Maroko 9

1Pasowal haca ci Yis i cangraan, <<So'linen Ako a somowal kamo, ira i tini i tamowanan ko papaka'araw to ci'icelay a pikowan no Kawas i 'ayaw no nika patay nangra,>> han Ningra.

O Nika Falic no Tireng ni Yis

(Matay 17.1-13; Luka 9.28-36)

2I ikor no ^nem a romi'ad i, dokdok han ni Yis a mikrid ci Pitiro aci Yakop aci Yohani a tayra a macokacok i takaraway a lotok. Itiya i, mafalic ko tireng ni Yis i ka'ayaw nangra. 3Satomli' sa a ma'dil ko riko' Ningra. Awaayho ko cima a pakacengelay to hatiniay a nika tomli' no kiradom i tini i hkal. 4Itiyasato, fahal sa a ma'araw no tatoloay a nisawawaan ci Iliya aci Mosi a masasicaciyaw i ci Yisan. 5Pasowal sa ci Pitiro i ci Yisan, <<Singsiaw, tadanga'ay ko nika i tini ita. Sanga'en niyam ko tolo a talo'an. O ccay i, o malomiso, o ccay i, o malo ni Mosi, o ccay i, o malo ni Iliya,>> han ningra. 6O sakasaan ni Pitiro a somowal i, o nika fokil ningra to malosasowalen. Nawhani tata'ang ko talaw nangra.

7Itiyasato, fahal sa ira ko carofacof a mitahpo i cangraan. Matngil ko ngiha' nai carofacof a somowal, <<O kakaolahan Ako a Wawa konini. Pitngil kamo to sowal Ningra,>> saan. 8Yo misanengnengneng cangra to taliyok i, dengto ci Yis ato cangra ko itiraay, nikawrira, awaayto a ma'araw nangra ko cimacima a tamdaw.

9Yo maloklon cangra haw i, palimo'oten ni Yis cangra a somowal, <<Ano caho ka lomowad a ma'orip nai patay ko Wawa no Tamdaw i, akaho ka somowal i cimacimaan to pakayniay i ma'araway namo a dmak,>> han Ningra.

10I faloco' han nangra konini a sowal. <<O maan koya lomowad a ma'orip nai patay hananay Ningra hakiya?>> saan cangra a malalicalicay. 11Saka, licayen haca nangra ci Yis, <<Nawiro caay ka ^ca o a i 'ayaw a tayni ci Iliya saan ko sowal no pasifana'ay to Rikec saw?>> han nangra.

12Paca'of sa ci Yis, <<So'linay, o a i 'ayaw ci Iliya a tayni a mipalowad to polong no dmak. Nikawrira, nawiro sowal sa haca i Fangcalay Cudad toya o mamapasemsem ato mamafalah ko Wawa no Tamdaw saan saw? 13Sowalen Ako kamo, tayniayto ci Iliya, 'arawhani, patdo sa cangra a mikari'ang i cingraan, mado^do ko sowal i Fangcalay Cudad to pakayniay i cingraan,>> han Ningra.

O Piadah to Maaro'ay no Palafoay a Wawa

(Matay 17.14-21; Luka 9.37-43)

14Yo tahira cangra i sa'opo no romaroma a nisawawaan, ma'araw nangra ko nika malikot no 'alomanay a finawlan cangra, ira ko papinapina a pasifana'ay to Rikec a malaliyaliyang ato cangra. 15Yo ma'araw no finawlan ci Yis i, safahka' saan cangra. Cikay sa cangra a miraod ci Yisan a milicay. 16Licayen ni Yis ko nisawawaan Ningra, <<O maan ko kalaliyaliyangan namo ato cangra saw?>> han Ningra.

