Hogusra 27
27
1Egi herena, jaja Isaak shagkhi egi hishjara xijshana inke waja ruxurugnina, hinighi‐xetera Esau gigorna, egi wagena: Hinig‐haxji, egi Esau wagena: Horuxujre eegi hajena.
2Egi Isaak wena: Horuxujre shegunegi hinshag‐shana, inke hiaperesnina hamb hajinja jekjanegi.
3Esge wakurusre ningitarna wapahi washinira, mawoshu hashinira egi majgu hashinira egi gixara howarare egi warni hungini rare.
4Egi woruj phixji hingiune, jasge haiphira shesge, egi hingarni‐jiaje, haj‐jikjena, naxirag harnira najornijankjena kheni jharni.
5Egi Rebekah naxguna jaja Isaak hinigra Esau hokit’egi. Egi Esau gixara howarena warni hogini egi hagarni hikjege.
6Egi Rebekah hinigra Jakob hokit’ena, wena horuxujre naxguna hianjraga rakhinubra Esau hokit’era wena:
7Warni hingagurare egi woruj pixji hingiune, wahaijena, egi Jehowa jowehieja najornijankjena kheni jharni.
8Esge hinig‐haxji ho harnira hingiune jagu u‐nishire.
9Wanoijge horniheja howararnane, egi eja jarnax‐ning phira nupiwi hagurare egi she‐e hianjraga woruj phixji wagiunkjena jasge giphira shesge.
10Egi hianjraga she‐e haragashini rahikjena, rujharnaga egi naj‐hornijankjena kheni d’arni.
11Egi Jakob hiunira Rebekah wagena: Horuxujre hakhinubra Esau wang hinsheg hisha heregaja egi wang shara harnigaja.
12Jajiga nigete hinujgaige, egi waishjanke hirainaikjanegaja egi washa hoshishig howe hakinkjanena egi inke najhojaine.
13Egi hiunira wagena: Hinig‐haxji washa hoshishig howe hashinira ne‐hinrusjena, ho harnira harnaigixgune, egi rarnaga waigagurare.
14Egi rena egi waguhina egi hiunira wagarni‐kirina, egi hiunira woruj phixji una jasge hianjra giphira shesge.
15Egi Rebekah hinig‐xetera Esau waini phixji warnira warussana e warnijegi jhieja egi hinig‐xunura Jakob hogiwaxugshana.
16Egi jarnax‐ning hara nab‐eja wigiuna egi jashe hosharaija.
17Egi woruj phixjira hok’una egi waisgab‐duj e hirushja wahira hinigra Jakob harni‐wagigina.
18Egi hianjra hirahina egi wena: Jaji, egi Isaak wena: Eegi haunakshana, hajanga ninewishe hinighaxji?
19Egi Jakob hianjra wagena: Esau newinena jorni jhuine hashinira. Hauna jagu uinashira kikawa‐ane ningitarna, minagkhe egi warni harnira rujre, naxirag hashinira naj‐hunjankjena.
20Egi Isaak hinigra wagena: Hinig‐haxji jasgegaja xapgenig hish’eshe? Egi wena: Jehowa Mau hashinira hingarnijige esge.
21Egi Isaak Jakob wagena: Hiwusunshre ningitarna, nintujgakjena hinig‐haxji, jasge hinighara Esau neninearnaga nigeshge inke neninenigi.
22Egi Jakob hianjra Isaak hiwusunsh hijena, egi rujgarna egi wena: Hoit’era Jakob herena, eshi nabra Esau nab‐warnira hererena.
23Egi inke higinina, nabra hinsheg‐hirege esge khinubra Esau nab warnira wikisgege, egi najhojana.
24Egi Isaak wena: Hisgexji hinighara Esau nineshe? Egi wena: Newinena.
25Egi Isaak wena: Hiwusunsh hingarnijire egi hinighara warni harnira haijena, naxirag harnira naj‐hornijankjena egi hiwusunsh hagarnihina egi rujshana, egi nishuj hagarnihina egi rajgana.
26Egi hianjra Isaak wena: Hiwusunsh jige egi i‐hunkiwangre hinig‐haxji.
27Egi hiwusunsh hina, egi iokiwankshana, egi Isaak wainira hopanara horupanana egi naj‐hojana egi wena: Horuxujre hinighara hopanara max hopana hikisge e Jehowa naj‐hojara.
