Bisalu Bibilumbi 13
13
Barnabas na Saul bamasolu mu yisalu
1Mu dibundu diAntioche mumaba babiyitsi na milonsi: Barnabas na Simeon (ajinengulungu upinda) na Lucius (muisi Cyrene) na Manaen (agumabanguyila o ndagu Herode, yivunda yibulongu) na Saul. 2Ava jogu bamasambililanga Fumu nobusa uji, Yinyunyi yiNsambi amavosa nogu rie: Dundanu Barnabas na Saul yiri bosala yisalu ayi nyimabanengilila. 3Banomana temu jiubusa uji nosambila bamabasakiga miogu na bamabaganina.
Barnabas na Saul bamawenda o Chypre
4Barnabas na Saul banosindugu na Yinyunyi yiNsambi, bamawenda o Seleucie na aguna bamasabuga o nyingi Chypre. 5Banotola o Salamine bamalonsa Mambu maNsambi o Mandagu maBibenguna bibaJuif. Jean Marc amayenabawamusanga.
6Bamananga nyingi eni te no Paphos, aguna bamabenguna na muvanditsi, diina diandi BarJesus. 7Amaba mbatsi jineni na murumitsi unyingi, diina diandi Sergius Paulus omaba mutu diela. Murumitsi eni amanengila Barnabas na Saul mu mbari amaronda ugulu Mambu maNsambi. 8Tumba Elymas, muvanditsi (adina dimaba diina diandi mu Grec) amabalasa maguga na amagubitsa murumitsi yiri akevayila Jesus yitu. 9Mbana Saul, ajinengulungu Paul agumabasu na Yinyunyi yiNsambi amagengila muvanditsi yisuisu 10na amamunyangila rie: Guji muana diabu. Guji muvinitsi ubatu botsu baboti! Guna mavanda mapuela amedunsi batu! Guibivisi mambu mangensa, tindi ubivisa. 11Gulaba, Fumu ogukilisa na guba yidunga, yitsingu yineni gugomuelaba.
Vana vana Elymas amalaba yika pisama na pisama na amayenabembatananga. 12Mu dionyi murumitsi amavayila Fumu yitu mu mbari jaʼ beni amalaba adimavagu na amakambulu ugulu malongi maFumu.
Paul na Barnabas bamawenda o Antioche o Pisidie
13Paul na bambatsi bandi bamawenda o Paphos te no Perge mu Pamphylie. Jean Marc amakakana nogu, amayenagabusila o Jerusalem. 14Bamarambuyila o Perge na banotola o Antioche o Pisidie; yilumbu yitsona bamakota o Ndagu Yibenguna. 15Banomana uranga migaga miMoise na malongi mababiyitsi, bivunda biNdagu Yibenguna bamabatsingula rie: Pa duna mua diambu ulubusa batu, ka vosanu!
16Paul amarelama na anobavotsa amavosa rie: Guluanu jenu baIsrael na jenu aduidumi Nsambi! 17Nsambi jibatu baIsrael amasola bataji betu na amabavega diduma ne baki baviga babisi Egypte. Mbana amabapalisa o bulongu bueni. 18Va julu vana amabakelisa magumana mabilima o kumu. 19Amabunga yisambuali yimalongu o yiari yiCanaan mbana amabavega buogu bulongu guna. 20Aguna bamatsananga te na kama jina na magumaranu mabilima.
Amabavega bansonsi te na Samuel jimubiyitsi. 21Mbana baIsrael bamaronda urumu yika na kaga. Kabogu Nsambi amabavega Saul muana uKis mu yifumba yiBenjamin, amabarumanga te na magumana mabilima. 22Nsambi anomubusa amabavinsila David uba kaga ogu. Nsambi amasingisila bumbeji buebubu rie: David muana Jesse aji munongu dibaala adi nyirondi na erondi udugusu kanu tsiami tsiotsu. 23Jesus la mutegula uDavid agu Nsambi amasola uba Mugobutsi ubaIsrael nana amavanginina nogu. 24Mbe Jesus asakaruga Jean amalonsanga batu baIsrael yiri bakaluli diela nobatusu. 25Ava yisalu yiandi yimabila bebeli nosuka amabawivula rie: Menu la nyi? Menu tsiri jandi agu duivivi! Jabanu yiri oyiruyi epiolili mangolu na menu nyisawelimina unyangula mikudu mibapondu bandi.
