Bisalu Bibilumbi 14
14
Paul na Barnabas bamawenda o Iconium
1Paul na Barnabas bamakota o Ndagu Yibenguna o Iconium. Banolonsa, baJuif bapuela na abagaa baJuif wandi bamavayila Fumu yitu. 2Tumba baJuif abamabusa malongi mogu bamapupisa abasamaba baJuif ava bamagelilanga bilumbi. 3Paul na Barnabas bamatsinga o Iconium. Bamalonsanga mambu maFumu na mangolu na Fumu amabalasanga yiri malongi mamaboti mandi mamaba mangensa ava amabaveyila mangolu uvaga bimaga nolasa bilimba. 4Vamaba dupasu va gari bisi musiengi; bamosi bamaronda baJuif na basusu bamaronda bilumbi.
5BaJuif na abagaa baJuif bamavangana na bivunda yiri bokuana bilumbi nobaboka na mamanyi. 6Bilumbi banodijaba bamarina te no Lystre na Derbe, misiengi amimaba o Lycaonie nesi te no biairi biotsu bimbanda tsi. 7Aguna bamasamuna Musamu Uboti.
Paul na Barnabas bamawenda o Lystre
8O Lystre umaba dibaala adimaba na bubomfi bumakalu ubongila va duburu duandi. 9Jandi amagulungu malongi maPaul. Paul amamugengila yisuisu na amajaba yiri amaba na yitu yiwelimina ubeluga. 10Kabogu amavosa na mangolu rie: Relama teliti na makulu magu. Jandi amarelama nodumuga dikabi na amawenda. 11Ava batu bamalabila adi Paul amavaga, bamagamuga mu mbembu ogu rie: Bansambi bamasunduga ombu getu mu yibagunu yibatu. 12Jogu bamanengila Barnabas Zeus na Paul Hermes mu mbari jandi agumavosanga. 13Muvagulitsi upagu uZeus agu ndagu nsambi andi jimaba va dikotulu dimusiengi, amabega balumi babeji babangombi na bafelera te no miunu mindagu mu mbari amaronda yiri bobavagulila pagu. 14Barnabas na Paul banodigulu bamapasa biduam biogu na bamawenda mambangu ombu batu beni na bamagamuga rie: 15Aa jenu, dibandu yi duivayili nana? Jetu tuji batu munongu mosi nana jenu. Tuji vava udusamunina Musamu Uboti yiri dubusa bakosi abagaa na tsongu nogengila Nsambi aguvu monyu, agumavaga julu na butamba na mubu na biotsu abivu muna. 16Mu temu atsimavioga amasisila malongu motsu uvaga nana berondili. 17Ne nana elasingi na bilimba biandi yiri erumingi motsu: enoyisi mfula na ebendisi bivaru mu temu tsiwelimina; etuveyi biguji na efunisi nsangu ombu getu. 18Ne na mambu memama bilumbi bamalaba uvura mu mbari batu bamaronda ubavagulila pagu.
19BaJuif bamosi abamavina Paul bamaruyila o Antioche o Pisidie na Iconium. Bamapupisa batu mirima te na jogu wogu bamaba kingu mosi nogu, mbana bamamutinda mamanyi. Banotasa yiri amafu bamamupalisa va gusu kana musiengi. 20Tumba ava badukitsi bamamukandila jandi amasundila urelama na amagabuga o musiengi. Ava kedi jogu na Barnabas bamawenda oDerbe.
Paul na Barnabas bamagabuga o Antioche o Syrie
21Paul na Barnabas bamasamuna Musamu Uboti o Derbe na bamadila badukitsi bapuela. Bamagabusila o Lystre, mbana o Iconium te no Antioche o Pisidie. 22Bamawarisa badukitsi na bamabalubusa uba na yikanana. Bamalonsa rie: Tulelaba maguga maneni mbana tulaba Dummu duNsambi. 23Mu mabundu motsu bamabasolila bivunda; bamabusa uji ukevega o dusambu, mbana bamabasulasana ombu Fumu agu bamavayila yitu.
24Mbana jogu banovioga Pisidie bamatola o Pamphylie 25Bamalonsa Mambu maNsambi o Perge mbana bamagabuga o Attalie. 26Banorambuga vana bamagabuga o Antioche mu mbari avana bamagabulu miula usala yisalu yiNsambi ayi babanomanisila.
27Jogu banotola o Antioche bamanengila bisi dibundu na bamatubula motsu ama Nsambi amabavayila na nana amakotisila abasamaba baJuif mu dibundu. 28Mbana bamatsananga na badukitsi.
Currently Selected:
Bisalu Bibilumbi 14: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
