Matthaiga 2
2
1Egi jaja Jesus Bethlehem Judea moagaxeja jhuinegi, Herodes hungra wankshig‐iniharegi, horuxujre, wang wanaiksab wiaxebhuregi howaji Jerusalem‐eja hajirena.
2Wairena: Judra hung harninera hojishana wankshigingi hajinjanankshe? Wiragoshge earnira hajhawina wiaxebhuregi, egi hagikaraj hajiwina.
3Jaja Herodes hungra washa de‐e naxgungi, najge wojijinakshana, egi Jerusalem harnaj wakishu.
4Egi jaja stowahigi nabhoruxaj‐hirukana‐hungra harnaj, egi wowagax‐hiperesra wankshig‐ejananka stowahina, wawigiwaxshana hajinja Kristus jhuinekjanegi.
5Egi wagairena, Bethlehem Judea moagaxeja, shesge prophetra wagaxhirena:
6“Bethlehem ranira, Juda ma‐harnieja, Juda jhinag xete warnira horogeja inke worujisjina herenina, eja Hirukanara howajikjanege esge, E Israel wankshig warnira wirukanakjanena.”
7Egi Herodes jaja wang‐wanaiksabnanka nuxawa wagigogi, wogisogji wawigiwaxshana jajanane wiragoshgera jantingi.
8Egi Bethlehem‐eja howarewagigina egi wena: Rawige egi ninkjangnigra hasohixji horniwianje, egi jaja hish’ewigi hungirag‐jiwiaje, hishge hahiarnaga hagikaraijena.
9Egi jaja hungnanka naxguinegi, harairena. Egi horuxujre, wiragoshge wiaxebhueja hajairera, jowehireja rahena, uanku hijahina hajinja ninkjangnigrakhi eja wanghieja hiwusharna.
10Jaja wiragoshgera hajairegi, wogishawara rokanaxji hirena.
11Egi jaja jhieja hokawairegi, ninkjangnigra hajairena, hiunira Maria hakishu, egi mainja himb‐hirena egi gikarajhirena. Egi jaja washa jexi hoshura wakuru‐eregi, washa woga hokuinena, shurasi egi frankinsense egi mirrh.
12Egi Maura hinakewe‐wahina hihante wahina, Herodes inke hakja eja hahiranikjege, ma e‐warnineja howakarairena nagu hijahi hogiwairena.
13Egi jaja hakarairegi, Hirukanara waxopiniwarajire harnira Joseph janti‐gikhina hihante higiuna, wena: Nashine egi ninkjangnigra rusre egi hiunira, egi Egipt‐eja hogiasre, egi eja unjanje, hornigitag hahigi ejipa. Herodes ninkjangnigra hornikjanena, d’ehikjege esge.
14Egi kikawa‐ana egi ninkjangnigra egi hiunira warusanaga hahe‐eja, egi Egipt‐eja howarena.
15Egi eja unjena, Herodes hot’eja hipa. Exji herekjege, Hirukanara wena, prophet hisha egigina, wena: “Egipt‐eja hinighara hakara‐gigoreharna.”
16Egi Herodes jaja hajagi wang‐wanaiksabnanka gishjankerera, mashja wogitegshana, egi rewagigina, egi hojinjinigra harnaj t’ewahina, jarnaga Bethlehem‐ejanankhi egi hipaijanankhi harnaj, ma‐nupahana epa egi xununa, jarnaha‐najegi wang‐wanaiksabnanka wogisogji wawigiwaxnihera.
17Egi exji herena, Jeremia prophetra jagu arnihera, wena:
18“Rama eja uwa naxguinena, khixaghirena egi xagnanka, egi ijanigra rokana warnankshana, Raxel ninkjangnig warnira wagixagiena, egi inke rukheg‐phiranina, shegu hiraginige esge.”
19Eshi jaja Herodes t’egi, horuxujre, Hirukanara waxopiniwarajire harnira Joseph Egipt‐eja hohante hijanti gikhina.
20Wena: “Kikawa‐ane egi ninkjangnigra egi hiunira warusge egi Israel ma‐eja howakarare, t’airena e ninkjangnigra t’ehi nainera.”
21Egi kikawa‐ana, egi ninkjangnigra egi hiunira warusanaga egi Israel mainja kirina.
22Eshi jaja naxgungi, Arxelaus Judea moagaxra hirukananankhi hianjra Herodes hominagra hominaganankhi, eja howarera nakewena, egi Maura hinakewehina hihante hina, jasge hikjera, gixarnaga Galilea moagaxeja hina.
23Egi hiarnaga egi jhinag hisha Nasareth higairera eja jhina. Exji herekjege, jagu prophetra airanihera, E Nasaren‐hisha higairekjanena.
Currently Selected:
Matthaiga 2: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
