Lukga 5
5
1Egi wauinena, wankshigra woroha hiranassunsh harairena, Mau hoit’era harnaxgu, egi Genesareth te‐hijejeja nashina.
2Egi wajra nup hajarna teja, egi hoikisherera hihinabhiregajerena egi hoigixera wakurusharnankshana.
3Egi wajnaka eja hisha howairena, Simon harnieja, egi higena jowexjinig najiraija hinagishina, egi minagshana, egi wajeja minaganaga wankshigra washa wagigussana.
4Egi jaja hit’et’era rashjangi, Simon wagena, hosheweja wajra hinagire, egi hoigixe hashinira niokarat’unare horisge raixegjena.
5Egi Simon horniharna wagena: Hirukanara, haiserej watawina, egi inke washa haixewinina, hisharajege esge hoigixera ni‐wat’untekjanena.
6Egi jaja deshegu hiregaja, hora rokanaxji wagiuinena egi hoigixera gigas‐hirena.
7Egi wawokishgara wawigigus‐hirena waj hijanejananka, hahuranaga wagijirairekjege. Egi hajirena egi wajnanka hinuinke hoixjinena, egi wajra howajib harairena.
8Simon Peter jaja hajagi, egi mainja himpshana Jesus jowehieja, wena: Hirukanara hijahi howakarare, washa woishana u wankshig harnige.
9Simon Peter khorena egi wakishu unjega harnaj, hora rokanaxji gixerege esge.
10Egi hishge Jakobga egi Johnga Sebedai hinigwahira khorairena e Simon wawokishgara. Egi Jesus Simon wagena: Inke naxiranine, epa wankshig hirakisherekjawina.
11Egi jaja wajra moroija warnihagiregi, harnaj wat’unairena egi hironaghirena.
12Egi wauna, jaja jhinag hisha eja higi, horuxujre, wangisha lepra una rokanana, e Jesus hajarna hishjara mainja herehi jimpshana, egi gikarajshana wena: Hirukanara, hiraregi rushjainashgunina.
13Egi Jesus ara wajigre‐hianaga hikiorna, wena: Haunkjanena, ninushjankjena. Egi higuana lepra rushjana.
14Egi rogixina inke hisha hogiragnianje higena, eshi ranaga egi nabhoruxaj hirukanainja kikawahaje, egi nabruxajaje ninushjane, Mosesga uwashira hiu waworagisharag washunkjanena.
15Eshi hijairaxji harnaj hornaxgu harairena egi worohaxji storna naxguhajire, egi howasharnankhi rushjawahikjege hajirena.
16Egi mojainainja howarena egi Maura gikaraj.
17Egi wauna, hambisha eja washa wagigusnankshana, Pharisera hijarnankshana egi woehi hirukana hungra hija minagnankshana e Galilea mowagaxeja jhinagnankhi eja howajirena egi Judea mowagaxeja, egi Jerusalem‐eja. Egi Maura homashja harnieja nankshana, rushjawahira.
18Egi horuxujre, wang hajirena wangisha homig hot’umb harni, ro‐t’egisha, egi hija harniokewenainena, egi jowehieja t’umbhirekjege.
19Egi jaja inke nige harni howairephi hieranigi, wankshigra rokanaxjinge esge, jhi‐hihageja hahirena, egi inidashuj parasra (hisge rus‐hiranaga) egi homigra hirassa eja howaji huhirena horogeja Jesus jowehieja.
20Egi jaja Jesus harnaxguinera wajagi wagena: Wankshigra, washa woishana washinira warnigit’untena.
21Egi wowagax‐hiperesra egi Pharisera wewi‐hajiarairena, wairena: Peshe de‐e hereshe, Maura raxjashguni hit’at’arnagre? Peshe washa woishana wagit’une ruxurugnakshe, eshi Mau rashana?
22Egi Jesus wagijarna wowewi warninera wornigiharna, egi wawagena: Najge washiniwieja jagu hirarashanakshe?
23Hajanjega era wowategenigshe, washa woishana washinira warnigit’untena era, nigeshge nashianaga manine era?
24Eshi hiraperes‐kjanihawina Wankshig‐hinigra homashja harnijena ma‐egi washa woishana wagit’une (howashaka wagena rot’eganka), hinigena, kikawa‐ane egi homigra kurusanaga jhi‐horajhieja howakarare.
25Egi higuana kikawa‐ana jowehireja, egi washaisha homing‐ankhi kurusanaga, egi eojhieja howakerena Maura rajank‐kerena.
26Egi harnaj khorairena egi Maura rajankhirena, egi nakewera rokanainena, wairena; Hamb de‐e washa jeg hajawigaja.
27Egi washa de‐e hageja nigeowarena, egi Publikanraisha hajarna, Lewi higairena, woirowe horus‐hojhieja nakshana, egi wagena: Hiroinagre.
28Egi harnaj wat’unena, nashianaga egi hironagshana.
29Egi Lewi warujxete giuna, eojhieja, egi eja Publikanra worohaxjiankshana egi hijanera wakishu minagnankshana.
30Egi eja wowagax‐hiperesra nankshana egi Pharisera, haegiginankshana wironag warnieja wairena: Jagu‐u Publikanra egi washa woishana ura wakishu warajhashanakshe egi rajga warakishu‐shuwishe?
31Egi Jesus horniharna egi wawagena: Jarnaga wanaishguniankhi inke makhani hiuninankshana, eshi jarnaga howashakhi.
32Inke phira wagigo hajinina, eshi washa woishana ura najgera wakarateg hirekjege.
33Egi wagairena: Jagu‐u Johnga hironaghirera hantaginajkaireshe egi Maura gikarajire, egi shige shesgairena Pharise wironag warninera? De‐eshi waruj hiranaga egi rajganak.
34Egi wawagena: Hinug‐khanaikjanarnaga waruj jiwarashiwianaga hajiregi jasge hantaginaj waragigiwinashe, jajaixji hinug‐khanaikjanega wakishu unjegi?
35Eshi hambra hajiregi, eja hinug‐khanaikjanega wagirus‐hirekjanena, egi hambanaka eja hantaginaj hirekjanena.
36Egi hishge hisgeraisha wogiragshana, inke wankshigra hisha wonashi jeg eja nige rusanaga wonashi shag’eja hirarujagninana, shesge higi hinuwinke poxwahinana, jegrashge jegnaka eja nige shuruswige shaganaka inke hikisgarninana.
37Inke wankshigra hisha nishuj‐jeg hiregi pex‐shageja hoshuninana, shesge higi nishuj‐jegjega pexra xuxrehinana egi xunanana egi pexjega maisinshnana.
38Eshi nishuj‐jegra pex‐jegeja woshuiranana, egi hinuwinke phinanana.
39Egi inke wankshigra hisha nishuj shag rajgangi, nishuj‐jeg rogujijeninana, eshi warnana: Shagra e phinena.
Currently Selected:
Lukga 5: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
