Dibandu 27

Miula miEsau mimapatulu na Jacob

1Ava Isaac amanunina misu mandi mamabiva tindi ubiva. Asamamuelaba nana na kala. Amanengila tsomi andi Esau rie: Muana ami. Esau amawagula rie: Meʼ janduʼgu!

2Isaac amavosa rie: Nyimanuna na ngejabi yilumbu ayi nyufuila. 3Kabogu nyigurumi, bonga dupalu na pita, wenda o musiru yembokila nyama. 4Ndambili biguji nana nyirondili na bimbeyili yiri nyugugabila miula ne ngafu.

5Rebecca amalega ugulu ama Isaac amatsingula muana andi Esau. Esau amayenawenda o musiru uyeromba nyama. 6Mbana Rebecca amatsingula muana andi Jacob rie: Gulu, nsigulu taji agu atsiyosa na muana nguji agu Esau rie: 7Mbeyili nyama na ndambili biguji abi nyuji na nyugugabila miula miami va gusu Fumu ne ngafu. 8Mbana Rebecca amavosa rie: Muana ami, tsie kululu! Dedila adi nyigurumi namunyi. 9Wenda o migamba yembongila baana babinsabi babeji; nyulambila taji agu biguji nana erondili; 10na guyewakisa biguji bieni ombu taji agu yiri ogugabila miula ne akafu.

11Jacob amawagula nguji andi rie: Gulu, Esau avu na mionyi, nyuru tsiami tsigaa na mionyi. 12Tanguji taji ami ombemba na diumujabisa mudunsitsi nyivu adina diutombisa mulogu tsiri miula.

13Nguji andi amamutsingula rie: Muana ami mulogu eni ubi va julu muru ami. Ndedili, wenda yembongila binsabi!

14Jacob amayebibonga, amayebivega nguji andi agumabilamba nana taji andi amarondila. 15Va julu vana Rebecca amabonga biduaru biboti bifeta bitsomi andi Esau abimaba o ndagu, amabiduisa Jacob muana andi agungebi. 16Amaduisa makaka mandi mikata mibinsabi nesi kingu andi mu mbari jisamaba na mionyi. 17Mbana amawakisa muana andi Jacob biguji na mapa abi amalamba. 18Jacob amawenda ombu taji andi novosa rie: Tata ami! Isaac amawagula rie: Meʼ janduʼgu! Muana ami, ndeʼ lʼanyi?

19Jacob amawagula taji andi rie: Menu la muana agu Esau, nyimavaga adi gutsituma. Kokolu lerugati noji yiamba yiami mbana kabili miula. 20Isaac amawaka muana rie: Ayi! Gumadila ka, muana ami! Jacob amawagula rie: Nyiina, Fumu Nsambi agu atsikwamusa.

21Isaac amavosa na Jacob rie: Rugati yiri nyugubemba nojaba yeri guvu muana ami Esau.

22Jacob amakueka ombu taji andi Isaac agumamubemba novosa rie: Diufi divu nderi diJacob tumba makaka mavu maEsau.

23Asamamujaba mu mbari makaka mandi mamaba na mionyi nana makaka mamuana nguji andi Esau; kabogu mbe asakamugabila miula, 24amamuewivula rie: Ndeʼ la muana ami Esau? Jacob amawagula rie: Nyiina.

25Isaac amavosa rie: Kabulili yiri nyuji yiamba yiagu mbana nyugugabila miula.

Jacob amakabulila taji andi na amaji; amamubeyila mamba wandi na amanu. 26Mbana taji andi Isaac amamutsingula rie: Kweka gunu muana ami, mfifi.

27Jacob amakweka na amamufifa, Isaac amagulu mbunga biduaru biandi; mbana amamugabila miula na amavosa rie: Gulu mbunga biduaru bimuana ami jivu nana mbunga musiru aguvu na miula miFumu.

28Nsambi agunoyisili disala,

Butamba bugufunisili digumba,

butamba bugufunisili ble,

butamba bugufunisili rayisan.

29Batu botsu barumu nagu,

bisi malongu motsu bakebuaga va gusu agu!

Ba fumu jibaana bataji bagu,

mukuta ogu ukebuaga va gusu agu!

Mulogu ubi na jandi aguguloga,

miula mibi na jandi agugugabila miula.

30Yiotsu ayi Isaac amamanina ugabila Jacob miula, Jacob amayenawenda; mbe asakaweʼ vala muana nguji andi Esau amaruga o burela. 31Jaʼ wandi amalamba biguji abi amayevega taji andi; amatsingula taji andi rie: Kokolu rugati! Ji yiamba yiami, kabili miula! 32Taji andi, Isaac amamuwivula rie: Aguna nyi? Amawagula rie: Menu, muana agu Esau!

33Isaac amagaangu na tindi munyongu te na amaregama na amawivula rie: Anyi abanoruyila o musiru agumakabila yiamba? Nyimaji biotsu ne ndeʼ gukaruga va julu vana nyimamugabila miula. Jandi guna obanganga na miula.

34Ava Esau amagululu posulu tsitaji andi amalila tindi ulila na amagamuga na munyongu rie: Aa tata ami, kabili miula meʼ wami!

35Isaac amawagula rie: Muana nguji agu atsindionga. Nyimamugabila miula miagu.

36Esau amawivula rie: Je diina diJacob dimuveyi musuga undunsa kumbu beji? Amalepatula buvunda, laba namunyi amamuepatula miula miami! Mbana amabuela rie: Vagaasiala miula misusu ami gukabila?

37Isaac amawagula Esau rie: Gulu, nyimamuvaga fumu agu. Baana bataji bandi botsu boba basalitsi bandi. Jandi agogambu na ble nesi mirayisan. Muana ami diambu yi nyurungula uguvayila?

38Esau amalenda taji andi rie: Tata, yika miula mieni buandi mivu nagu? Tata, kokolu kabili miula wandi! Mbana Esau amalila tindi ulila. 39Taji andi Isaac amavosa rie:

Mbura aji guitsanini

jiuba yika dukanga na dukanga.

Disala digogunogulu.

40Dijenga diagu diuba mangolu magu,

Gusalila muana nguji agu,

Guba yilayilayi,

O gusu gupansa yilala yiandi,

mbana gujegusu.

Jacob amarina ombu katsi andi Laban

41Esau amavina Jacob mu diambu dimiula ami taji amamugabila, Esau amavosa o tsi murima andi rie: Namapapa taji ami ofu, muna yilumbu yieni nyubokila muana nguji ami Jacob. 42Bamayetsingula Rebecca posulu tsiEsau. Kabogu amaruma mutu unengila Jacob na amamutsingula rie: Kebana, muana nguji agu Esau erondi ugugabusila pila, diwendi rie: Oguboka. 43Muana ami, ndedili! Rina ombu muana nguji ami Laban o Haran; 44tsana nandi mua temu te na vana kabu jimuana nguji agu jiusaguga. 45Yiotsu ayi kabu jimuana nguji agu jiusaguyila na olibana adi gumamuvayila mbana nyugunengila. Dibandu yi nyuduvindila jenu botsu babeji yilumbu yimosi?

46Rebecca amatsingula Isaac rie: Nyilabi baana babagetu baHitt nsoruru. Pa Jacob owela muisi Hitt o bulongu buebubu, uviolila ubueji ufu.

Currently Selected:

Dibandu 27: PUU1992

Highlight

Copy