Maroko 7

O Nano To'as a Lkakawa

(Matay 15.1-9)

1Nanoya, ira nai Yirusalim ko papinapina a Farisay a tamdaw ato pasifana'ay to Rikec a malakapot a tayra i ci Yisan. 2Ma'araw nangra ko papinapina a nisawawaan ni Yis, o caayay ka korac a kamay ko sakakomaen, caay ka matiya o Farisay a tamdaw a i 'ayaw monanaw to kamay.

3(Nawhani tadama'imer ko Farisay ato romaroma a Yutaya a tamdaw to nanoto'as a lkakawa. Ano caho pido^do to lkakawa no lisin a monanaw i, caay ka komaen. 4O romasato, ano minokay nai kalali'acaan, ano caay pido^do to lisin a mikorac to ni'acaan nangra i, caay ko kakaenen nangra.#7.4 ano caay pido^do to lisin a mikorac to ni'acaan nangra i, caay ko kakaenen nangra -- ano ^ca i, ano caay kai'ayaw a monanaw to kamay i, caay kakomaen to maamaan. Iraho ko romaroma a ni'imeran nangra a lisin, o pisawsaw to takid ato sioy ato fodawan a wakong ato kafoti'an#7.4 O roma a katlangay a cudad awaay ato kafoti'an..)

5Saka, licayen no Farisay a tamdaw ato pasifana'ay to Rikec ci Yis, <<Nawiro caay pido^do ko nisawawaan Iso to nano to'as ita a lkakawa, iro o caay ka korac a kamay ko sakakomaen nangra saw?>> han nangra.

6Pasowal sa ci Yis, <<Kamo o misamangahay a tamdaw, matama ko pali'ayaway a sowal ni Isaya to nano sowal no Kawas,

<O sowal no Kawas i, o ngoyos aca nonini a finawlan ko mita'ongay i Takowanan.

Nikawrira, miraay i Takowanan ko faloco' nangra.

7Salama han nangra ko nipita'ong i Takowanan.

O no Kawas konini han nangra ko nisanga'an no tamdaw a limo'ot a pasifana',> sanay,>> han ni Yis.

8Sowal sa ci Yis, <<Maliyas namo ko limo'ot no Kawas a pasayra i lkakawa no tamdaw a ma'imer,>> saan.

9Pasowal haca Cingra, <<Iki:#7.9 Iki: -- o roma i, ata: (ka'amis). ko nika fana' namo a mifalah to limo'ot no Kawas to sapi'imeraw to lkakawa no tireng. 10O limo'ot ni Mosi i tamowanan, <Kangodoen ko mama ato ina iso,> o romasato, <O milokesay to mama ato ina a tamdaw i, o papatayen,> saan. 11Nikawrira, o sowal namo i, oya sapafli ako i tamowanan i, malasapa Korpanto ako (o tatodong no <Korpan> i, malasapacakatto ako i Kawas sanay), ano saan a somowal i mama ato ina ko cima a tamdaw i, 12nga'ayto a caay piharateng to saki mama ato ina saan kamo. 13Pakayni tonini a nika tatorotorod namo to lkakawa no to'as ko sapalasawad namo to sowal no Kawas. Adihay ko malcaday tonini a romaroma a dmak namo,>> han ni Yis.

O Paacekay to Tamdaw a Dmak

(Matay 15.10-20)

14Pasa'opoen haca ni Yis ko finawlan a somowal i cangraan, <<Pitngil kamo to sowal Ako, pihapinang kamo. 15O nai papotalay a micomod i tamdaw i, awaay ko paacekay to tamdaw. O nai kmoday no faloco' no tamdaw a masadak ko paacekay to tamdaw,#7.15 Ira ko katlangay a cudad matongal i 16 a tosir Pitngil kamo, o pakatngilay ko tangila a tamdaw! (tiri'en Maroko 4.23).>> saan.

17Yo miliyas ci Yis to finawlan a micomod i loma' i, licayen no nisawawaan Cingra to pakayniay tonini a tinako. 18Pasowal sa ci Yis i cangraan, <<Halo amo a milcad i cangraan a mafokil tonini saw? Caay ka fana' kamo saw to nika caay paacek to faloco' no tamdaw ko nai papotalay a micomod a kakaenen. 19Nawhani caay ka i faloco' no tamdaw a micomod ko kakaenen, i tiyad ningra a micomod, ta mafalah i tatayi'an,>> saan. (Onini a sowal ni Yis i, o makoracayto ko polong no kakaenen a ma^min o sanay).

