Maroko 8

O Pipakaen ni Yis to Spat a Patek a Tamdaw

(Matay 15.32-39)

1Nanoya, masa'opo ko roma a 'alomanay a finawlan. Awaayto ko malokakaenen nangra. Saka, tahidangen ni Yis a misa'opo ko nisawawaan Ningra a somowal, 2<<Sasini'ada sa Kako tonini a finawlan, nawhani toloto a romi'ad ko nika pikapot nangra i Takowanan, awaayto ko kakaenen nangra imatini. 3Ano papinokay han cangra to nika cahiw nangra i, masto' cangra i fatad no lalan, nawhani iraay a tayni ko nai maraayay a tamdaw,>> han Ningra.

4Licay han no nisawawaan Cingra, <<O kohkohan konini i, i cowa kami a miala to ma^dengay a kakaenen to sakafcol no hatiniayto a nika 'aloman no finawlan saw?>> han nangra.

5Licay han ni Yis cangra, <<Pina a 'aplad ko ^pang to nitatoyan namo saw?>> han Ningra.

Paca'of sa cangra, <<Pito a 'aplad ko ^pang,>> han nangra.

6Saka, sowalen ni Yis ko finawlan a pakamaro' i sra. Ta tatoy sato Cingra toya pito a 'aplad no ^pang a mikansiya i Kawas. Pcih han Ningra a pafli i nisawawaan. Ta pakilac hanto no nisawawaan ko finawlan. 7O romasato, ira ko nitatoyan no nisawawaan to pinapina a mimingay a foting. Kansiya sa ci Yis tonini, ta papipakilacen Ningra ko nisawawaan Ningra tonini. 8Mafcol ko finawlan a ma^min a komaen. Saka, sa'opo han no nisawawaan ko pnapcih a 'osaw a ^pang i, pito a fakar. 9O komaenay a tamdaw i, ma^deng spat a patek a tamdaw. Itiya i, paliwasak hanto ni Yis cangra. 10Ta tangsol sa ca Yis ato nisawawaan Ningra a midakaw to tamina a tayra i Talmanuta hananay a pala.

O Pingitangit no Farisay a Tamdaw to Kafahka'an a Dmak

(Matay 16.1-4)

11Ira ko papinapina a Farisay a tamdaw a tayra i ci Yisan a palowad to sakalaliyaliyang ato sapilifetan ci Yisan. Orasaka, milongoc cangra i Cingraan pakaynien i kafahka'an a dmak Iso ko pipahapinang i tamiyanan to nika o nai Kawasay Kiso saan. 12Cda'ah sa ci Yis a somowal, <<Nawiro mingitangit ko aniniay a tamdaw to kafahka'an a dmak saw? So'linen Ako a somowal kamo, caay ka tatodong a pa'arawen ko aniniay a tamdaw to kafahka'an a dmak>>, han Ningra.

13Ta laliw hanto ni Yis cangra. Midakaw ci Yis to tamina a tayra i ti:raw a lawac no fanaw.

O Tamod no Farisay a Tamdaw ato Tamod ni Hiroti

(Matay 16.5-12)

14Matawal no nisawawaan a mihawikid ko ^pang, deng ccay aca ko iraay i tamina nangra a ^pang, awaay to ko roma a kakaenen. 15Palimo'oten ni Yis cangra a somowal, <<Pina'on to tamod no Farisay a tamdaw ato tamod ni Hiroti,>> han Ningra.

16Salango^ngo^ngo sa ko nisawawaan, <<O sakasomowal Ningra tonini a sowal i, o nika awaay no ^pang ita hakiya,>> saan.

17Mafana' ci Yis tonini a harateng nangra, licay sa i cangraan, <<Nawiro, masasowasowal kamo to nika awa no nitatoyan namo a ^pang saw? Caho ka fana' kamo saw? Caho ka hapinang namo saw? Maoratho ko faloco' namo saw? 18Cimata kamo i, caay paka'araw saw? Citangila kamo i, caay pakatngil kamo saw? Caay pakaharateng kamo saw? 19Yo mipcih Kako to lima a 'aplad no ^pang a pafli a pakaen i lima a patek (5,000) a tamdaw i, pina a fakar ko nisa'opoan namo a 'osaw to pnapcih no ^pang saw?>> han ni Yis.

Paca'of sa cangra, <<Tosa ko safaw no fakar,>> han nangra.

20Milicay haca ci Yis, <<Yo pakilac Kako to pito a 'aplad no ^pang a pakaen i spat a patek (4,000) a tamdaw i, pina haca a fakar ko nisa'opoan namo a pnapcih a ^pang saw?>> saan.

