Maroko 6

O Nika 'Osi no Nacali a Tamdaw ci Yisan

(Matay 13.53-58; Luka 4.16-30)

1Nanoya, liyas sato ci Yis itira a minokay i niyaro' Ningra. Mihaklong ko nisawawaan Ningra itiya. 2Maraod ko Pasla'an a Romi'ad, mipasifana' Cingra to tamdaw i kasa'opoan a loma'. Safahka' sa ko 'alomanay o pakatngilay to sowal Ningra. Sowal sa, <<Nai cowaay ko sakafana' nonini a tamdaw saw? O cima ko pafliay to taneng i Cingraan saw? Iro pakapidmak haca Cingra to kafahka'an a dmak! 3O misakilangay a sayho Cingra kiya saw? Caayay kao wawa ni Mariya, o kaka ni Yakop aci Yosif aci Yuta aci Simon Cingra saw? Ini a mikapot i titaanan ko safa Ningra to fafahiyan kiya saw?>> saan. Orasaka, ma'osi cangra i ci Yisan.

4Pasowal sa ci Yis i cangraan, <<O mikangodoan no i cowacowaay no niyaro' no tireng, ngangasawan ato paro no loma' ko pali'ayaway to sowal no Kawas,>> saan.

5Orasaka, caay pidmak ci Yis to ccaccay aca a kafahka'an a dmak itira. Deng o pikapa Ningra a miadah to papinapina a adadaay a tamdaw. 6Safahka' sa ci Yis to nika ^ca paso'lin nonini a tamdamdaw.

O Piocor ni Yis to Tosa ko Safaw a Tarokos

(Matay 10.5-15; Luka 9.1-6)

Pararid ci Yis a romakat to kasa niyaroaro' a pasifana' to tamdaw. 7Tahidangen Ningra a misa'opo ko tosa ko safaw a tarokos. Pahtatosatosaen Ningra cangra a miocor. Paflien Ningra cangra to sapifahfah to kaackan a 'adingo a 'icel. 8Palimo'oten Ningra cangra a somowal, <<Ano mirakat kamo to niyaro' i, ka o cokor a ccay ko tatoyen. Aka pihawikid to kakaenen ato lofoc ato payso i 'alofo namo. 9Ccayen ko cokap, aka piala to sapatisod a riko',>> han Ningra. 10Pasowal haca Cingra i cangraan, <<Ano i cowaay a loma' ko makahiay a mihamham i tamowanan a tamdaw, ta itira han a maro' kamo. Itira han tangasa i piliyasan namo toya niyaro'. 11Ano talacowacowa to i, ira ko caayay pihamham tamowanan a niyaro' a caay ka sapitngilan a tamdamdaw i, tihtihen ko alafoh no saripa' namo a miliyas itira. Onini, o sapahapinangaw i cangraan to sapapi'imer to dmak nangra,>> han Ningra.

12Tayra sato koya nisawawaan a patnak a papipasasiyor to faloco' no tamdamdaw a pasayni i Kawas. 13Fahfahen nangra ko 'alomanay a palafoay a pasadak nai tamdaw. Sipasipen nangra to simal ko 'alomanay a adadaay a miadah.

O Patay ni Yohani o Paino'ay

(Matay 14.1-12; Luka 9.7-9)

14Malosiyang i cowacowa ko lihaf to pakayniay ci Yisan saka, matngil ni Hiroti a hongti konini a dmak. Ira ko somowalay, <<Lomowaday a ma'orip nai patay ci Yohani o Paino'ay saka, ira ko 'icel a midmak to matiniay a kafahka'an,>> saan.

15Sowal sa ko roma a tamdaw, <<Ci Iliya Cingra,>> saan.

O roma a tamdaw i, <<O pali'ayaway to sowal no Kawas Cingra, matiyaay o ccay no itiya:ayho a pali'ayaway to sowal no Kawas,>> saan.

16Matngil ni Hiroti konini i, sowal sa, <<Ci Yohani o paino'ay korira, oya na niktonan ako ko li'el ningra, o lomowadayto cingra a ma'orip nai patay!>> saan. 17Ci Hiroti ko miocoray to tamdaw a papirpet ci Yohanian a mipalit i pirofoan. Onini a dmak i, o sakapisanga'ayaw ni Hiroti ci Hirotiyasan, nawhani, o nikalafafahiyanto ni Hiroti ci Hirotiyasan o fafahi no salikaka ningra ci Filip. 18Nawhani o nano kinapinapinaayto a toro'en ni Yohani ci Hiroti to, <<Caay ka nga'ay kiso a mi'afas to fafahi no salikaka iso,>> sanay.