17Paca'of sa ko ccay noya finawlan, <<Singsiaw, mikridan ako a patayni i Tisowanan ko wawa ako, nawhani o maaro'ay no miapaay a palafoay cingra, saka caay ka caciyaw. 18Ano marpet noya miapaay a palafoay cingra i, polin han niira cingra. Talafolang sa ko ngoyos ningra a mingric to wadis, sa'ifcang sa ko tireng ningra. Saka, papifahfahen ako ko nisawawaan Iso a papipasadak toya palafoay i, nikawrira, caay pakafilo cangra,>> han ningra.

19Sowal sa ci Yis i cangraan, <<Aya: ko nika ^ca paso'lin namo o aniniay a tamdaw! Tahacowa ko nipikapot Ako i tamowanan saw? Tahacowa ko nipihadidi Ako i tamowanan saw? Pataynien koya wawa i Takowanan!>> han Ningra. 20Orasaka, krid hanto nangra koya wawa a patayra i ci Yisan.

Yo paka'araw koya palafoay i ci Yisan i, pafickot han nira koya wawa. Saka, polin sato cingra i sra. Talafolang sa cingra a misawaliwalin. 21Licayen ni Yis ko mama noya wawa, <<I hacowa a matini konini a wawa iso saw?>> han Ningra.

Paca'of sa koya mama, <<Nano ka^mangan ningra. 22Kinapinapi:nato a mafahkol noya palafoay cingra i namal i nanom a sapipatayan cingraan. Nikawrira, ano ma^deng Kiso i, kasini'adaen kami a mipa'orip,>> han ningra a somowal.

23Pasowal sa ci Yis, <<Ma^deng Kiso ano saan kiso, so'linay o miti'eray to Kawas a tamdaw i, o mamafilo ko masamaamaanay a dmak,>> han Ningra.

24Cli' sa koya mama a somowal, <<Miti'er kako. Padamaen ko nika tadanca no piti'er ako,>> han ningra.

25Ma'araw ni Yis ko nipiraod no finawlan i Cingraan a milikot saka, kakteren Ningra koya kaackan a 'adingo a somowal, <<Palimo'oten Ako kiso o miapaay mido'engay a palafoay, kasadak nai tireng nonini a wawa. Akato piliyaw a micomod i cingraan,>> han Ningra.

26Itiya i, cli' sa koya palafoay. Pafickot han niira koya wawa, ta masadak. Samatiya sato o mapatayay koya wawa. Saka, <<Mapatayayto cingra,>> saan ko 'alomanay a somowal. 27Nikawrira, tatoy han ni Yis ko kamay ningra a mipalowad, lowad sato koya wawa a tomireng.

28Yo micomod ci Yis i loma' i, dokdok han no nisawawaan Cingra a milicay. <<Nawiro caay pakafahfah kami a pasadak toya palafoay saw?>> han nangra.

29Paca'of sa ci Yis, <<dengan pakaynien i pitolon, ta mafahfah ko hatiniay a palafoay, awaay to ko roma a pakayraan,>> han Ningra.

O Piliyaw ni Yis a Pali'ayaw a Somowal to Patay Ningra

(Matay 17.22-23; Luka 9.43-45)

30Nanoya, miliyas ca Yis itira a pakayra i Kalili a mita'lif. Caay ka ngalay ci Yis a kafana'en no tamdamdaw ko dmak Ningra. 31Nawhani siikeden ni Yis ko nisawawaan Ningra a pasifana' a somowal, <<O mamapatorodto i kamay no cisakowanay a tamdaw ko Wawa no Tamdaw. O papatayen nangra Cingra. Nikawrira, i ikor no tolo a romi'ad i, o lalomowad Cingra a ma'orip nai patay,>> han Ningra.

32Nikawrira, caay ka fana' ko nisawawaan to tatodong nonini a sowal ni Yis, matalaw cangra a milicay i Cingraan.

Cima ko Satadamaanay?

(Matay 18.1-5; Luka 9.46-48)

33Nanoya, tahirato i Kapirnaum cangra. Yo i laloma' to ca Yis i, licayen Ningra ko nisawawaan, <<O maan ko kalaliyaliyangan namo i honi i lalan saw?>> han Ningra.

