Bisalu Bibilumbi 11
11
Misamu miPierre ombu dibundu diJerusalem
1Badukitsi abamaba o Judee bamagulu yiri abagaa baJuif bamadila Mambu maNsambi wandi. 2Ava Pierre amawendila o Jerusalem baJuif basamalaba ubueji na bamamunyangila rie: 3Kabogu gumatsana na abagaa baJuif na gumaji nogu? 4Pierre amabatubulila motsu rie: 5Nyimaba o Joppe na ava nyimasambililanga nyimalaba yiriariamu. Nyimalaba nderi tsanda jineni jitungu kodu tsiotsu; jimasunduga ombu gami. 6Nyinojigengila buranga nyimalaba minongu miotsu mibibulu na mibilandila na mibatsoli. 7Mbana nyimagulu diufi adimansingula rie: Pierre relama, biboki, gukaji. 8Tumba nyimavosa rie: Nesi Fumu! Na kala nyisakaji ayimakandusu vo ayivu muinsi. 9Kabogu nyimamuegulu diufi adimamuevosa rie: Ayi Nsambi amaliomisa guyayigengila nderi yivu muinsi. 10Nyimadigulu kumbu yirieru mbana tsanda jimagabuga o julu. 11Sundila babaala barieru abamaruyila o Cesaree bamatola o ndagu aji nyimatsanina. 12Yinyunyi yiNsambi amansingula rie: Wenda nogu guyatumuna paga. Tumawenda, jetu na babaala basiamunu na tumakota o ndagu Corneille. 13Jandi amatutsingula yiri yiansa yimalabana nandi na yimamutsingula rie: Sindiga batu o Joppe uyenengila Simon ajinengulungu Pierre. 14Jandi ogulonsa mawelimina ugugobula, nesi bisi ndagu agu botsu. 15Ava nyimabandila uvosa, Yinyunyi yiNsambi amasunduga ombu gogu nana amasunduyila ombu getu va dibandu. 16Mbana nyimarangimina adi Fumu amavosa rie: Jean amabatisanga na mamba tumba jenu dubatusungu na Yinyunyi yiNsambi. 17Je digaa diwelimina yiri abagaa baJuif bamavayila Jesus Christ yitu na bamadila pegulu munongu mosi nana jetu tumadilila? Je menu nyina musuga utumuna paga na Nsambi?
18Banogulu nana bamavola sui. Bamadodisa Nsambi novosa rie: Diboti Nsambi erondi yiri abagaa baJuif bagobulu wandi.
Dibundu diAntioche
19Jogu abamapansu mu diambu didikuana adimaba mu temu Etienne bamatola te no Phenicie no Chypre no Antioche. Bamasamuna Musamu Uboti yika ombu baJuif. 20Tumba bisi Chypre na bisi Cyrene bamosi abamatola o Antioche bamasamunina abagaa baJuif Musamu Uboti uFumu Jesus. 21Mangolu maFumu mamaba nogu na batu bapuela bamamuvayila yitu. 22Bisi dibundu diJerusalem banogulu misamu mieni bamasindiga Barnabas te no Antioche. 23Ava amatolila amalaba nana Nsambi amagabila batu bandi miula; amalaba ubueji na amabalonsa rie: Waranu na ngensa jibi nenu. 24Barnabas amaba mutu muboti agumabasu na Yinyunyi yiNsambi na mu diambu diyitu yiandi batu bapuela bamafubana mirima na Fumu.
25Barnabas amawenda o Tarse uyelanda Paul na amamubega o Antioche. 26Jogu botsu babeji bamatsana guna yilima yimosi uyenalonsanga bisi dibundu na bapuela bamagulu malongi mogu. O Antioche badukitsi bamabanda unengulu batu baChrist.
27Mu temu eni babiyitsi bamarambuyila o Jerusalem uwenda o Antioche. 28Umosi va gari ogu, diina diandi Agabus, amabiga na mangolu maYinyunyi yiNsambi rie: Mu bulongu buotsu muba dungosu dunsala. (Duonyi dumaba mu temu Claude amaba kaga.) 29Badukitsi bamatabula diambu yiri mutu uotsu owamusa baana bataji abamatsananga o Judee. 30Botsu bamasinga kabogu bamatinda Barnabas na Saul ombu bivunda biJudee.
Currently Selected:
Bisalu Bibilumbi 11: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
