Dibandu 26

Isaac na Abimelek

1Wamaba dungosu dunsala dususu mu bulongu, tsiri adumaba va temu Abraham kabogu Isaac amawenda ombu Abimelek kaga jibaPhilistin o Guerar. 2Fumu amalabana na Isaac na amavosa rie: Guyawenda o Egypte, gukayetsana o bulongu abu nyugulonsa. 3Tsana o bulongu buebubu; nyuba nagu na nyugugabila miula; nyuvega biari biebibi biotsu ombu gagu nombu bategula bagu na nyukelisanga pangini aji nyimavangana na taji agu Abraham. 4Nyufunisa bategula bagu te na boba nderi bambuelili; nyuvega biari biebibi biotsu ombu bategula bagu na malongu motsu mogabulu miula mu diambu diagu, 5mu mbari Abraham amadedila diufi diami na amakelisa malongi mami na amadedila manima mami na migaga miami miminongu na minongu.

6Isaac amatsaninanga o Guerar. 7Ava bisi mbura eni bamawivulilanga bivu mu diambu dimugatsi andi amawakanga rie: Aguna yibusi yiami. Amalabakeri uvosa yiri avu mugatsi ami mu mbari bisi mbura eni bakemuboka; Rebecca amaba tindi muboti.

8Anotsinga guna dimalabana yiri Abimelek kaga jibaPhilistin amagengila va fenetera; amalabilila Isaac agumasanisa mugatsi andi Rebecca. 9Abimelek amanengila Isaac na amavosa rie: Kabogu aguna aji mugatsi agu! Dibandu yi gutsivosila rie: Aguna yibusi yiami? Isaac amawaka rie: Nyimawagula nana mu mbari nyimatasa nyuboku mu diambu diandi.

10Abimelek amawivula rie: Ayina yi? Mbe ne mutu mosi amafubana yitsiga na mugatsi agu mbe gutuvega mbela.

11Mbana Abimelek amaruma rie: Uotsu agufubana yitsiga na dibaala diedidi vo na mugatsi andi aboku.

12Isaac amavara o bulongu bueni na muna yilima yieni amadila kama kama mu mbari Fumu amamugabila miula. 13Bima biandi bimafunanga te na amaba tindi yisina. 14Amaba na migamba mibindombu na mibinsabi na mibangombi va julu vana dutalu duneni dubasalitsi.

Isaac uvangana evangini pangini na Abimelek

BaPhilistin bamawava Isaac. 15Kabogu bamagulasana biduna biotsu bimamba abi basalitsi bataji andi Abraham bamatima. 16Abimelek amatsingula Isaac rie: Busina buagu na mangolu magu bimaviolila, gusuga vava.

17Isaac amagusuga vana amayevaga milaku o yibususu yiGuerar. 18Isaac amatimunina biduna bimamba abimatimu va temu taji andi Abraham abi baPhilistin bamagulasana yiotsu ayi Abraham amafuila. Isaac amabilugulila miina ama taji andi amabiluga. 19Yilumbu yimosi basalitsi balsaac bamamuetima yiduna o yibususu na bamadila yileka yimamba. 20Babungulitsi babindombu baGuerar bamatsundisa babungulitsi babindombu balsaac rie: Mamba ametu.

Isaac amaluga yiduna yieni yimamba Essec, mu mbari bamatsunda nandi. 21Basalitsi bandi bamatima yiduna yisusu yimamba, bamamuetsundila mu yionyi wandi; amayiluga Sitna. 22Amagusuga vana na amatima yiduna yisusu yimamba ayi basamatsundila; amayiluga Rehobot, mu mbari amavosa rie: Fumu amatujeyisa na tufunanga.

23Bamarambuga vana bamayenawenda o Bercheba. 24Mukolu eni Fumu amalabana na lsaac na amavosa rie: Menu laNsambi taji agu Abraham; guyalaba keri mu mbari nyiji nagu; nyugugabila miula na nyufunisa bategula bagu mu diambu dimusalitsi ami Abraham.

25Amarunga yinyensulu yipagu vana na amasambila mu diina diFumu na amarangiga ndagu andi, jitsanda vana. Basalitsi balsaac bamatima yiduna yimamba yisusu.

26Abimelek amarambuyila o Guerar amawenda ombu Isaac, jogu na batu nandi Ahouzat na Pikol agumaba yivunda yidibadi diandi. 27Isaac amabawivula rie: Dibandu yi duiruyili ombu gami, jenu duipini. Tsia dumambinga o yiari yienu?

28Bamawaka rie: Tuilabi yiri Fumu aji nagu. La dibandu tuivosili rie: Tuvangana pangini nagu nojiwarisa na pesi. 29Leva yiri gugotuvaga ne dibi dimosi nana jetu tusamagulasila maguga; tumaguvaga yika maboti na maboti na tumaguwensa na polu. Dingensa gumagabulu miula miFumu.

30Isaac amabalambila mulambu uneni mbana bamaji na bamanu. 31Ava kedi bamalevasana pesi. Isaac amabaganina na jogu bamayenawenda na polu.

32Muna yilumbu yieni basalitsi balsaac bamawenda uyemutsingula mu diambu diyiduna yimamba ayi bamatimanga, bamavosa rie: Tumadila mamba.

33Bamayiluga Chiba. La dibandu musiengi eni guinengulungu Bercheba te na namunyi.

Diweia diEsau

34Ava Esau amabila magumana mabilima amawela bagatsi: Yehoudit, muana mugetu uBeri na Basmat, muana mugetu uElon. 35Isaac na Rebecca bamanyonganga mu diambu dibagetu beni.

Currently Selected:

Dibandu 26: PUU1992

Highlight

Copy