19Orasaka, ci'intel ci Hirotiyas ci Yohanian, sapipatayan i cingraan, nikawrira, caay pakalahci cingra. 20Nawhani mafana' ci Hiroti to nika o mo^celay ato fangcalay ko faloco' a tamdaw ci Yohani saka, matalaw cingra ci Yohanian, pa'adingen ningra cingra. Talacowa tata'ang ko rawraw no faloco' ni Hiroti a mitngil to sowal ni Yohani, nikawrira, maolah cingra a mitngil.

21Kawas i, ira ko kanga'ayan a romi'ad ni Hirotiyas. Yo kahofocan ni Hiroti a romi'ad i, tahidangen ni Hiroti ko tapatapang ato kakrikridan no sofitay ato kakrikridan no niyaro' no Kalili a papitahka a malawla. 22Itiya kakomaenan i, ira a micomod ko kaying a wawa ni Hirotiyas#6.22 wawa ni Hirotiyas ira i roma a katlangay a cudad a matilid, wawa ningra ci Hirotiyas. a masakro a palipahak ci Hirotian ato maro'ay a lafang ningra. Saka, pasowal sa ko hongti toya kaying, <<Ano o maamaanto ko nilongocan iso i takowanan i, mihai kako a mi^min a pafli i tisowanan,>> han ningra. 23Do^do sa i, mikton haca cingra a somowal, <<Ano o maan ko nilongocan iso i, ano latosatosa no kitakit ako i, paflien ako kiso,>> han ningra.

24Saka, sadak sato koya kaying a milicay to ina ningra, <<O maan ko sasa^lien ako saw?>> han ningra.

Paca'of sa koya ina ningra, <<O fongoh ni Yohani o Paino'ay,>> han ningra.

25Itiya i, sakalamkam sa a patiko a tayra i ka'ayaw no hongti koya kaying a milongoc a somowal, <<Tangsolen hongti! Pakitipiden ko fongoh ni Yohani o Paino'ay a pafli i takowanan!>> han ningra.

26Pakatngil ko hongti tonini a sa^li i, ksem sato ko faloco' no hongti. Nikawrira, tona o niktonanto ningra ko sowal i ka'ayaw no lafang ningra a ma^min saka, caayto ka nga'ay a mina'ay to nilongocan noya kaying. 27Saka, tangsol han noya hongti a miocor ko misimaway a sofitay a papipatayni to fongoh ni Yohani. Tayra sato i pirofoan koya misimaway a sofitay a mikton to li'el ni Yohani, 28ta pakitipid hanto ko fongoh ni Yohani a pafli koya fafahiyan a wawa ni Hirotiyas. Ta paflien noya kaying ko ina ningra. 29Yo pakatngil tonini a dmak ko nisawawaan ni Yohani i, tayra sato cangra a miala to horac a tireng ni Yohani a mitadem i tatademan.

O Pipakaen ni Yis to Lima a Patek a Tamdaw

(Matay 14.13-21; Luka 9.10-17; Yohani 6.1-14)

30Minokayto ko tarokos a tayra i ci Yisan, paratohen nangra to nano nidmakan ato nipatnakan nangra a dmak a ma^min i Cingraan. 31'Aloman ko tamdaw a macacofliflis. Saka, awaay ko limaw nangra a komaen. Saka, pasowal sa ci Yis i cangraan, <<Tatata. Miliyas kita a tayra i kato'olan. Ta pacna' kamo a pahanhan itira,>> han Ningra. 32Saka, dakaw sato cangra to tamina a dokdok sa a tayra i kato'olan.

33Nikawrira, ma'araw no 'alomanay a tamdaw ko nika tayra na Yis saka, Ca Yis kora saan ko nika fana' nangra. Cikay sato ko nai niyaroaro'ay a tamdaw a tayra a miki'ayaw ca Yisan a tahira. 34Yo ma^pod ci Yis nai tamina i, nengneng sa Cingra to 'alomanay a tamdaw, saadayay sa ko faloco', nawhani matiya to nipalafelan a siri cangra awaay ko midipotay. Saka, satapang sato Cingra a pasifana' i cangraan to adihayay a dmak. 35Yo sakato'mananto ko romi'ad i, miraod i ci Yisan ko nisawawaan Ningra a somowal, <<Makakremto ko romi'ad i matini. O kohkohan haca i tini. 36Paliwasaken cangra a patayra i ngataay a niyaro' a papicakay to kakaenen no paytmek nangra,>> saan.

