Maroko 10
10
O Sifana' to Nika Sasawad no Mararamoday
(Matay 19.1-12; Luka 16.18)
1Nanoya, miliyas ci Yis itira a tayra i Yutaya a pala ato i ti:raw no Yortan a 'alo. Miliyaw a masa'opo ko finawlan i Cingraan. Matiya o nipipasifana' Ningra to ha:tiniay ko nipipasifana' Ningra i cangraan.
2Ira a miraod i ci Yisan ko papinapina a Farisay a tamdaw a milifet i Cingraan a milicay, <<Pasowalen kami, matatodong i Rikec ita ko nipisawad no fa'inay to fafahi ningra haw?>> han nangra.
3Paca'of sa ci Yis, <<Maan saan ko nipipalimo'ot ni Mosi i tamowanan saw?>> han Ningra a milicay.
4Pasowal sa cangra, <<Mihayda ci Mosi to nipitilid no fa'inay to sakalaliyas a tilid a misawad to fafahi ningra,>> han nangra.
5Pasowal sa ci Yis i cangraan, <<'Atkak ko faloco' namo saka, mahaen ko nipitilid ni Mosi tonini a limo'ot to saki tamowanan. 6Nikawrira, yo misatapang ko Kawas a misanga' to hkal i, misanga' Cingra to fa'inayan ato fafahiyan. 7Orasaka, liyasen no tamdaw ko mama ato ina ningra a malaccay ato fafahi ningra#10.7 O roma a katlangay a cudad awaay a malaccay ato fafahi ningra.. 8Malaccayto ko tireng noya tatosaay. Tona caayayto ko tatosaay ko mararamoday, o ccayayto ko tireng. 9Orasaka, o nipalaccayan no Kawas i, aka palicinowasen no tamdaw,>> han Ningra.
10Yo micomod haca cangra i loma' i, licayen no nisawawaan ci Yis to pakayniay tonini a dmak. 11Pasowal sa ci Yis i cangraan, <<O misawaday to fafahi no tireng a ciramod to roma a fafahiyan i, o ma'odangay cingra a pararaw to sa'ayaway a fafahi ningra. 12Mahaen ko fafahi ano misawad to fa'inay no tireng a ciramod to roma a fa'inayan i, o ma'odangay cingra,>> han Ningra.
O Pipakalmed ni Yis to Ka^mangay
(Matay 19.13-15; Luka 18.15-17)
13Ira ko patayraay to ka^mangay a wawa i ci Yisan, mangalay cangra a papikapa ci Yisan to wawa nangra, nikawrira, kakteren no nisawawaan Ningra cangra. 14Yo ma'araw ni Yis konini i, makter Cingra, ta sowal sa to nisawawaan, <<Pakonira han ko nika tayni no wawa i Takowanan, aka lalangen cangra, nawhani o matiniay a wawa ko finawlan no Kitakit no Kawas. 15Haratengen namo, ano caay ka matiya o no ka^mangay a wawa ko pilayap to pikowan no Kawas i, caay ko mamalafinawlan Ningra,>> han Ningra. 16Saka, 'afofo hanto ni Yis koya ka^mangay a wawa, haccaccayen Ningra a mikapa cangra a pakalmed.
O Rawraw no Cidafongay
(Matay 19.16-30; Luka 18.18-30)
17Yo romakat saho ci Yis i lalan i, ira a comikay a miraod ko ccay a tamdaw, pitosor sa i ka'ayaw Ningra a milicay, <<Nga'ayay a Singsi, samaanen ako ko dmak ta ci'orip kako to mida'ocay a 'orip saw?>> han ningra.
18Licay han ni Yis cingra, <<Nawiro o nga'ayay han iso Kako saw? Awaay ko nga'ayay a tamdaw, deng o Kawas a ccay ko nga'ayay. 19Mafana'ayto kiso to limo'ot. <Aka pipatay to tamdaw, aka ka 'odang, aka pitakaw, aka patdo a pakokot to tamdaw, aka pisafana' a miala, kangodoen ko mama ato ina iso yasanay,> >> han Ningra.
