Lukga 22
22
1Egi waisgab hinawohi rokarni worujra hiwusunsh harena Pasxa higairena.
2Egi nabhoruxaj hirukana hungra egi wowagax hiperesra jasgehirarnaga d’ehirekjanegi horninena, eshi wankshigra warnakawairena.
3Egi Judas rash hinubra Iskariot higairera, nuphashanara e hisha herera Satan hokawairena,
4Egi rarnaga nabhoruxaj hirukana hungra wawokit’ena egi manape hungra, houna jasgehianaga wawimagiraikjanegi.
5Egi hito‐inena egi warnaira horeishankira khinena shura hokuinena.
6Egi Judas wamangirajshana egi houphi hornikjanena wimangiraikjanega inke worohainja herenikjanena.
7Egi waisgab hinawohi rokarni hambraherena, eja Pasxara d’ehirekjanena.
8Egi Jesus Peter egi Johnga rewagigina, wawagena: Rawire, egi Pasxa (worujra) hingi‐korohowire, hiwaruijhawina.
9Egi wagairena, hajinja hirushja hakjanihawishe?
10Egi wawagena: Horuxujwira, jaja jhinagra horakawawigi, eja wangisha harakishjakjanihawina, rexorowasge soroj‐isha ni hoshu ruanjekjanena, hironagwiaje jhi hajinja hoikewegi.
11Egi waragekjawina jhi harnijega: Hirukanara warnigena, hajinja jhi worujra hereshe, eja Pasxara haijanihawishe wironagra wakarakishu?
12Egi jhi‐wang xeteisha himanigiraikjanihawina hirushjaxji‐angikjanena eja hirushjahiwiaje.
13Egi harairena, egi hierena jagu wawigera shesge, egi Pasxara hirushjahirena.
14Egi jaja howagixra heregi, minagshana Apostel nuphashanara wakarakishu.
15Egi wawagena: Pasxa de‐e hakishu waruj roniguxjiwina, kheni hawani.
16Esge warnigawina, inke hinupahara hajnikjanena jaja Maura hungma harnira heregishana epa.
17Egi ni‐wirajgara rus‐shana egi wainabshana, egi wena: De‐e ruswire egi hikiweniwire.
18Hinigawina inke habsinshnagra watajganikjanena, jaja Maura hungma harnira jigishana epa.
19Egi waisgabra rus‐shana egi wainabshana, egi rujhena egi wawogarna, wena: De‐e ro harnira herena, E wornigigairawina, de‐e sh’uwingi hiwewiwianje.
20Egi shige shesge hina ni‐wirajgara russana hoxjarna waruj rushjangi wena: Ni‐wirajga de‐e Testament‐jegra herena wa‐i harninegi, E xunigigirawina.
21Egi horuxujwire hisha himainaikjanera nab harnira waruj hihagregi harni hakishu haunankshana.
22Egi jasgegi Wankshig‐hinigra kerekjanena, shegu hirege, eshi hawekjanena hisha wimanakjega.
23Egi hikiwax hajiarairena peshe washa de‐e waunkjanegi.
24Egi exjinena hajanga e hiraijera xetekjanihawigi.
25Egi wawagena: Hung hirarujheregi herera wawirukanajena, egi jarnaga wawirukanananka washa wagijirega higarnankshana.
26Eshi inke shenisgarnikjanihawina. Egi horogregi hisha hiraijeranankhi, xunuxjinig hikisgekjanena. Egi hisha hungnankhi, wawagire hikisgekjanena.
27Hajanga e xete harnakshe, hisha warujeja minaganagka, nigeshge wawagirajega? Inke e hereninashe hisha warujejananka? Egi horograwiregi hauanjena wawagire hikisge.
28Neninewina, washinohire howe hoishib hinakishu sh’uwira.
29Egi hungmara hornik’uwina, Jajiga hunkura hikisge.
30Waraijawige egi sharajgankjawige waruj harnieja hungma harnieja, egi hung‐waminageja minag, woehiwagiu wankshig howajehi nuphashana Israelra.
31Egi Hirukanara wena: Simon, Simon, horuxujre, Satanra nirus roguxji hajena, nigituixjawige waisgab nisge.
32Eshi gikarajnigigina, harnaxgu hashinira inke shejanikjege, egi jaja shawakshangi, warakhinubra himashjahirekjanena.
33Egi Peter wagena: Hirukanara, hiakorohornakshana harnikishu tekjanena, jhi‐hornassairera egi d’ehirera.
34Egi wena: Hornigitagshana Peter, bagawaxgewangra hamb de‐e inke xagnikjanena, jorni daniha khibainakhinkjanena hinaperesnunige.
35Egi wawagena: Jaja shuroshu rokarni reningigiwira, egi pa, egi waguje rokarni, jaguisha hininujiswishe? Egi wairena: inke washanisha hinujiswinina.
36Egi wawagena: Egi shegunegi hisha shuroshu hashiniwingi kurusre, egi shige panra, egi hisha wigijgux jushgunigi wonashina wikuruwinge egi hisha ruwine.
