Dibandu 17

Diina diAbram dimavinsu Abraham

1Ava Abram amadugusulu magumidufu na yifu yibilima Fumu amalabana nandi na amamutsingula rie: Menu la Nsambi aguvu na mangolu motsu. Fubana murima nami noba usungama va gusu ami. 2Uvangana nyivangini pangini nagu na nyufunisa bategula bagu.

3Abram amagudama va tsi na Nsambi amabuesa rie: 4Gulu pangini aji nyivangini nagu. Ndeʼ guvu kaga jibatu bapuela. 5Gugomuenengulungu Abram tumba diina diagu diuba yika Abraham mu mbari nyuguvaga kaga jibatu bapuela. 6Nyufunisanga bategula bagu te na boba malongu na bamosi boba bakaga wandi. 7Nyukelisanga pangini nagu na bategula bagu wandi te na kula tsiogu tsiotsu: ajina jiuba pangini jimutubu mu jionyi nyubanganga Nsambi ogu nesi te na bategula bogu. 8Bulongu abu ndeʼ guitsanini nderi muenyi nyubuvega mutubu ombu gagu nombu bategula bagu. Nyuba Nsambi ogu o bulongu buCanaan.

9Nsambi amatsingula Abraham rie: Mbe ka ndeʼ jenu na bategula bagu dukelisanga pangini ami te na kula tsiotsu. 10Yilimba ayiundasa yiri guikelisi pangini ami, jenu na bategula bagu ayiyi: muana dibaala uotsu orebu. 11Jenu durebungu; adina diuba yilimba yipangini va gari jetu nenu. 12Mutubu na mutubu muana uotsu udibaala ava odugusulu yinana yibilumbu orebu: ne abamaburulu o ndagu agu, ne abamasumbu na mbongu tsiagu ne muana dibaala umuenyi agugaa muisi dilongu diagu. 13Muviga uotsu vengu orebu ne agumaburulu o ndagu agu ne agumasumbu na mbongu wandi, yiri pangini ami jiulabinina mu nyuru tsienu te na mutubu, 14tumba dibaala adisarebu opalusu va gati batu bandi, diwendi rie: aboku; mu mbari amabunsa pangini ami.

15Nsambi amatsingula Abraham rie: Guyamuenengilanga mugatsi agu Sarai, diina diandi diuba yika Sara. 16Nyumugabila miula na jandi oguburila muana dibaala. Nyumugabila miula na oba kaga jibatu bapuela na bamosi va gari bategula bandi boba bakaga wandi.

17Abraham amagudama noreka mbana amakewivula rie: Mutu aguvu na kama bilima omuebura muana? Na Sara agukavu na magumidufu mabilima omuebura? 18Abraham amatsingula Nsambi rie: Aa mbe Ismael obanguga va misu magu!

19Nsambi amamuwaka rie: Tsiri nana, mugatsi agu Sara oguburila muana dibaala, gumuluga Isaac. Nyuvangana pangini mutubu nandi ajiukelusungu te na bategula bandi. 20Nyiina, nyimagulu wandi diambu diIsmael. Nyumugabila miula: nyumuvega mangolu uburanga na nyumufunisanga; obura yigumi na baana bakaga babeji na oba kaga jibatu bapuela. 21Tumba tindi pangini ami jivu na Isaac agu Sara oguburila va temu ajiji mu yilima ayiuruga.

22Nsambi anomana uvosa na Abraham bamakakana. 23Muna yilumbu yieni Abraham na muana andi Ismael na botsu abamaburulu o ndagu andi na botsu abamasumbu na mbongu tsiandi, diwendi rie: babaala botsu abamaba o ndagu andi bamarebu. Botsu bamarebu udugusu diruma diNsambi. 24Abraham amaba na magumidufu na yifu yibilima ava amarebulu. 25Muana andi Ismael amaba nayigumi na bilima birieru ava amarebulu. 26Muna yilumbu yieni ayi Abraham amarebulu, muana andi udibaala Ismael amarebu wandi. 27Babaala botsu abamaba o ndagu andi, ne abamaburulu o ndagu andi ne abamasumbu na mbongu tsiandi ne benyi bamarebu va mosi nandi.

Currently Selected:

Dibandu 17: PUU1992

Highlight

Copy