Dibandu 28

1Isaac amanengila Jacob, amamuganina. Mbana amamuruma rie: Guyawela mugetu umuisi Canaan. 2Wenda o Mesopotamie o ndagu Betouel ombu bakaga bagu, yewela muana uLaban muana nguji nguji agu. 3Fumu Nsambi Mangolu agugabili miula na agufunisi tindi ufunisa te na gubura baana bapuela bapuela. 4Agugabili miula nana amagabila Abraham miula, ndeʼ na bategula bagu yiri bulongu abu gutsanina buba abuagu, abu amavega Abraham.

5Isaac amaganina Jacob agumawenda o Mesopotamie ombu Laban muana dibaala uBetouel, jandi amaba muisi Aram na muana nguji Rebecca nguji Jacob na Esau.

6Esau amagulu yiri Isaac amasindiga Jacob o Mesopotamie uyewela mugetu. Amagulu wandi yiri ava amamuganina amamugandisa rie: Guyawela bagetu baCanaan. 7Amalaba wandi yiri Jacob amadedila taji andi na nguji andi na amawenda o Mesopotamie. 8Adina dimamujabisa yiri taji andi Isaac agerondi bagetu baCanaan. 9Esau amayenawenda ombu Ismael; va julu bagatsi abamaba nandi, amatabula diambu uyewela Mahalat muana uIsmael muana uAbraham na yibusi yiNebayot.

Ndosi jiJacob

10Jacob amarambuga o Bercheba, amawenda o Charan. 11Amatola va mbura, avana amasilimina mu mbari wisi mbe umawenda. Amabonga dimanyi adi amavaga pika andi na amasilimina vana mbura eni. 12Amadora ndosi ajimamulasa yikadi va butamba na kodu jiyionyi jimaduku o julu. Biansa biNsambi bimosi bimamatanga na bisusu bimasunduganga muna yikadi yieni. 13Fumu amaba o julu yikadi yieni na amavosa nandi rie: Menu la Fumu Nsambi agu bataji bagu Abraham na Isaac bamayitsanga. Mbura aji guisilimini nyujivega ombu gagu nombu bategula bagu. 14Bategula bagu bonyava nana difufundu, diwendi rie: ubandila o yiari ayi wisi epalili te no wisi ewendisini nesi o banda nesi o tandu. Mikuta miotsu bokwivula ubagabila miula nana nyimadugabila miula jenu na bategula bagu. 15Rangimina yiri nyiji nagu, nyugukelisanga mbura tsiotsu atsi guwendanga na nyumuegugabusa o bulongu buebubu. Ngogusila pinsa, nyudugusu adi nyimavangana nagu.

16Jacob anorambuga, amavosa rie: Dingensa Fumu aji va mbura ejiji, ngaadijabanga.

17Amalaba goma na amavosa rie: Mbura ejiji jivu yingitsi! Ndagu Nsambi avava jivu na dikotulu dijulu avava divu. 18Jacob amarelama kedi jineni amabonga dimanyi adi amavaga pika andi, amadiretsiga na amawitila matsi va julu dionyi, amadivaga yirangumunu yiyingitsi. 19Amaluga mbura eni Betouel; va kala musiengi eni umanengulungu Louz. 20Mbana Jacob amavangana rie: Pa Nsambi aji nami na ekelisi mu mulingu egugu, pa epeyi biguji na biduaru, 21pa ekabusi na polu o ndagu taji ami mbana Fumu obanganga Nsambi ami; 22mbura ejiji aji nyimaretsiga dimanyi diyirangumunu jiuba Ndagu Nsambi; nyuveganga Nsambi yimosi mu digumi mu biotsu abi opeganga.

Currently Selected:

Dibandu 28: PUU1992

Highlight

Copy