20Paca'of sa koya tamdaw, <<Singsiaw, nano ka^mangan ako a mido^do tonini a limo'ot a ma^min,>> saan cingra.
21Pamo^tek sa ci Yis i cingraan a minengneng, maolah i cingraan, sowal sa, <<Iraho ko caay ka lahci iso to ccay. Olili, pacakayen ko dafong iso a ma^min, ta palada'en ko pakoyoc a tamdaw to payso iso, nga'ay a mana'ang ko dafong iso i kakarayan. Ta katayni haca a mitoor i Takowanan,>> han Ningra. 22Yo pakatngil koya tamdaw tonini a sowal i, falic sa ko pising, sa 'ickoy sa a mararom a miliyas, nawhani adihay ko dafong ningra.
23Sacingacinga sa ci Yis to taliyok a minengneng to nisawawaan Ningra, ta sowal sa i cangraan, <<Caay ka rahoday ko cidafongay a tamdaw a malafinawlan no Kitakit no Kawas!>> han Ningra.
24Safahka' sa ko nisawawaan tonini a sowal Ningra. Nikawrira pasowal haca ci Yis, <<Wawaaw, caayay ko rahodayay ko sakalafinawlan no Kitakit no Kawas! 25Ano malafinawlan no Kitakit no Kawas ko cidafongay a tamdaw i, ikakaho no pimomok no lakota a micomod to tangila no rinom ko nika ^ca ka rahoday,>> han Ningra.
26Itiya i, matongal ko nika fahka' no nisawawaan, <<Ano hatira i, cima ko mamapa'orip saw?>> saan cangra a masasowasowal.
27Pamo^tek han ni Yis cangra a minengneng, sowal sa, <<Talacowa caay ka filo no tamdaw konini a dmak, nikawrira, mafilo no Kawas. Nawhani mafilo no Kawas ko masamaamaanay a dmak,>> han Ningra.
28Paca'of sa ci Pitiro, <<Nengnengen, masawadayto no niyam ko maamaan a mitoor i Tisowanan,>> han ningra.
29Pasowal sa ci Yis i cangraan, <<Hai! So'linen Ako a somowal kamo, ano pakayniay i Takowanan ano^ca o pitoor to Nga'ayay Ratoh ko sakapisawad ningra to loma', to salikaka to fa'inayan to fafahiyan, to mama, to ina, to wawa, ano^ca o omah i, 30caay ka ^ca o mamilayap cingra anini to adihayay a sapakaolah. O mamilayap cingra to smo'otay ko camahaw to loma', to salikaka, to fa'inayan, to fafahiyan, to ina, to wawa, ano^ca o omah, romasato o mamakari'ang haca. Ta i aira a hkal i, o mamilayap cingra to mida'ocay a 'orip. 31Nikawrira, o sa'ayaway a 'alomanay a tamdaw i, o mamalasaikorayto. O saikoray a 'alomanay a tamdaw i, o mamalasa'ayawayto,>> han Ningra.
O Sakakinatolo ni Yis a Mipali'ayaw to Patay Ningra
(Matay 20.17-19; Luka 18.31-34)
32I fatad no kacokacok na Yis a tayra i Yirusalim i, malasa'ayaway ci Yis a romakat. Fahka' ko nisawawaan a mackok, haloya mikotoday a tamdaw a matalaw. Miliyaw haca ci Yis a papiingid to tosa ko safaw a tarokos, pasowal i cangraan to aira a dmak i tireng Ningra. 33Sowal sa Cingra, <<Nengnengen, o mamacokacok kita a tayra i Yirusalim imatini. O mamapacakay ko Wawa no Tamdaw i kakridan no citodongay to ta'ong ato pasifana'ay to Rikec. Ta pasteken nangra Cingra i patay, ta o papatoroden nangra Cingra i roma a finacadan. 34O lalokesen nangra Cingra, misopa' i Cingraan, misti' i Cingraan, ta mipatay i Cingraan. Sakatolo a romi'ad i, o lalomowad Cingra a ma'orip nai patay,>> han ni Yis.