37Wanigawina, shige washa de‐e wagaxangre newaigairera jasgegi herekjanena: Wigishana horog gikarab hirena. Egi jagu wagaxhirera newaigairera hoshejana herekjanena.
38Egi wairena: Hirukanara, horuxujre wigijguxra eegi nupiwi hahankshana, egi wawagena: Phinkjanena shenagawigi.
39Egi hihinabshana, egi Oliw‐xeja hikeshununa eowarena, egi hironag warnira hironaghirena.
40Egi jaja hijahigi, wawagena: Maura gikarajwire inke washoshishig uwahieja horawarai‐sharanikjawina.
41Egi ejaxji ini hounehishaxji howarena, egi huporominaganaga egi (Maura) gikarajshana.
42Wena: Jaji raipingishi ni‐wirajga de‐e hinxakjena, eshi inke woshga harnira herenigaja, eshi hashinira heregaja.
43Egi waxopiniwarajireisha jantigikhina wangregi howaji himashjahire.
44Egi hawera rokanaxjingi hiraijera hasohixji gikarajshana, egi hotakakajra wa‐ira rokanaxji mainja x’e hikisgena.
45Egi jaja kikawa‐angi gikarajra egi wironag warnira wirakirina, nanank’u wiena najgerategnanke.
46Egi wawagena: Jagu‐u ranawishe? Kikawa‐awige gikarajwire, washoshishig‐ueja horawaraisharawiege.
47Egi higu hit’at’ajau, horuxujre worohaxji jina, egi Judas higairera nuphashanara eisha herera jowehireja uankshana. Egi Jesus hirajiarnaga iokiwankshana.
48Egi Jesus wagena: Judas, Wankshig‐hinigra himasharagre iokiwank hish’ushe?
49Egi wakishu‐unjega hajairegi jasge hirekjanera, wagairena: Hirukanara, jasge wigijgux hiunkjanihawishe?
50Egi hisha nabhoruxaj hirukana hungra ware harnira hojinena egi najawa sanig hoishorora gixguirena.
51Egi Jesus horniharna egi wena: Hinpewiginine, egi najawara higikiorna egi rushjahina.
52Egi Jesus nabhoruxaj hirukana hungnanka wawagena egi manape hungnanka wohokhu‐hojhixeteja herera egi xetera: Hirajirega wankshigd’ehi hirajinisge rawi, wigijgux egi wiwapox harni.
53Hambokahi wohokhu‐hojhixeteja harnikishu hauwina, inkaga hisha hinakisharawini nab renawinishunura, eshi howagix de‐e niashiniwina, egi hokawasra homashja harnira.
54Egi harukos‐hirena, egi harniankarairena egi nabhoruxaj hirukana hung hojhieja harniangirena. Egi Peter harixji hironagshana.
55Egi jaja jhiakohi jangeja hokissageja pej hot’uinegi egi eja harnaj minaghirena, Peter hishge horogeja minagshana.
56Egi hinugisha hajarna pej hijejeja minaganankhi egi wogisogji horuxujshana egi wena: Wang de‐e hishge hakishu‐una,
57Egi khibakhina, wena: Hinugra inke hiakiperesnina.
58Egi hagregi xapgenig hijane hajairena egi wena: Hishge hishaerena. Egi Peter wena: Wangra inke neisha winenina.
59Egi ejaxji hagregi howagix hishanguni hijaneisha hiperesjinge wena: Wogisogjina de‐e hishge hakishu‐una, Galilea wankshigisha herenakshana.
60Egi Peter wena: Wangra inke hiaperesnina jagu hishegi. Egi higuana, higu hit’at’arnak’u bagawaxgewangra xagshana.
61Egi Hirukanara hijopahinashina egi Peter horuxujshana. Egi Peter wewina Hirukanara hoit’e arnihera jagu higera. Kheni bagawaxge‐wangra xagni, daniha khibainakinkjanena.
62Egi Peter hihinabshana egi xagra rokanaxjiwena.
63Egi wang Jesus harukosnankhi igixjairena egi hojinena.
64Egi jaja hishjara hagirukainegi, hishjaija hojinena, egi higiwaxhirena, wairena: Prophethire peshe hornijingi?
65Egi washinjahira roha raxjashguni hirakirairena.
66Egi hamb hakirigi wankshignaka xetera egi nabhoruxaj hirukana hungra egi wowagax hiperesra stoirena, egi woehi harnieja harniahirena, wairena:
67Kristus nenineshe? Hungiragwire. Egi wawagena: hornigitagwishge inke harnanaxguni‐kjanihawigaja,
68Egi nishge winigipaxwishge, inke hinagi‐xapwininana, egi inke kere‐nagigiwininana.
69Epa Wankshig‐hinigra Maura homashja harnira hoishoro hieja minaikjanena.
70Egi harnaj wairena: Maura Hinigra nenineshguni? Egi wawagena: Shesge hishawige, egi newineajena.
71Egi wairena: Inke hiraijera wihohi hiunikjanihawina, nexji hinaxguwingaja E iarnieja.
Currently Selected:
Lukga 22: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