20Pararid haca Cingra a somowal, <<O masadakay nai faloco' no tamdaw ko paacekay to tamdaw. 21Nawhani nani faloco' no tamdaw a masadak ko masamaamaanay a tatiihay a harateng. Onini a tatiihay a harateng ko saka'otit, o sakapitakaw, o sakapipatay to tamdaw, 22o saka'odang, o saka'anof, o masamaamaanay a tatiihay, o sakapisa'fit, o saka'amitir, o saka'inap, o sakapilokes, o sakapisatakaraw, sakalita'ang ato romaroma a raraw. 23O nanikmoday no faloco' no tamdaw konini a tatiihay a dmak a ma^min a paacek to tamdaw,>> saan.

O Pipaso'lin no Ccay a Fafahiyan

(Matay 15.21-28)

24Nanoya, miliyas ci Yis itira a tayra i ngata no Tiri. Micomod ci Yis i ccay a loma', mana'ay a kafana'en no tamdaw nasa, kawrira, caay aca ko mamasimed ko kaitira Ningra. 25Itiyasato, ira ko ccay a fafahiyan, o maaro'ay no kaackan a 'adingo ko fafahiyan a wawa ningra. Pakatngil cingra to dmak ni Yis i, tangsol sa cingra a tayra i ka'ayaw ni Yis a mihinokop a mita'ong. 26O roma a finacadan konini a fafahiyan. I Foinikiya no Siriya a pala a hofocen cingra. Mingitangit cingra ci Yisan a papifahfah to palafoay a pasadak nai wawa ningra. 27Sowal sa ci Yis i cingraan, <<O papafcolenho ko wawa. Caay ka nga'ay a 'afasen ko 'alangad no wawa a patrik i waco,>> han Ningra.

28Paca'of sa koya fafahiyan a somowal, <<Tapangaw, mahaento. Nikawrira, komaen ito to matfaday a posak no nikaenan no wawa ko waco i kala^no no kakomaenan kiya saw!>> han ningra.

29Pasowal sa ci Yis i cingraan, <<Tona matini ko sowal iso saka, olili. Pinokayto. Masadakayto nai wawa iso koya palafoay,>> han Ningra.

30Nokay sato koya fafahiyan i, ma'araw ningra ko nika foti' noya wawa i kafoti'an. So'linay masadakto koya palafoay.

O Piadah ni Yis to Mado'engay a Matangolaay a Tamdaw

31Nanoya, liyasen ni Yis ko Tiri a pala a pakayra i Siton ato Tikapolis a pala a tayra i fanaw no Kalili. 32Ira ko mikayatay to ccay a mado'engay a matangolaay#7.32 matangolaay -- o roma i, mangolayay (ka'amis). a tamdaw a patayra i ci Yisan. Ngitangiten nangra ci Yis a papikapa toya tamdaw. 33Saka, krid han ni Yis koya tamdaw a ccay a paliyas to finawlan. Pacomod han ni Yis ko tarodo' i tangila noya tamdaw. Sopa' sato ci Yis ta mitfing to sma noya tamdaw. 34Ca'ngaw sa ci Yis a pasikakarayan, cda'ah#7.34 cda'ah -- o roma i, cdoox (katimol). sa a somowal, <<Ifata,>> han Ningra. O tatodong nonini i, <<Kafawahto,>> sanay.

35Itiyasato, pakatngilto ko tangila ningra, manga'ayto ko sma. Mahapinangto ko sowal ningra. 36<<Aka pasowal i cimacimaan,>> han ni Yis a palimo'ot ko tamdamdaw. Nikawrira, lalalalangen ni Yis cangra to saka^caaw ka somowal nangra i, mangalef a mangalef ko pipalosiyang nangra tonini a dmak. 37Safahka' sa ko tamdamdaw a somowal, <<Nga'ayay a ma^min ko nidmakan nonini a tamdaw. O mado'engay a tamdaw i, pakatngilto. O maapaay a tamdaw i, mafana'to a somowal,>> saan.

Currently Selected:

Maroko 7: AMIS2019

Highlight

Copy