37Paca'of sa ci Yis, <<Kamo ko papafli to kakaenen nangra,>> han Ningra a somowal.

Sowal sa ko nisawawaan, <<Kami ko tatayra a mi'aca to ^pang to tosa a so'ot (200) a tinali#6.37 tinali -- tiri'en i Matay 18.28. a pakaen i cangraan haw?>> han nangra.

38Pasowal sa ci Yis i cangraan, <<Pina a 'aplad ko nitatoyan namo a ^pang saw? Olili, hapinangen,>> han Ningra.

Hapinang han nangra i, <<Lima a 'aplad ko ^pang ato tosa a foting,>> han nangra a somowal.

39Itiyasato, pasowal han ni Yis ko nisawawaan Ningra, pasacfacfangen ko finawlan a pakamaro' i rngorngosan. 40Orasaka, o roma i, smo'ot. O roma i, lima a polo' ko kasacfacfang no tamdamdaw a maro'. 41Itiya i, tatoy sato ci Yis toya limaay a 'aplad no ^pang atoya tosaay a foting. Ca'ngaw sa Cingra a pasikakarayan a mikansiya to Kawas. Ta pcih sa to ^pang a papipakilac to nisawawaan, pakilacen no nisawawaan ko tamdamdaw. Haenen Ningra koya tosaay a foting a papipakilac i tamdamdaw. 42Mafcol cangra a ma^min a komaen. 43Sa'opo han no nisawawaan ko kinapcih nangra a ^pang ato 'osaw a foting i, matomes ko tosa ko safaw a fakar. 44O komaenay to ^pang a tamdaw i, lima a patek (5,000) ko fa'inayan aca.

Romakat ci Yis i Fanaw

(Matay 14.22-33; Yohani 6.16-21)

45Ikor i, papidakaw han ni Yis ko nisawawaan Ningra to tamina a paki'ayaw a tayra i ti:raw a lawac no fanaw i Pitsayta. Ta papinokayen Ningra itiya ko finawlan. 46Na malacinowas cangra i, talalotok ci Yis a mitolon. 47Yo dadaya sato i, itirato i sifo' no fanaw koya tamina, ci Yis a ccay ko i tiraayho i hadhad. 48Ma'araw Ningra ko nika rarima no nisawawaan Ningra a mi'iwas to tamina. Nawhani co'a'angen nangra ko fali a mi'iwas. Saka, yo kanikaran i, romakat ci Yis i fanaw a miraod a sapita'lifan#6.48 sapita'lifan -- o roma i, sapikapotaw. i cangraan. 49Paka'araw ko nisawawaan to nika romakat ni Yis i fanaw i, pakokawas cangra saka, lkal sato cangra. 50Nawhani matalaw cangra a minengneng i Cingraan.

Tangsol han ni Yis cangra a pasowal, <<Aka ka talaw! O Kako konini. Sanga'ayen ko faloco' namo!>> han Ningra. 51Dakaw sato Cingra to tamina nangra. Trep sato ko fali. Safahka' sa cangra a maorat. 52Nawhani caho ka fana' cangra a miharateng to tatodong noya dmak ni Yis to pakayniay i ^pang i 'ayaw. Maoratho ko faloco' nangra.

O Piadah ni Yis to Adadaay i Kinisarit

(Matay 14.34-36)

53Malacalto nangra ko fanaw, macakat cangra i Kinisarit, pakting hanto nangra ko tamina itira. 54Yo ma^pod cangra nai tamina i, tangsol a kafana'an no finawlan ci Yis. 55Saka, cikay sa cangra a mililiw to i niyaro'ay a tamdaw a ma^min. Ira ci Yis, ano saan a matngil i cowacowa i, halokafoti'an han nangra ko adadaay a tamdaw a patayra i Cingraan. 56Yo talacowacowa ci Yis, ano i tata'angayto a niyaro', i mamangayto a niyaro' ato i omahayto a loma' i, tlien no tamdamdaw ko adadaay i kalali'acaan nangra. <<Papitfingen kami to parongapingan no kafafang Iso,>> han nangra ci Yis a mingitangit. Saka, o mitfingay a tamdaw i, maadahto a ma^min.

Currently Selected:

Maroko 6: AMIS2019

Highlight

Copy