28Esge Maura wangregi ruja howaji hornik’una egi managre hoshira, egi waisgabra roha egi nishujra.
29Wankshigra wanigirairekjanena egi wankshig hokirajra ningiwaku‐hirekjanana. Warakhinubra wawishurukanakjanena, egi hiuniraga hinig‐wahira ningiwakhuhirekjanena. Higu peshe washoshishig howenigi, washoshishig howekjanena. Egi higu peshe washophi howenigi, washophi howekjanena.
30Egi herena Isaak higu jaja Jakob naj‐hojara girashjangi egi Jakob higu hihinabgaja hianjra Isaak jowehieja unjera, khinubra Esau nakikarara kirina.
31Egi hishge waruj phi giuna, egi hianjra hagarnihina egi hianjra wagena: Jaji kikawa‐ane egi hinigraga warni harnira rujre, naxirag hashinira naj‐hunjankjena.
32Egi hianjra Isaak wena: Hajanga ninewishe? Egi wena: Hinigraga newinena Esau jorni jhuine hashinira.
33Egi Isaak gissassana rokanana egi wena: Peshe hereshe? Hajinja unjeshe warni hornihianaga egi hingarnijira, egi harnaj haj‐shana kheni rakirini, egi naj‐wajana? Hojia, egi hophi howekjanena.
34Egi jaja Esau hianjra hoit’e harnira naxgungi xagra rokana wena egi mashja xagshana egi hianjra wagena: Najhunjane hishge jaji.
35Egi Isaak wena: Rakhinubra wapakanag hajina, egi naj‐hojaine hashinira harnikerena.
36Egi Esau wena: Hisgexjina phi wagairegaja Jakob higairera sikanegi hojan de‐e hinupahana hinukosgaja. Jeg‐jhuine harnira hingirus‐shana, egi horuxujre naj‐hojaine harnira hingirus‐shana. Egi wena: Inke naj‐hojaine washa hinagashinini‐shanakshe?
37Egi Isaak horniharna egi Esau wagena: Horuxujre, hirukana hashinikje hauna, egi wakhinubra harnaj wawak’una ware warnikjege. Egi waisgab egi nishuj wak’una, egi hinig‐haxji jagu ningiunk’jeshe?
38Egi Esau hianjra wagena: Jaji jasge naj‐wirojara hishankirashe? Jaji nishge naj‐hunjane. Egi Esau xagjirena.
39Egi hianjra Isaak horniharna egi wagena: Horuxujre, horajhira inke managre hoshinra harninikjanena egi inke wangregi ruja howajini.
40Egi wigijgux hashinira hik’u nina‐aimbkjanena, egi rakhinubra waragi‐sherekjanena. Egi hahi herekjanena hirukana ranikjanena, egi winapinra ragishish‐hikjanena jashe hashiniejagra.
41Egi Esau Jakob hosh’igshana naj‐hojainege hianjra naj‐hojara hawau. Egi Esau najge harnieja wena: Hamb jajiga hagixaigjera hiwusunsh hotagi, egi eja hakhinubra Jakob d’ehakje.
42Egi Rebekah hogirag‐hirena hinig‐hi xetera Esau hoit’e de‐e waegi. Egi rewagigina, hinig‐hi xunura Jakob gigoirena, egi wagena: Horuxujre rakhinubra Esau winakewenina d’enikjane hirena.
43Esge hinig‐haxji, ho harnira harnaxgune, egi nashinge, hakhinubra Laban eja hogiasre, Haran eja.
44Egi hamb jarnahangi hakishu hiwushaje, rakhinubra wogitegra hoginikhi.
45Rakhinubra wogitegra hoginig‐harnaga egi jagu ragish’ura wakikununigi, egi rewagigianaga egi eja harnigu hahirekjena. Jagu‐u hamb hishankira hinuwinke nixawanikjawishe?
46Egi Rebekah Isaak wagena: Wankshig‐ra hinjgena, Heth hinugwahira hawau. Jakob Heth hinugwahira hisha khanakhi, managre eegi hinug hiranagre shesgera, wankshig‐hoi harnira jagu phi hingiunkjaneshe?
Currently Selected:
Hogusra 27: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