O Pilongoc ni Yakop aci Yohani
(Matay 20.20-28)
35Itiyasato, tayra a miraod i ci Yisan ko fa'inayan a wawa ni Cipitay ci Yakop aci Yohani, sowal sa, <<Singsiaw, ira ko ccay a lalongocen niyam, nanay lahcien Iso,>> han nangra.
36Licay sa ci Yis, <<O maan ko lalongocen namo i Takowanan saw?>> han Ningra.
37Paca'of sa cangra, <<Yo maro'to Kiso i ma'dilay a tadamaanay a kamaro'an i, nanay papikapoten kami a maro' i Tisowanan, i kawananen Iso ko ccay, i kawilien Iso ko ccay,>> han nangra.
38Pasowal sa ci Yis i cangraan, <<Caay ka fana' kamo to tatodong no ningitangitan namo. O nananomen Ako a pades a takid atoya lalayapen Ako a ino' i, mafilo namo a milayap saw?>> han Ningra.
39Paca'of sa cangra, <<Mafilo niyam,>> saan.
Pasowal sa ci Yis, <<Hai, o nananomen namo ko nananomen Ako a pades a takid. O lalayapen namo ko lalayapen Ako a ino'. 40Nikawrira, o nipipatireng i kawanan, i kawili Ako i, caay ko no Mako a dmak korira. Deng o Kawas ko patalaay a patireng itira to nipili'an Ningra a tamdaw,>> han Ningra.
41Matngil noya mamo^tepay a nisawawaan konini a sowal i, makter cangra ci Yakopan aci Yohanian. 42Saka, tahidang hanto ni Yis cangra a ma^min, ta pasowal sa i cangraan, <<Mafana' kamo to nika o mikowanay to finawlan hananay a tadamaanay a tamdaw i tini i hkal i, mipa^kel to finawlan a mikowan. 43Nikawrira, i tini i tamowanan i, caay ko hahaenen no namo. Ano cima namo ko mangalayay a malatadamaanay i, ka o malomatayalay namo. 44Ano cima namo ko mangalayay a malasakakaay i, ka malokoli no tamdamdaw. 45Nawhani, o sakatayni no Wawa no Tamdaw i, caay ko pakatayalay to tamdaw, o malamamatayal to saki tamdamdaw, o romasato, malasapatfoc Cingra a patodong to saki 'alomanay a tamdaw a kinafalah to 'orip,>> han Ningra.
O Piadah ci Partimayan o Mapohaway
(Matay 20.29-34; Luka 18.35-43)
46Tayra cangra i Yiriko. Yo malahaklong ci Yis ato nisawawaan Ningra ato 'alomanay a finawlan a miliyas to Yiriko i, ira a maro' i lawac no lalan ko wawa ni Timay ci Partimay hananay a mapohaway a miki'a'amay. 47Ira ci Yis no Nacali saan a matngil ningra saka, cli' sa cingra a somowal, <<O Wawa ni Tafiti, Yisaw, kasini'adaenho kako!>> saan cingra.
48Katomrep han no 'alomanay a tamdaw cingra a mikakter, nikawrira, mangalef a mangalef ko nipicli' ningra, <<O Wawa ni Tafiti, kasini'adaenho kako,>> saan.
49Tireng sa ci Yis, <<Tahidangen cingra,>> han Ningra a somowal.
Sowal hanto nangra koya mapohaway a tamdaw, <<Kalipahak kiso, kalomowad, mitahidangay Cingra i tisowanan!>> han nangra.
50Saka, hlong hanto ningra ko kafafang a mifalah a mitakod a tayra i ci Yisan.
51Licay han ni Yis cingra, <<O maan ko lalongocen iso i Takowanan saw?>> han Ningra.
Paca'of sa koya mapohaway, <<Singsiaw, o sapaka'arawaw ako!>> han ningra.
52Sowal sa ci Yis, <<Olili. O paso'lin iso ko sakaadah iso,>> han Ningra.
Saka, tangsol sato a paka'araw ko mata noya mapohaway, ta toor sato ci Yisan a romakat.
Currently Selected:
Maroko 10: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