34Trep sa cangra. Nawhani <<Cima ko satadamaanay ita hakiya?>> nao sanay cangra a malaliyaliyang i lalan. 35Aro' sa ci Yis, tahidangen Ningra ko safaw tosa a tarokos a patala'a'ayaw, sowal sa i cangraan, <<Ano cima ko mangalayay a malasatadamaanay i, ka o malosasafaay no tamdamdaw a malamatayalay no 'alomanay,>> han Ningra. 36Itiya i, kayat han ni Yis ko ccay a ka^mangay a wawa a patireng i sifo' nangra. Ta 'afofo han Ningra koya wawa a pasowal i cangraan, 37<<Ano saki Takowanan ko nipihamham no nima to ccay no hatiniay a ka^mangay a wawa i, o mihamhamay ito cingra i Takowanan. O mihamhamay i Takowanan i, caay ka Ako a ccay ko nihamhaman ningra. O miocoray i Takowanan ko nihamhaman ningra,>> han Ningra.

O Pacoliay ato Mihaiay

(Luka 9.49-50)

38Pasowal ci Yohani ci Yisan, <<Singsiaw, ma'araw niyam ko ccay a tamdaw a pakaynien ningra i ngangan Iso ko pifahfah to palafoay, lalangen niyam cingra, nawhani caay pikapot cingra i tamiyanan,>> han ningra.

39Pasowal sa ci Yis, <<Aka lalangen cingra. Nawhani ano ira ko midmakay to kafahka'an a dmak pakayni i ngangan Ako i, tangsol caay ka saan cingra a milikaf i Takowanan. 40Nawhani o caayay pacoli i titaanan a tamdaw i, o mihaiay i titaanan. 41So'linen Ako a somowal kamo, ano cimacima to i, o i ci Kristoananay kamo saka, pananomen ako kamo to ccay a takid yasanay a tamdaw i, caay ka ^ca o mamapakaolah cingra,>> han Ningra.

Aka Pisawi to Tamdaw a Pakaciraraw

(Matay 18.6-9; Luka 17.1-2)

42Sowal sa ci Yis, <<Ano cima ko misawiay to ccay nonini a sasafaay a miti'eray i Takowanan a paliyas i, o nika piso'ot to li'el ningra to tata'angay a fokloh a tailangan a mafahkol i riyar ko nga'ay. 43Ano sakaciraraw iso ko ccay a kamay iso i, ktonen! O nika poton no ccay no kamay iso a micomod i mida'ocay a 'orip ko nga'ay to nika tosa no kamay iso a tayra i caay ko mamapadeng a namal no pisemseman#9.43 -- 44 ato 46 a tosir i, malcad ato 48 a tosir. Awaay a matilid konini i romaroma a matlangay a cudad.. 45Ano sakaciraraw iso ko ccay a wa'ay i, ktonen! O nika poton no ccay no wa'ay iso a micomod i mida'ocay a 'orip ko nga'ay to nika tosa no wa'ay iso a mafahkol i pisemseman. 47Ano sakaciraraw iso ko ccay a mata iso i, dicohen! O nika ccay no mata iso a micomod i Kitakit no Kawas ko nga'ay to nika tosa no mata iso a mafahkol i pisemseman. 48Itira i, caay ko mamapatay ko mikaenay cangraan a fao. Caay ko mamapadeng ko mitodohay cangraan a namal.

49<<O mama'olac no namal ko tamdaw a ma^min a matiya o pikorac no cilah to sapato'aya. 50O nga'ayay ko cilah. Nikawrira, ano malasawad ko kahcid no cilah i, o maanho ko ^poc saw? Kamatiya o cilah kamo a ci^poc. Ta mafana' kamo a pararihaday,>> saan ci Yis.

Currently Selected:

Maroko 9: AMIS2019

Highlight

Copy