gishurena ruijera. Eshi wena: Inke hajnikjanena jagu hauanjira wakarakishana. Egi Laban wena: Are.
34Egi wena: Abraham ware harnira newinena.
35Egi Jehowa hirukana harnira washophi howehira rokana wagiuna, egi rokana jijena, egi jhasga hok’una egi je egi shurasga egi shurasi egi wang‐ware egi hinug‐ware, egi wanoijge‐huxashog egi shungxete‐najawaxetera.
36Egi hirukana harnira hijawira Sarah hojinjinig hisha hirukana harnira hagarnina shagkaja. Egi e jarnaga washara harnira harnaj hok’una.
37Egi hirukana harnira wihohi hingigina, wena: Hinighara inke Kana‐anitra, e ma harnineregi hajhinagre, hinug wahirera inkisha khanag‐giginianje.
38Eshi jajiga hojhieja howarare egi washa‐wahaija, egi eja hinig‐hara hisha khanag‐gigiaje.
39Egi hirukana harnira wagena: Ningete hinugra inke hiroinag‐niege.
40Egi waigena: Jehowa E jowehieja mani‐magra, waxopiniwarajire harnira hakishu re‐ningigikjanena, egi hoikiware hashinira hini‐gisgekjanena, egi hinig‐hara washa‐wahaija egi jajiga hojhieja hisha khanag‐ragigikjanena.
41Egi hageja wihohi harni de‐e ningirushja‐rehikjanena, jaja washa‐wahaija rahigi egi inke hisha hornik’uiranigi, wihohi harnira ningirushja‐rehikjanena.
42Egi hamb de‐e ni‐waguregi hajina, egi wahena: Jehowa Mau hirukana harnira Abraham harnira, hoikiware harnira hisgehinagigigi, wawatahare.
43Horuxujre ni‐wagu hijejeja nashianaga egi herekjena, jaja hinug‐wajegra ni‐hagu hira higi egi wagekje: Ningitarna nihirus hashinieja nira watagnig rajga hunk’une,
44Egi waigena, rajgane egi wanoijge‐huxashog washinira hishge ni‐wagitusjena, hinug she‐e e herena Jehowa hirukana harnira hinigra gigijara.
45Egi kheni hit’et’era tashjani najge harninegi, horuxujre Rebekah huhena ni‐hirusra hinejeja hakere, egi niwagueja hina, egi ni‐rus‐shana, egi wagena: Ningitarna rajga hingigire.
46Egi xapge higiarnaga, egi ni‐hirusra hinejeja‐jera rushibshana, egi wena: Rajgane, egi wanoijge‐huxashog washinira hishge rajga wagigikjanena. Egi tajgana egi wanoijge‐huxashogra hishge rajgairena.
47Egi hiagipaxshana egi wagena: Peshe hinugra nineshe? Egi wena: Bethuel hinugra, Naxor hinigra e Milkah hagarnira. Egi peja howehi gisra hija howeagigina egi aipara hija hiagiuna.
48Egi pakhuanaga egi Jehowa hagikarajshana egi Jehowa Mau hirukana harnira Abraham harnira tajankshana, E houna phihi hingigina hirukana harnira khinubra hinugra hinigra khanaikjera.
49Egi shegunegi hirukana harnira woragixete‐kjawigi egi washa wogisog hiragish’unkjawigi hungiragwire egi inke shesgarnigi hungiragwire, e hoishorora wagiwarnaga nigeshge hoirajgera wagiwekjegi.
50Egi Laban egi Bethuel hornihairena egi wairena: Washan de‐e Jehowa eja howajigaja, inke washa hirohire egi inke washa phi hinige tuxurugwinina.
51Horuxujre Rebekah joweraregi‐nankaja, rusre, egi karare, egi hirukana hashinira hinigra khanag‐gigire, Jehowa era shesge.
52Egi herena, jaja Abraham ware harnira hoit’e airare naxgungi, Jehowa jewehieja wakhuna (gikarajshana).
53Egi warajega shurasga woikikax egi shurasi woikikaxra egi wainira warnijina egi Rebekah wawok’una, egi khinubra egi hiunira hishge washa jexi wawogarna.
54Egi waruj‐hirena egi rajgainena, e‐hereanaga egi wang wakishu jira, egi haiserej hiwushairena, egi haininegi kikawa‐airanaga egi wena: Hirukana harnira eja howakere‐ingigire.
55Egi Rebekah khinubra egi hiunira wairena: Hinugnigra hamb‐jarnahangi hakarakishu un hingigiwire nigeshge hamb kerepanaisha, she‐e hageja rekjena.
56Egi wawagena, inke hiwusha‐wiwinine, Jehowa hoikiwarera hisge‐hingigige esge. Kere‐hingigire e hirukana harnieja wawakerekjena.
57Egi wairena: Hinugnigra hagigokjawina egi hingiwaixjawina.
58Egi Rebekah gigoirena egi wagairena: Jasge wang de‐e harakishu sherekjeshe? Egi wena: Tekjanena.
59Egi hinugjab‐hirera Rebekah regigirena egi hinug harniunihera hakishu, egi Abraham ware harnira egi wang warnira wakishu.
60Egi Rebekah washophi howe‐rogiguinena, egi wagairena: Ne hinugnik‐jabwina worohanje hogihixete hogihiwanganunig ranikjena egi su washinira wawosh’ighirera jhinag‐jhirob harninera wagarni wagigire.
61Egi Rebekah nashina egi hinugware warnira, egi wanoijge‐huxashog haminag‐hirena egi wangra hironag, egi warajega Rebekah rusanaga egi kerena.
62Egi Isaak huna ni‐wagu niambra wajara higairera eja huna, ma wiorojanje eja jhina.
63Egi Isaak maxeja gikaraj rena hoxjarnanegi egi woruxujgaja, egi hajarna, egi horuxujre wanoijge‐huxashogra haguhairena.
64Egi Rebekah woruxujshana egi jaja Isaak hajagi, wanoijge‐huxashogeja t’ampshana.
65Waranaka jornineja wagena: Wang de‐e peshe hereshe maxregi hikipa howahuhe maniangre, egi waranaka wagena: Hirukana harnira herena, esge hishja hirarukaisha rus‐anaga egi hakikurukana.
66Egi waranaka washa jagu ungi harnaj Isaak hogiragshana.
67Egi Isaak Rebekah harni‐hoikewena hiunira Sarah hojhieja, egi Rebekah rus‐shana egi e hijawi hijijena, egi wogixetena. Egi Isaak rukheg‐hirena hiunira d’era hawau.
Currently Selected:
Hogusra 24: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
