Dibandu 18

Nsambi utubula etubuli yiri Sara obura muana dibaala

1Va temu jiyiusila yimuangulu Fumu amalabana na Abraham va gari miri mineni miMamre; amaba atsana va dikotulu dindagu andi jitsanda. 2Amanangula misu na amalaba babaala barieru abasamaba vala nandi. Anobalabilila amayebabengusana mbangu, amagudama. 3Amavosa na umosi rie: Fumu pa nyimadila maboti ombu gagu, kokolu guyapioga, lekotanu. 4Badubeyili mua mamba ususa makulu mbana letsananu o tsi muiri egugu. 5Nyuyebonga mua mapa utsoka murima, dunomana uji duyenawendanga; mu mbari nyilabi ubueji yiri dumakota ombu gami.

Bamagabusila rie: Vaga nana gutsivosila.

6Abraham amalensa ugabuga o ndagu andi jitsanda ombu Sara na amavosa rie: Lensa nosobana bietsu birieru bifufu; lamba mapa mageyi.

7Mbana Abraham amawenda mbangu o mugamba andi amayegaanga muana ngombi uvonga. Amaguwakisa ombu musalitsi agumagulamba mbangu mbangu. 8Biguji binovi Abraham amabisunsa va gusu ogu. Jaʼ beni amatsana va mugula ogu o tsi muiri ava bamajanganga. 9Mbana bamamuwivula rie: Mugatsi agu, Sara, aka? Amawagula rie: Aji guna ndagu.

10Umosi va gari ogu amavosa rie: Va temu ejiji mu yilima ayiuruga nyumueruga ombu gagu nyurasuna mugatsi agu Sara na muana dibaala. Kabogu Sara amagulu mambu meni ava amabila o gari ndagu.

11Abraham na Sara bamanuna; Sara amakubulayitu uburabaana. 12Amareka o tsi murima novosa rie: Nyimakenunina, nyumuelaba nsangu jimunongu eni? Fumu ami wandi amanuna. 13Fumu amawivula Abraham rie: Dibandu yi Sara atsirekila novosa rie: Je dingensa, nyubura muana, menu agumakenunina? 14Va diambu adigorungulu na Fumu? Muna yilima ayiuruga vana temu ajimatabulu nyumueruga ombu gagu nyurasuna Sara na muana dibaala.

15Sara amafura rie: Ngaareka, mu mbari amalaba goma. Tumba Fumu amavosa rie: Dingensa gutsireka.

16Babaala beni bamarelama ne bakasogama, bamagengila o yiari yiSodome. Abraham amayebavetsiga. 17Mbana Fumu amatasa rie: Je nyusueyila Abraham adi nyirondi uvaga? 18Dingensa Abraham oba kaga jibatu bapuela na abavu na mangolu. Bisi malongu motsu bokwivula ubagabila miula nana nyimamugabila miula. 19Nyimamusola yiri olonsa baana bandi bababaala nesi bategula bandi ukelisa maruma mami novaga amavu mawelimina na masungama, anana nyudugusulu pangini aji nyimavangana na Abraham.

20Fumu amavosa na Abraham rie: Nduku atsi nyigulu mu diambu dibisi Sodome na Gomorrhe tsimaviolila na masumu mogu mamaviolila wandi. 21La dibandu nyusunduyila nolaba dibandu dimabi mogu nolaba yeri mavu dedi na nduku atsi nyimagulu; pa mavu nana nyudijaba.

22Kabogu babaala babeji bamayenawenda o yiari yiSodome tumba Fumu amasiala na Abraham. 23Abraham amakueka na amawivula Fumu rie: Gubokisa mutu usungama va mosi na mutu mubi? 24Tanguji o musiengi uvu magumaranu ma-abasungama. Gubaboka wandi? Gugorungula ukelisa musiengi eni mu diambu dimagumaranu ma-abasungama abavu muna? 25Viaga, digorungula uba! Ubokisa mutu usungama na mutu mubi, adina dilasi yiri mutu usungama ugengulu nderi mutu mubi digorungula uba nana! Jandi oyitabulili bisi butamba botsu bunsonsi agobutabula na dusungugu?

26Fumu amabuesa rie: Pa nsirasuna magumaranu ma-abasungama o Sodome, nyutanda bisi musiengi uotsu mu diambu diogu.

27Abraham amamuevosa rie: Je meʼ aguvu yika mutu nyina musuga umuevosa na Fumu? 28Yika tsie, pa gurasuna magumana na abasungama baranu, gubunga musiengi uotsu mu diambu dibaranu abegambu?

Fumu amawagula rie: Ngobunga musiengi pa nsirasuna magumana na abasungama baranu.

29Abraham amamuevosa nandi rie: Yika tsie, pa gurasuna magumana buandi ma-abasungama! Fumu amawagula rie: Ngovayila musiengi diambu mu diambu dimagumana meni.

30Abraham amamuevosa nandi rie: Fumu guyanyoga, pa nyumuevosa. Yika tsie, pa gurasuna magumarieru buandi ma-abasungama? Fumu amawagula rie: Pa nsirasuna magumarieru ma-abasungama ngovayila musiengi diambu.

31Abraham amamuevosa nandi rie: Je meʼ nyurungula umuevosa na Fumu? Yika tsie, pa gurasuna magumabeji buandi ma-abasungama? Fumu amawagula rie: Ne magumabeji, ngobunga musiengi.

32Abraham amamuevosa nandi rie: Fumu guyanyoga, nyumuevosa temu ajiji buandi. Yika tsie, pa gurasuna digumi buandi di-abasungama? Fumu amawagula rie: Ne digumi di-abasungama ngobunga musiengi.

33Fumu anomana uvosa na Abraham amayenawenda. Abraham amayenagabuga o ndagu andi.

Currently Selected:

Dibandu 18: PUU1992

Highlight

Copy