Lukga 21
21
1Egi woruxujshana egi wang hitajera wajarna shurahoshueja shura hoshunankshana wawogairege.
2Egi hikanagit’e wanajojaisgeisha shige hajarna Lepra nupiwi hijoshurna (shurashuj kerepananup sajahashana wagiuna).
3Egi Jesus wena: Hisgexjina hinigawina, hikanagit’e wanajojaisgejane eshana hiraijera hijoshurna.
4Hijanenanka harnaj juxji waunankshana hijoshuirega Maura hokuinega, eshi hinugjane warugesjena jarnaga harnira harnaj wogarna.
5Egi hota wohokhu‐hojhixetera haehirena hophiura ini phi jexi egi wogaire hiuinegi, Jesus wena:
6Washa washjarajane, hambra jigi, e inke inira hisha hirajakikanag harnagnikjanena inke nige hot’une phininagre.
7Egi higiwaxhirena, wairena: Wawagaxhajawagigira, jajanegi washa de‐e herekjaneshe? Egi washa woijanti jaguisha heregi, egi washa de‐e herekjaneshe?
8Egi wena: Hirakara‐uwianje inke nigishjanke hiranikjawina. Rohaxji rash harnira hiuanjirekjanena, wairekjanena, Kristus newinena. Egi hiwusunsh hotagi waunkjanena, esge inke wironagwinianje.
9Egi jaja kissaire warnanaxguwingi egi wopunusesgegi, inke naxirawinianje, washa de‐e jorni herekjanena, inke higuana hoshejara herenikjanena.
10Egi wawagena: Jhinag hokirajra kikisairekjanena, egi hungmara kikisairekjanena.
11Egi mara hixgara rokanakjanena nigeshana, egi dokewehira egi Pestra herekjanena, egi horuxujra nakewesgekjanena, egi woijanti rokana wangregi howajikjanena.
12Eshi kheni de‐e hereni, harninukos‐hirekjanihawina, egi hinigishanainekjanihawina, wohokhu‐hojhieja harnini‐hahirekjanihawina egi jhiwornasse hojhieja, egi hung jowehireja egi washa hirukanaija harnini‐hahirekjanihawina, rash harnira hawau.
13Egi e wihohira hinigirerekjanihawina.
14Najge washiniwieja nihe‐wahiwiaje inke wewiwinianje jagu hishekjanihawigi.
15I‐junikjanihawina egi wanaiksab‐ninkjanihawina, harnikira nangwigi inke khibanigigi ruxurug hiranikjanihawina inke shige niwajis ruxurug hiranikjanihawina.
16Egi himaninag hirekjanihawina sh’agwarawiga egi warakhinubwira, egi washawarawiga egi hijakorowarawiga, egi hota d’ehira ninekjanihawina.
17Egi wankshigra harnaj hornish’ighirekjanihawina rash harnira hawau.
18Eshi inke naju washiniwina hisha d’arnikjanena.
19Warnaiserej hish’uwingi naxirag washiniwira warakarashinikjanihawina.
20Egi jaja Jerusalemra manapera haikshaine washjawigi, hiraperes‐kjanihawina maisinshjanera hiwusunsh hotara.
21Egi Judea eja herera xeja hogias hirekjanena, egi jarnaga rogejanankhi hihinab‐hirekjanena, egi jarnaga hirarujeja unankhi inke hoikawairanikjena.
22Egi hambnagre wakarakje haimbkjanena, egi jarnaga washara wagaxangre harnaj exji herekjanena.
23Egi wojexi harus‐hirekjanena jarnaga waujganagankhi, egi jarnaga ninkjang was‐hokuankhi hambnanka eja, manaka washoshishigji howekjanege esge, egi wankshignagre hawairekjanena.
24Wigijgux hopahieja hakinib‐hirekjanena, egi warukos‐hiranaga jhinag hokirajeja warniagirekjanena, egi Jerusalemra naxirixiri‐hirekjanena hirarujheregi herera wauinekjanena, jaja hirarujheregi herera higireregi herekjanena epa.
25Egi Hambwira wijantikjanena egi hahewira, egi wiragoshgera, egi ma‐ihagregi wankshig hokirajnagre hawexji hirekjanena wowewi harej hirekjanena, tejara egi jashjara woxejiregi.
26Egi wankshigra d’airekjanena naxirairegi egi maihagregi washa jikjanega karakjamb‐hirege wauinekjanena egi hishge wangregi homashjara hixgainekjanena.
27Egi hajairekjanena Wankshig‐hinigra maxiwieja huhegi, homashjara egi gloria rokana.
28Egi jaja washa de‐e heregi, rojankirijewiaje egi gisijwiaje, wankshighoi hashiniwira hiwusunsh jige esge.
29Egi washinsgera wawigena: Fig‐nara egi nara harnaj woruxujwire,
30Jaja abra jinaghiregi hashjawigi egi ne hiraperes‐kjanihawina dogra hiwusunsh harege waunkjanera.
31Nishge she‐nisgekjanihawina jaja washa de‐e here hashjawigi, hipereswiaje Maura hungma harnira hiwusunsh harera.
32Hisgexjina hinigawina wankshighoi de‐e inke shejanikjanena, jaja hahi harnaj heregi epa.
33Wangregi herera egi mara shejankjanena, eshi hoit’e harnira inke shejanikjanena.
34Egi hirakikarawiaje, nigete najge washiniwira hawuhinshwarawiege warujxete‐u egi warajga, egi wankshighoi egi washa nagre shesge hirawuhinsh warawiege, shesgerawigi hambeja hawushiri‐ninkjanihawina.
35Mas‐haraxjag higiunisge wagigirekjanena jarnaga ma‐ihagregi uankhi.
36Esge hirakara uwianje egi hoishib gikarajwiaje, e washinkisge ningikarab‐hirekjanihawina, hokishib washa de‐e herekjanega eja, egi washinkisge Wankshig‐hinigra jowehieja nanashikjanihawina.
37Egi hambregi wohokhu‐hojhixeteja washa wagigusjena, egi hahega hihinabjena, egi xe‐isha Oliw‐xera higairera eja hiwushajena.
38Egi wankshigra harnaj hainixji hirajiranaga wohokhu‐hojhixeteja harnaxgu hajinankshana.
Currently Selected:
Lukga 21: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