<<Pito a fakar,>> han nangra a paca'of.

21Saka licayen ni Yis cangra, <<Ano hatira i, caho ka fana' kamo saw?>> han Ningra.

O Piadah to Mapohaway i Pitsayta

22Tahira sato cangra i Pitsayta. Itiya i, ira ko mikayatay a tamdaw to ccay a mapohaway a tayra i ci Yisan a mingitangit a papitfing toya mapohaway. 23Kayat han ni Yis koya mapohaway a tayra i papotal no niyaro'. Pasopa' han ni Yis ko mata noya mapohaway, ta kapaen Ningra cingra. <<Ira ko ma'araway iso haw?>> han ni Yis a milicay.

24Ca'ngaw sa cingra a somowal, <<Ma'araw ako ko tamdaw. Matiya o romakatay a kilang cangra,>> han ningra.

25Liyawen haca ni Yis a mikapa ko mata noya mapohaway. Sacengacengaw han ningra a minengneng i, maadahto. Mahapinangto ningra a minengneng ko maamaan. 26<<Aka piliyaw a micomod tonini a niyaro',>> han ni Yis a somowal cingra, ta papinokay hanto Ningra i loma'.

O Pipatalahkal ni Pitiro ci Yisan o Kristo

(Matay 16.13-20; Luka 9.18-21)

27Nanoya, tayra ci Yis ato nisawawaan Ningra i niyaroaro' i ngata no Kaysariya Filipi. Yo i fatad no lalan i, licayen Ningra cangra, <<Pakocima ko kalotamdaw i Takowanan saw?>> han Ningra.

28Paca'of sa cangra, <<Ci Yohani o Paino'ay, ira ko sanay. Ci Iliya ira ko sanay. O ccay no pali'ayaway to sowal no Kawas ira ko sanay,>> han nangra.

29Licayen haca ni Yis cangra, <<Ano hatira i, pakocima kamo i Takowanan?>> han Ningra.

Paca'of sa ci Pitiro a somowal, <<Ci Kristo Kiso,>> han ningra.

30Saka, palimo'ot hanto ni Yis cangra, <<Aka pasowal i cimacimaan tonini a dmak to pakayniay i Takowanan,>> han Ningra.

O Pipali'ayaw ni Yis a Somowal to Pades ato Patay Ningra

(Matay 16.21-28; Luka 9.22-27)

31Satapang sato ci Yis a pasifana' i nisawawaan, sowal sa, <<Caay ka ^ca o mamapasemsem ko Wawa no Tamdaw to masamaamaanay a pades, o fafalahen no kalas no niyaro' ato kakridan no citodongay to ta'ong ato pasifana'ay to Rikec, o papatayen. Nikawrira, i ikor no tolo a romi'ad i, o lalomowad a ma'orip nai patay,>> han Ningra. 32Pahapinang han Ningra cangra tonini a dmak. Saka, tengteng han ni Pitiro ci Yis a milalang. 33Siikor sa ci Yis a pasayra i nisawawaan a minengneng. Kakter han Ningra ci Pitiro a somowal, <<Satanaw, piliyas i Takowanan! Caay ko no Kawas ko niharatengan iso, o no tamdawan ko niharatengan iso,>> han Ningra.

34Nanoya, tahidangen ni Yis ko finawlan ato nisawawaan Ningra a papiraod i Cingraan, pasowal sa i cangraan, <<Ano cima ko sapitoorananay i Takowanan i, falahen ko no tireng a harateng, 'orongen ko ciwcika no tireng, tooren Kako. 35O limlaay to 'orip no tireng a tamdaw i, o mamafalah ningra ko 'orip ningra. Nikawrira, ano saki Takowanan ato saki Nga'ayay Ratoh ko pikinafalah no tamdaw to 'orip ningra i, o mamilayap to 'orip cingra. 36Ano ci^ta^tan ko cima a tamdaw to polong no hkal i, nikawrira, ano mafalah ningra ko 'orip no tireng i, o maan ko ^poc saw? 37O maanho ko sapalolol ningra to 'orip no tireng? 38Ano ira ko pakangodoananay i Takowanan ato sowal Ako i tini tona ma'odangay ato tatiihay a hkal i, itiya yo malahaklongto ko Wawa no Tamdaw ato fangcalay a coyoh i 'dil no Wama Ningra a tayni i, o mamapakangodo Ako cingra,>> han Ningra.

Currently Selected:

Maroko 8: AMIS2019

Highlight

Copy