26Guluanu, jenu aduvu mu yifumba yiAbraham na jenu aduidumi Nsambi, la ombu genu musamu eni udugobutsu umatindu. 27Mu mbari batu abamatsananga o Jerusalem nesi bivunda biogu basamajaba yiri jandi avu Jesus na basamatsiyisa malongi mababiyitsi amamarangungu tsona na tsona. Ne nana ava bamamufundisila bamadugusu amamabigu na babiyitsi. 28Diuleba yiri basamalaba diambu diwelimina yiri oboku bamawivula Pilate umubokisa. 29Motsu masusu manodugusu bamamugusula va kurusu na bamamutsiga. 30Tumba Nsambi amamurambusa o dufu 31na mua bilumbu binovioga amalabana ombu jogu abamalinganga nandi ubongila o Galilee te no Jerusalem. Jogu baji bambeji ombu baIsrael te na namunyi. 32Kabogu jetu tuidusamunini Musamu Uboti upangini aji Nsambi amavangana na bataji betu. 33Nsambi amadugusu pangini eni ombu jetu atuvu bategula bogu ava amarambusila Jesus o dufu. Dimasonu wandi mu nyimbu tsimubeji rie:
Guji muana ami, namunyi nyimagubura.
34Nsambi amamurambusa o dufu yiri agobola, adina adi jandi amavosa rie:
Nyugugabila miula
agumavangunu na David;
miula miNsambi aguvu ungehsa.
35La dibandu evosili mu bibuku bisusu rie:
Ndeju gugogaru yiri mutu agu obola.
36Kabogu David anomana udugusu duganu duNsambi amaru, amatsigu na bataji bandi na amabola.
37Tumba jandi agu Nsambi amarambusa o dufu asamabola.
38Kabogu bambatsi bami, jabanu yiri misamd midutandulu dumasumu mimadusamununu nandi,
39jabanu wandi yiri uotsu aguimuvayili yitu otandu masumu amasamatandu na migaga miMoise.
40Kabogu kebananu yiri mbigulu ajimabigu na babiyitsi jigodugaanga. Bamabiga rie:
41Jenu balensitsi dukambulu
tumba ne nana dufu.
Nyusala yisalu mu temu enu
ayi dugogaru ne pa mutu odulasa yionyi kengili.
42Ava Paul na Barnabas bamapalila o yibenguna batu bamabawivula umueruga tsona ajiuruga nomuebalonsa mambu memama. 43Yibenguna yinosuka baJuif na abagaa baJuif abamagobulu bamabaduka. Paul na Barnabas bamabalonsa na bamabawarisa yiri bayakonda maboti maNsambi.
44Tsona eni bisi musiengi bapuela bamagukama ugulu mambu maFumu. 45BaJuif banolaba yinombu bamasunda uwava na bamavina motsu ama Paul amavosanga na bamabalasa maguga nobasienganga, 46Paul na Barnabas bamabawaka rie: Mambu maNsambi mamaledusamununu tumba dunomabusa kabogu dugomuedila monyu umutiibu; jetu yika ombu abagaa baJuif tuiwendi. 47Mu mbari Fumu amaruma rie:
Nyimagusola uba yijalala yibulongu,
ugobula batu botsu.
48Abagaa baJuif bamalaba nsangu ava bamagululu dionyi na bamadodisa Mbembu Fumu. Botsu abamasolu udila monyu umutubu bamajivayila yitu.
49Mbembu Fumu jitnanyavanga mu bulongu buotsu. 50Tumba baJuif bamabanda dikuana diPaul na Barnabas; bamapupisa batu baneni nesi bivunda bimusiengi na bagetu abamayitsanga Nsambi te na bamabapalisa o yiari yieni. 51Paul na Barnabas bamabagandila na bamawenda o Iconium. 52Badukitsi abamaba o Antioche bamabasu na nsangu na Yinyunyi yiNsambi.
Currently Selected:
Bisalu Bibilumbi 13: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
